Read Quechua Cuzco Bible 1988 ISKAYKAQ REYES 17 Bible Online

ISKAYKAQ REYES 17 - Quechua Cuzco Bible 1988 bible

ISKAYKAQ REYES 17

¹Chunka hukniyoq wata kurakña Judá suyupi Ahaz kamachikushaqtinmi, Elaq churin Oseasqa Israel suyupi kamachikuyta qallarirqan, kamachikurqantaq Samariamanta isqon watata.

²Payqa manan Señor Diospa munayninman hinachu ruwarqan, ichaqa manan paymanta ñawpaq kaq Israel reykuna hinapunichu huchallikurqan.

³Asiria suyu rey Salmanasarmi rey Oseaswan maqanakurqan, chaymantataq Oseasqa kamachin kapurqan, contribuciontataq pagarqan.

⁴Oseastaq ichaqa Salmanasar contra yuyaykusharqan, chaymi Egipto suyu rey So nisqa sutiyoqman willaqkunata kacharqan, sapa wata paganan contribuciontapas manaña Salmanasarman pagarqanchu. Q'otushasqanta yachaspataq Salmanasarqa Oseasta hap'ispa watay wasiman wisq'arqan.

⁵Chaymantataq suyuntinta munaychakuq phawaykurqan, Samaria llaqtaman chayaspataq chay llaqtata kinsa wata muyuykurqan.

⁶Pusaq wata kurakña Oseas kamachikushaqtintaq, Asiria suyu reyqa Samaria llaqtata hap'irqan, hinaspa Israel runakunata Asiriaman kamachipaq aparqan, hinallataq Halah llaqtapi, Habor mayu qaylla Gozán llaqtapi Medo runakunaq llaqtankunapiwan tiyachirqan.

⁷Israel runakunan Apu Señor Diosninku contra huchallikurqanku, chayrayku paykunataqa chaykunawan muchuchirqan. Señor Diosqa unayñan paykunata Egipto rey Faraonpa atiyninmanta qespichispa Egiptomanta horqomusqa. Chaywanpas Israel runakunaqa wak dioskunatan yupaychasqaku,

⁸paykunaq qayllanmanta Señor Diospa wikch'usqan suyu runakunaq ruwayninkuman hina ruwasqaku, hinallataq Israel reykunaq ruway kamarisqankunatapas.

⁹Israel runakunaqa millay qhelli simikunatan rimasqaku Diosninku Señor contra, hinataq wak'a dios yupaychana cheqaskunata t'aqasqaku suyuntinpi qhawana torremanta qallarispa allin perqasqa llaqtakunakama.

¹⁰Moqo patakunapi llapan k'allmasapa sach'a chakikunapi Asera nisqa diosaq rikch'ayninkunata, yupaychana saywa rumikunata sayarichisqaku.

¹¹Hinaspataq paykunaq qayllanmanta Señor Diospa wikch'usqan runakunaq ruwayninkuman hina wak'a dios yupaychana cheqaskunapi inciensota q'osñichisqaku. Hinallataq sinchi mana chaninta ruwaspa Señor Diosta phiñachisqaku.

¹²Señor Diosqa nisqan: Aman idolokunata yupaychankichischu, nispa, paykunataq ichaqa yupaychashallasqaku.

¹³Señor Diosqa anyachisqan Israel runakunata llapan profetankunawan kamachinkunawanpas: Mana allin ruwayniykichiskunata saqepuychis, hinaspa hunt'aychis unanchayniykunata, lliw kamachikuy simiykunata, machulaykichiskunaman kasukunankupaq yachachisqay lliw simiykunatapas. Chaykunatan kamachiy profetakunawan willachirqaykichis, nispa.

¹⁴Paykunataq ichaqa mana kasukusqakuchu, aswanpas machulanku hinallataq k'ulluchakusqaku, Apu Señor Diosninkuman mana hap'ipakuspa.

¹⁵Kamachikuyninkunatapas machulankuwan rimanakusqantapas anyasqan simikunatapas pisichasqaku. Mana imapaq serviq idolokunata servisqaku, chaymi paykunapas mana serviq kapusqaku. Paykunaqa muyuriqninkupi kashaq runakunaq ruwayninkutan ruwasqaku: Paykuna hinaqa aman ruwankichischu, nispa Señor Dios nishaqtinpacha. Chay hinapin paykunaqa Señor Diospa hark'asqan kaqta ruwasqaku.

¹⁶Apu Señor Diosninkuq tukuy kamachikuyninkunata wikch'upusqaku, hinaspa unuyachispa iskay torokunata, Asera nisqa diosaq rikch'ayninta ruwakusqaku, yupaychallasqakutaq llapan ch'askakunatapas Baal nisqa dioskunatapas.

¹⁷Hinallataq qhari wawankutapas warmi wawankutapas ruphachina sacrificiopi haywasqaku, watuchikuykunata layqakuykunatapas ruwallasqakutaq, Señor Diospa ñawpaqenpi tukuy mana chanin ruwaykunamanmi k'askakusqaku, ahinapin Señor Diosta phiñachisqaku.

¹⁸Chayraykun Señor Diosqa Israel contra k'arakta phiñakuspa llapanta ñawpaqenmanta wikch'urqan. Judá ayllullatañan qhepachirqan,

¹⁹ichaqa Judá runakunapas manan hunt'allarqantaqchu Apu Señor Diosninkuq kamachikusqan simikunata, aswanpas Israel runakunaq ruway kamarisqanta hinallataq ruwarqanku.

