Read Quechua Cuzco Bible 1988 ISKAYKAQ REYES 15 Bible Online

ISKAYKAQ REYES 15 - Quechua Cuzco Bible 1988 bible

ISKAYKAQ REYES 15

¹Iskay chunka soqtayoq wata kurakña Jeroboam Israel suyupi kamachikushaqtinmi, Amasiaspa churin Azariasqa Judá suyupi kamachikuyta qallarirqan,

²chunka soqtayoq watayoq kashaspa, kamachikurqantaq Jerusalenmanta phisqa chunka iskayniyoq watata. Maman Jekoliasqa Jerusalén llaqtayoqmi karqan.

³Azariasqa Señor Diospa munayninman hinan chaninta ruwarqan, taytan Amasiaspa ruwasqanta hinan ruwarqan.

⁴Chaywanpas manan wak dios yupaychana cheqaskunataqa thunirqanchu, chaymi runakunaqa sacrificiota chaypi haywashallarqan, inciensotapas q'osñichishallarqanku.

⁵Señor Diosmi rey Azariasta aycha qaranpi millay onqoywan muchuchirqan wañukapunankama, chaymi payqa sapaqllapi wasinpi tiyakurqan, ruwanankunatataq churin Jotam rantinpi ruwarqan, rey wasipipas suyu kamachiypipas.

⁶Azariasmanta wakin willakuykunapas tukuy ruwasqankunamantapas, Judá Reykunaq Willakuynin Qelqapi qelqasqan kashan.

⁷Azarías wañupuqtinqa, Davidpa Llaqtan nisqapi ayllunpa aya p'ampananpin p'ampapurqanku. Chay qhepatataq churin Jotam rantinpi kamachikurqan.

⁸Kinsa chunka qanchisniyoq wata kurakña Azarías Judá suyupi kamachikushaqtinmi, Jeroboampa churin Zakariasqa Israel suyupi kamachikuyta qallarirqan, Samariamanta soqta killata kamachikurqan.

⁹Manapunin Señor Diospa munayninman hinachu ruwarqan, aswanpas machulankuna hinan ruwarqan. Manan t'aqakurqanchu Israelta huchallichiq Nabatpa churin Jeroboampa huchankunamanta.

¹⁰Jabespa churin Salummi Zakarías contra rimanakurqan, hinaspanmi Ibleampi phawaykuspa wañuchirqan, chaymantataq payqa rantinpi kamachikurqan.

¹¹Zakariasmanta wakin willakuykunaqa Israel Reykunaq Willakuynin Qelqapi qelqasqan kashan.

¹²Chay hinapin hunt'akurqan Señor Diospa rimasqan, paymi Jehuta nisqa: Churiykikunan Israel suyuta kamachinqa nietoykiq nietonkama, nispa.

¹³Kinsa chunka pusaqniyoq wata kurakña Uzías Judá suyupi kamachikushaqtinmi, Jabespa churin Salumqa Israel suyupi kamachikuyta qallarirqan, kamachikurqantaq Samariamanta huk killa hunt'allata.

¹⁴Chaymantataq Gadiq churin Manahemqa Tirsamanta Samariaman wicharqan, hinaspa Salumman phawaykuspan wañurqachirqan, paytaq Salumpa rantinpi kamachikurqan.

¹⁵Salummanta wakin willakuykunapas Zakarías contra rimanakuspa wañuchisqanpas Israel Reykunaq Willakuynin Qelqapi qelqasqan kashan.

¹⁶Chay tiempopin Manahemqa Tirsa llaqtamanta lloqsispa Tifsa llaqtata runankunantinta muyuriqninpi kashaqkunatawan phawaykurqan. Paykuna llaqta punkuta mana kichayta munaqtinkutaq, llaqtata llat'anarqan, onqoq warmikunatapas llapanta wiksanta khallarqan.

¹⁷Kinsa chunka pusaqniyoq wata kurakña Azarías Judá suyupi kamachikushaqtinmi, Gadiq churin Manahemqa Israel suyupi kamachikuyta qallarirqan, kamachikurqantaq Samariamanta chunka watata.

¹⁸Payqa manapunin Señor Diospa munayninman hinachu ruwarqan, manan t'aqakurqanchu Israelta huchallichiq Nabatpa churin Jeroboampa huchankunamanta.

¹⁹Asiria suyu rey Tiglat-pilesermi Israel suyu contra phawaykurqan, chaymi Manahemqa chay reyman qorqan kinsa chunka kinsayoq waranqa kilo qolqeta, payta yanapananpaq kamachikuyninpi qaqa sayananpaqwan.

