Read Quechua Cuzco Bible 1988 ISKAYKAQ REYES 16 Bible Online

ISKAYKAQ REYES 16 - Quechua Cuzco Bible 1988 bible

ISKAYKAQ REYES 16

¹Remaliaspa churin Peka chunka soqtayoq wata kurakña Israel suyupi kamachikushaqtinmi, Jotampa churin Ahazqa Judá suyupi kamachikuyta qallarirqan,

²iskay chunka watayoq kashaspa. Kamachikurqantaq Jerusalenmanta chunka soqtayoq watata. Payqa manapunin Apu Señor Diosninpa munayninman hinachu ruwarqan. Manan David machulan hinachu ruwarqan,

³aswanpas imatachus Israel reykuna ruwarqan chay hinatan paypas ruwallarqantaq. Wawantapachan sacrificiota haywaspa ruphachirqan, mana iñiq runakunaq millay ruwasqanman hina, chay runakunata Señor Diosqa suyumanta wikch'usqa Israel runakunaq qayllanmanta.

⁴Hinallataq sacrificiokunata haywarqan, inciensotapas q'osñichillarqantaq wak'a dios yupaychana cheqaskunapi, moqokunapi, llapan k'allmasapa sach'a chakikunapi ima.

⁵Chay p'unchaykunan Jerusalenman phawaykuq rirqan Siria rey Rezín, Israel rey Remaliaspa churin Pekapiwan. Hinaspan rey Ahazta muyuykurqanku, ichaqa manan llaqtata munaychakuyta atirqankuchu.

⁶Edom reymi aswanpas Elat llaqtata kutichikapurqan Edom suyupaq. Edom runakunan Elat llaqtaman phawaykurqanku, hinaspa Judá runakunata wikch'uspanku chay llaqtapi tiyaykapurqanku kunan p'unchaykama.

⁷Hinan Ahazqa Asiria rey Tiglat-pileserman willaqkunata kacharqan: Ñoqa kamachiykiqa munayniykipin kani. Chay hinaqa hamuy, hinaspa qespichiway Siria reymanta, Israel reymantapas, paykunan phawaykushawanku, nispa.

⁸Hinallataq Ahazqa Señor Dios yupaychana wasimanta reypa wasinpi qhapaq-kaykunamantawan qolqeta qorita horqospa, Asiria reyman sumaq sonqota apachirqan.

⁹Chaymi Asiria reyqa valekusqanta uyakurqan, hinaspan Damasco contra maqanakuspa atiparqan. Chaypi tiyaq runakunatataq Kir llaqtaman kamachipaq aparqan, Rezintataq wañuchirqan.

¹⁰Rey Ahazqa Asiria rey Tiglat-pileserman tupaq Damasco llaqtata rispanmi, chaypi kashaq altarta rikurqan. Hinaspan sacerdote Uriasman apachirqan huk seq'esqata, imaynatachus altarta ruwananpaq sut'ita willaspa.

¹¹Chaymi Uriasqa altarta ruwarqan imaynatachus rey Ahaz Damascomanta apachispa seq'epi kamachisqanman hina, Damascomanta rey Ahazpa kutimunanpaqqa lliwtañataq tukurqan.

¹²Damascomanta kutipuspataq rey Ahazqa altarta rikuspan asuykurqan, hinaspa chayman wicharqan.

¹³Chaypitaq ruphachina sacrificiota ruru ofrendatawan haywarqan, vino ofrendatapas altar pataman hich'arqan, hinallataq sumaq kawsay sacrificionkuna yawarwan altarta ch'aqchurqan.

¹⁴Señor Dios yupaychana wasi qhawaypi kashaq bronce altartataq Ahazqa hoqarichirqan, hinaspa mosoq altarpa qayllan uma ladoman churachirqan, mosoq altarpa Señor Dios yupaychana wasi chawpipi kasqanrayku.

¹⁵Chay qhepatataq payqa Uriasta kamachirqan: Hatun mosoq altarpin tutamanta ruphachina sacrificiotapas, ch'isi ruru ofrendatapas, reypa ruphachina sacrificiontapas, ruru ofrendantapas, llapa runakunaq ruphachina sacrificionkunatapas, ruru ofrendankunatapas haywanki, hinallataq vino ofrendankunatapas chay pataman hich'anki. Llapan ruphachina sacrificionkunaq yawarninta wak sacrificiokunaq yawarnintapas altar pataman ch'aqchunki. Bronce altartaq ñoqaq watunaypaq kanqa, nispa.

¹⁶Hinan sacerdote Uriasqa Ahazpa kamachisqanta hina lliwta ruwarqan.

¹⁷Chaymantataq rey Ahazqa bronce carretakunata paskarqan qochakunatapas horqorqan. Hinaspa bronce torokuna patapi kashaq hatun qochata horqospa, rumi mast'asqa pataman churarqan.

¹⁸Hinallataq Señor Dios yupaychana wasipi reypa tiyananta churanapaq ruwasqa patatapas, yupaychana wasiman reypa haykunan punkutapas horqorqan, chaykunatan ruwarqan Asiria reyta kusichinanpaq.

¹⁹Ahazmanta wakin willakuykunapas tukuy ruwasqankunamantapas Judá Reykunaq Willakuynin Qelqapi qelqasqan kashan.

²⁰Wañupuqtintaq Davidpa Llaqtan nisqapi ayllunpa aya p'ampananpi p'ampapurqanku. Chay qhepatataq churin Ezekiasqa rantinpi kamachikurqan.