²⁰Chaymi Señor Diosqa Israel runakunaq llapan mirayninkunata pisicharqan, k'umuykuchispataq llat'anaqkunaman hap'iykuchirqan qayllanmanta karuman wikch'unankama.

²¹Señor Diosmi Judá ayllumanta Israelta t'aqasqa, hinan Israel runakunaqa Nabatpa churin Jeroboamta reyta churakusqaku. Paymi Israel runakunata sinchita huchallichisqa Señor Diosmantapas t'aqasqa.

²²Chay hinapin Israel runakunaqa kikin Jeroboampa ruwasqan huchakunata ruwashallarqanku, manataq chaykunamanta t'aqakurqankuchu.

²³Chaymi Señor Diosqa ñawpaqenmanta Israelta wikch'upurqan, llapan profetankunawan willachisqanman hina, ahinapin Israel llaqtaqa Asiria suyuman kamachipaq apasqa karqanku, chaypin kunan p'unchaykama kashanku.

²⁴Asiria suyu reymi Babiloniamanta, Kutamanta, Avamanta, Hamatmanta, Sefarvaimmantawan runakunata kacharqan Samariapi kaq llaqtakunapi Israel runakunaq rantinpi tiyanankupaq. Ahinatan Samaria suyuta hap'ikapurqanku, hinaspa llaqtankunapi tiyarqanku.

²⁵Chay runakunaqa tiyayta qallarishaspanku Señor Diosta mana yupaycharqankuchu, chaymi payqa leonkunata kachamurqan, hinan leonkuna wakinninkuta wañuchirqan.

²⁶Hinaqtinmi Asiria reyman willamurqanku: —Samariapi kaq llaqtakunaman tiyanankupaq kachasqayki runakunaqa manan chay suyuq diosninpa kamachikuyninta yachankuchu, chay hawan chay diosqa leonkunata kachamurqan, hinan leonkuna runakunata wañuchishan, nispa.

²⁷Hinan Asiria reyqa kamachikurqan: —Kachaychis preso apamusqaykichis mayqen sacerdotetapas chaypi tiyananpaq, hinaspa chay suyu diospa kamachikuyninta yachachinanpaq, nispa.

²⁸Chaymi Samariamanta presota apasqanku sacerdotekunamanta hukninta kutichimurqanku, hinan chay sacerdoteqa Betelpi tiyarqan, yachachirqantaq runakunaman imaynatachus Señor Diosta yupaychayta.

²⁹Ichaqa sapanka suyun tiyasqanku llaqtapi dioskunata ruwakurqanku, hinaspa Samaria llaqtayoq runakunaq wak'a dios yupaychanan cheqaskunaman chaykunata churarqanku.

³⁰Babilonia runakunaqa diosninku Sukot-benotpa rikch'ayninta ruwakurqanku, Kuta runakunataq diosninku Nergalpa rikch'ayninta,

³¹Ava runakunataq diosninkuna Nabhazpa rikch'ayninta, Tartakpa rikch'aynintawan ruwakurqanku. Sefarvaim runakunataq wawankuta ninapi ruphachirqanku huk sacrificiota hina Adramelek diosninman Anamelek diosninmanwan.

³²Señor Diostapas yupaychallarqankutaqmi, ichaqa paykuna ukhupi tukuy rikch'aq runakunata akllarqanku sacerdote kanankupaq, wak'a dios yupaychana cheqaskunapi servinankupaq.

³³Chay hinaqa, Señor Diostaña yupaychashaspapas, diosninkutaqa yupaychashallarqankupunin hamusqanku llaqtankupi imaynatachus ruwayta yachasqankuman hina.

³⁴Paykunaqa chay ruwayninkuman hinan ruwashallankupuni. Manan Señor Diostaqa yupaychankuchu, manataq Israel sutichasqa Jacobpa mirayninman Señor Diospa qosqan kamachikuykunata, unanchaykunata, yachachikuykunata kasukunkuchu.

³⁵Jacobpa mirayninwan rimanakushaspanmi Señor Diosqa kamachisqa: Aman wak dioskunata yupaychankichischu, aman k'umuykunkichischu, aman servinkichischu, amataq sacrificiotapas haywankichischu.

³⁶Aswanpas ñoqa Señor Diosniykichista yupaychawaychis, ñoqan Egipto suyumanta hatun atiyniywan horqomurqaykichis. Ñoqallamanmi k'umuykuwanaykichis sacrificiotapas haywawanaykichis.

³⁷Hinataq kasukuywan hunt'aychis qelqapi qosqay kamachikuy simiykunata, unanchayniykunata, yachachikuyniykunata, kamachikuyniykunatapas, amataq wak dioskunata yupaychaychischu.

³⁸Ama qonqaychischu qankunawan rimanakusqayta, amataq wak dioskunata yupaychaychischu,

³⁹aswanpas ñoqa Apu Señor Diosnillaykichista hatunchawaychis, hinan awqaykichispa atiyninmanta qespichisqaykichis, nispa.

⁴⁰Chaywanpas manan paykunaqa kasukurqankuchu, aswanpas ñawpa ruwayninkuta kaqllatapuni ruwasharqanku.

⁴¹Chay suyu runakunaqa Señor Diosta yupaycharqankutaq, idolokunatapas yupaychashallarqankutaq. Mirayninkupas machulanku hinallataqmi ruwarqanku, kunan p'unchaykamapas ahinallatapunin ruwashanku.