²⁰Chay llasaq qolqeta Asiria reyman pagananpaqqa Manahemqa kamachikurqanmi Israelpi llapan qhapaq runakuna yaqa huk kilo qolqeta contribucionta paganankupaq. Chay hinapin Asiria reyqa llaqtaman kutipurqan, manaña Israel suyupi qheparqanñachu.

²¹Manahemmanta wakin willakuykunapas tukuy ruwasqankunamantapas Israel Reykunaq Willakuynin Qelqapi qelqasqan kashan.

²²Wañupusqan qhepatataq churin Pekaía rantinpi kamachikurqan.

²³Tawa chunka isqonniyoq wata kurakña Azarías Judá suyupi kamachikushaqtinmi, Manahempa churin Pekaiaqa Israel suyupi kamachikuyta qallarirqan, kamachikurqantaq Samariamanta iskay watata.

²⁴Payqa manapunin Señor Diospa munayninman hinachu ruwarqan, manan t'aqakurqanchu Israelta huchallichiq Nabatpa churin Jeroboampa huchankunamanta.

²⁵Pekaiataqa kikin oficialnillantaqmi Remaliaspa churin Peka pay contra rimanakuspan, Galaad hap'iymanta phisqa chunka qharikunaq yanapasqan reypa wasin pukarapi Pekaiata Argobta Arietawan wañuchirqan, chaymantataq Pekaqa rantinpi kamachikurqan.

²⁶Pekaiamanta wakin willakuykunapas tukuy ruwasqanmantapas Israel Reykunaq Willakuynin Qelqapi qelqasqan kashan.

²⁷Phisqa chunka hukniyoq wata kurakña Azarías Judá suyupi kamachikushaqtinmi, Remaliaspa churin Pekaqa Israel suyuypi kamachikuyta qallarirqan, kamachikurqantaq Samariamanta iskay chunka watata.

²⁸Payqa manapunin Señor Diospa munayninman hinachu ruwarqan, manan t'aqakurqanchu Israelta huchallichiq Nabatpa churin Jeroboampa huchankunamanta.

²⁹Israel suyupi Peka kamachikushaqtinmi Asiria suyu rey Tiglat-pileser Israelman chayarqan, hinaspan munaychakurqan Ijón llaqtata, Abel-bet-maaka llaqtata, Janoa llaqtata, Kedes llaqtata, Hazor llaqtata, Galaad hap'iyta, Galilea hap'iyta, llapan Neftalí hap'iytawan, chay hap'iykunapi tiyaq runakunatataq kamachipaq Asiriaman aparqan.

³⁰Chaymi Elaq churin Oseasqa Remaliaspa churin Peka contra rimanakurqan, hinaspan phawaykuspa wañurqachirqan. Ahinapin Oseasqa Israel suyupi kamachikurqan Pekaq rantinpi, Uziaspa churin Jotam Judá suyupi iskay chunka watata kamachikushaqtin.

³¹Pekamanta wakin willakuykunapas, tukuy ruwasqankunamantapas Israel Reykunaq Willakuynin Qelqapi qelqasqan kashan.

³²Remaliaspa churin Peka wata kurakña Israel suyupi kamachikushaqtinmi, Uziaspa churin Jotamqa Judá suyupi kamachikuyta qallarirqan,

³³iskay chunka phisqayoq watayoq kashaspa. Kamachikurqantaq Jerusalenmanta chunka soqtayoq watata. Maman Jerusaqa Sadokpa ususinmi karqan.

³⁴Jotamqa Señor Diospa munayninman hinan chaninta ruwarqan, taytan Uziaspa ruwasqanta hina.

³⁵Paymi ruwachirqan Señor Dios yupaychana wasiq wichay lado punkunta. Chaywanpas wak'a dios yupaychana cheqaskunaqa manan thunisqachu karqan, chaymi runakunaqa chaypi sacrificiota haywashallarqan, inciensotapas q'osñichishallarqankutaq.

³⁶Jotammanta wakin willakuykunapas tukuy ruwasqankunamantapas Judá Reykunaq Willakuynin Qelqapi qelqasqan kashan.

³⁷Haqay p'unchaykunapin Señor Diosqa Judá suyu contra phawaykunanpaq kacharqan Siria rey Rezinta, Israel rey Remaliaspa churin Pekatawan.

³⁸Jotam wañupuqtinqa, Davidpa Llaqtan nisqapi ayllunpa aya p'ampananpin p'ampapurqanku. Chay qhepatataq churin Ahazqa rantinpi kamachikurqan.