Read Quechua Cuzco Bible 1988 ISKAYKAQ REYES 14 Bible Online

ISKAYKAQ REYES 14 - Quechua Cuzco Bible 1988 bible

ISKAYKAQ REYES 14

¹Israel rey Joakazpa churin Jehoás wata kurakña Israelpi kamachikushaqtinmi, Joaspa churin Amasiasqa Judapi kamachikuyta qallarirqan.

²Amasiasqa kamachikuyta qallarishaspa iskay chunka phisqayoq watayoqmi karqan, iskay chunka isqonniyoq watataq Jerusalenmanta kamachikurqan. Maman Joadanqa Jerusalenmantan karqan.

³Amasiasqa Señor Diospa munayninman hinan chaninta ruwarqan, ichaqa manan David machulan hinapunichu ruwarqan, aswanpas taytan Joaspa ruwasqanta hinan ruwarqan.

⁴Wak'a dios yupaychana cheqaskunapas manan thunisqachu karqan, chaymi runakunaqa chaypi haywashallarqan sacrificiota, inciensotapas q'osñichishallarqankutaq.

⁵Amasiasqa suyu kamachiyninpi atiyniyoqña kashaspanmi, taytan wañuchiq llapan oficialkunata wañuchirqan,

⁶ichaqa manan wañuchirqanchu chay wañuchiqkunaq churinkunata. Moisespa qelqasqan kamachikuy simipin Señor Diosqa kamachisqa: Taytakunaqa manan churinkuq huchanmanta wañuchisqachu kanqa, churikunapas manan taytankuq huchanmanta wañuchisqachu kanqa, aswanpas sapankan kikinkuq huchankumanta wañunqaku, nispa.

⁷Amasiasmi Kachi Wayq'opi chunka waranqa Edom runakunata wañuchirqan, Sela pukaratapas munaychakurqan, chaytan suticharqan Jokteelta, chaytaqmi sutin kapun kunan p'unchaykama.

⁸Chay qhepatataq Amasiasqa willaqta kacharqan Israel rey Jehupa churin Joakazpa churin Jehoasman: Qhari kaspaykiqa, hamuy tinkusun, nispa.

⁹Jehoastaq ichaqa kutichirqan: —Huk kutinsi Libanopi huk kisa cedro sach'aman kachasqa: Ususiykita churiypa warminpaq qopuway, nispa. Ichaqa huk phiña animalsi chayninta purispan chay kisata t'ustupusqa.

¹⁰Arí, Edom runakunata atiparqankin, chaywanmi hatunchakunki. Allinmi, hatunchakullay, chaywanpas wasillaykipi qhepakuy. ¿Imapaqtaq maskhawaq qan kikiykipaq llakikuyta, hinallataq Judapa llakikuynintapas? nispa.

¹¹Amasiastaq ichaqa mana chay nisqanta kasurparirqanchu. Chaymi Jehoasqa puririrqan, hinan Judapi kashaq Bet-semespi Amasiaswan maqanakurqanku.

¹²Judá suyutaqa Israel suyun atiparqan, chaymi Judá runakunaqa sapanka wasinkuman ayqekapurqanku.

¹³Israel rey Jehoastaq Judá rey Amasiasta Bet-semespi presota hap'irqan, chaymantataq Jerusalenta rirqan, chaypin llaqta muyuriq perqata thunirqan Efraín Punkukama Esquina Punkukama, pachak pusaq chunkayoq metrota.

¹⁴Hinaspan munaychakurqan qorita qolqetapas, hinallataq Señor Dios yupaychana wasipi llapan serviciokunata, reypa wasinpi qhapaq-kayninkunatapas. Chaymantataq wakin runakunata presota hap'ispa Samariaman kutipurqan.

¹⁵Jehoasmanta wakin willakuykunapas ruwasqankunamantapas, atiyninmantapas, Judá rey Amasiaswan maqanakusqanmantapas, Israel Reykunaq Willakuynin Qelqapi qelqasqan kashan.

¹⁶Wañupuqtintaq Samariapi p'ampapurqanku, Israel reykuna p'ampasqa qayllaman.

¹⁷Judá rey Joaspa churin Amasiasqa chunka phisqayoq watataraqmi kawsarqan Israel rey Joakazpa churin Jehoaspa wañupusqan qhepata.

¹⁸Amasiasmanta wakin willakuykunaqa Judá Reykunaq Willakuynin Qelqapi qelqasqan kashan.

¹⁹Jerusalenpin Amasías contra runakuna sayarirqanku, chaymi payqa Lakisman pakakuq ayqekurqan, ichaqa chay llaqtakaman qatipaspanku chaypi wañuchirqanku.

²⁰Chaymantataq caballopi ayata aparqanku, hinaspa Jerusalenpi p'ampapurqanku Davidpa Llaqtan nisqapi ayllunpa aya p'ampananpi.

²¹Chaymantataq llapan Judá runakunaqa Azariasta[2] taytan Amasiaspa rantinpi reyta churarqanku, Azariasqa chunka soqtayoq watallayoqmi karqan.

²²Hinan Azariasqa taytanpa wañukapusqan qhepata Elat llaqtata wakmanta sayarichispa Judá suyuman kutipurqan.

²³Joaspa churin Amasías chunka tawayoq wata kurakña Judá suyupi kamachikushaqtinmi, Jehoaspa churin Jeroboamqa Israelpi kamachikuyta qallarirqan, kamachikurqantaq Samariamanta tawa chunka hukniyoq watata.

²⁴Manapunin Señor Diospa munayninman hinachu ruwarqan, manan t'aqakurqanchu chhikantapas Israelta huchallichiq Nabatpa churin Jeroboampa huchankunamanta.

²⁵Jeroboamqa Israel suyuq qorpankunata kutichikapurqan Hamat Q'asamanta Kachi Qochakama, chaytan Israelpa Diosnin Señorqa Gat-hefer llaqtayoq Amitaipa churin profeta Jonaswan willachisqa.

²⁶Señor Diosmi rikusqa Israel runakunaq llapanku mana ch'ullayoq sinchita muchushasqankuta, manataq pillapas yanapaykuq kasqanta.

²⁷Payqa manan yuyaykusqachu Israelpa sutin kay pachapi ch'usaqyachisqa kananta, chaymi Jeroboamwan Israelta qespichirqan.

²⁸Jeroboammanta wakin willakuykunapas tukuy ruwasqanmantapas, atiyninmantapas, awqankunawan maqanakusqanmantapas, Judá suyuq qechuchikusqan Damascota Hamat-tapas imaynatachus Israel suyuq kutichisqanmantapas, Israel Reykunaq Willakuynin Qelqapi qelqasqan kashan.

²⁹Jeroboam wañupuqtinqa, Israel reykunaq aya p'ampananpi p'ampapurqanku. Chay qhepatataq churin Zakariasqa rantinpi kamachikurqan.