Read Quechua Cuzco Bible 1988 ISKAYKAQ REYES 18 Bible Online

ISKAYKAQ REYES 18 - Quechua Cuzco Bible 1988 bible

ISKAYKAQ REYES 18

¹Elaq churin Oseas iskay wata kurakña Israel suyupi kamachikushaqtinmi, Ahazpa churin Ezekiasqa Judá suyupi kamachikuyta qallarirqan,

²iskay chunka phisqayoq watayoq kashaspa. Kamachikurqantaq Jerusalenmanta iskay chunka isqonniyoq watata. Maman Abiaqa Zakariaspa ususinmi karqan.

³Ezekiasqa Señor Diospa munayninman hinan chaninta ruwarqan, David machulanpa ruwasqanta hina.

⁴Paymi wak'a dios yupaychana cheqaskunata thunirqan, yupaychana rumi saywakunata ñut'uta p'akirqan, Asera nisqa diosaq rikch'ayninkunata p'akirqan, Moisespa ruwasqan broncemanta mach'aqwaytapas p'akillarqantaq. Chay mach'aqwaymanmi Israel runakunaqa inciensota q'osñichishallarqanku, Nehustantataq suticharqanku.

⁵Ezekiasqa Israelpa Diosnin Señormanmi hap'ipakurqan. Judá suyupi reykunaqa ñawpaqkaqpas qhepakaqpas manan pay hinaqa karqanchu.

⁶Ezekiasqa Señor Diosman k'askan kawsarqan, manataq hayk'aqpas paymanta t'aqakurqanchu, aswanpas Señor Diospa Moisesman kamachisqan simikunatan hunt'arqan.

⁷Chayraykun Señor Diosqa payta yanaparqan, tukuy ima ruwasqankunapas allinpuni karqan. Ezekiasqa Asiria suyu rey contra sayarispanmi paywan mana kamachichikurqanchu.

⁸Hinallataq Filistea runakunata atiparqan Gaza llaqtakama, llaqtankunatapas munaychakurqantaq qhawananku torrekunamanta allin perqasqa llaqtakunakama.

⁹Ezekías kinsa wata kurakña Judá suyupi kamachikushaqtinmi, Elaq churin Oseaspas soqta wata kurakña Israel suyupi kamachikushaqtinmi, Asiria suyu rey Salmanasarqa Samaria llaqta contra hamuspa muyuykurqan.

¹⁰Kinsa wata qhepatataq Samaria llaqtata hap'ikapuspa munaychakurqan, Ezekías Judá suyupi phisqa wata kurakña kamachikushaqtin, Israel rey Oseas pusaq wata kurakña kamachikushaqtin.

¹¹Asiria reyqa Israel runakunata Asiria suyuman kamachipaq aparqan, hinaspa tiyachirqan Halah llaqtapi, Habor mayu qaylla Gozán llaqtapi Medo runakunaq llaqtankunapiwan.

¹²Apu Señor Diosninkuta mana kasukusqankuraykun apasqa karqanku. Paykunaqa Señor Diospa rimanakuynintan p'akirqanku, Señor Diospa kamachin Moisespa willasqan tukuy kamachikuykunatapas manataq kasukurqankupaschu ruwarqankupaschu.

¹³Chunka kinsayoq wata kurakña Ezekías kamachikushaqtinmi, Asiria suyu rey Senakeribqa Judá suyupi llapan allin perqasqa llaqtakunaman phawaykurqan, hinaspa munaychakurqan.

¹⁴Asiria reyqa Lakispin kasharqan, hinan Judá suyu rey Ezekiasqa willaqta kacharqan: Reqsikunin pantasqayta. Suyuymanta ripuy, pagasqaykitaqmi hayk'ata niwaqtiykipas, nispa. Chaymi Asiria suyu reyqa Ezekiasta kamachirqan isqon waranqa isqon pachakniyoq kilo qolqeta, isqon pachak isqon chunkayoq kilo qoritawan pagananpaq.

¹⁵Hinan Ezekiasqa qorqan Señor Dios yupaychana wasimanta, reypa wasinpi qolqe waqaychanamantawan llapan qolqeta.

¹⁶Chaypachan Ezekiasqa Señor Dios yupaychana wasi punkukunapi punku hap'iq kurkukunapi kashaq qori llaphllakunata horqospa, Asiria suyu reyman qorqan. Chay qori llaphllakunataqa pay kikinmi churachisqa.

¹⁷Chay qhepatataq Asiria suyu reyqa Lakismanta Jerusalenpi kashaq rey Ezekiasman kacharqan kinsa qollana oficialninkunata ancha askha soldadokunatawan. Paykunan Jerusalén llaqtaman phawaykuq rirqanku, hinan chayman chayaspanku karpakurqanku Hanaq P'uytumanta lloqsiq yarqha qayllapi, T'aqsaqkunaq Hallp'anman rishaq ñan patapi.

¹⁸Chaymantataq reyta waqyachirqanku, hinan reypa mayordomon Hilkiaspa churin Eliakimqa qelqaqnin Sebnapas, qelqa waqaychaq Asafpa churin Joapiwan paykunawan tupaq rirqanku.

¹⁹Asiria suyu oficialtaq paykunata nirqan: —Willaychis Ezekiasman: Ancha hatun Asiria suyu reymi nin: ¿Imamantaq qanqa hap'ipakushanki?

²⁰Qanqa ninkin: Maqanakuypaq allin wakichisqan kashani, kanmi askha soldadoypas tupapakunaypaq, nispayki. Chayqa yanqa rimayllan, ¿pimantaq qanri hap'ipakushanki ñoqa contra sayarispayki?

²¹Egipto suyumanmi hap'ipakushanki, riki. Qhawariy, chay hap'ipakusqayki suyuqa ch'eqtasqa soqos hinan, pipas tawnaykukuqtaqa makintan t'urpunqa, t'urpuspataq patamanraq lloqsinqa. Chay hinan Egipto rey Faraonqa llapan payman hap'ipakuqkunapaq.

²²Icha niwankichispaschá: Ñoqaykuqa Apu Señor Diosniykumanmi hap'ipakuyku, nispa. Qhawariychis, ¿manachu Ezekiasqa Diosniykichis yupaychana cheqaskunata altarkunatapas thunipurqan? ¿Manachu kamachirqan Judá runakunata Jerusalén llaqta runakunatapas: Jerusalén llaqta altarllapin yupaychankichis, nispa?

²³Chay hinaqa Asiria suyu rey wiraqochaymi Ezekiasta nin: Iskay waranqa caballokunata qoykiman chaypas, ¿akis mana iskay waranqa sillakuqkunata churawaqchu?

²⁴Chayri, ¿imaynataq qanqa atipawaq huk oficialniyta mana kasuyllaña kashaqtinpas? ¡Qanqa Egiptomanta carretakunata caballería soldadokunallatan qhawarayashanki!

²⁵¡Señor Dios niwaqtinmi kay suyuta thuniqqa hamuni, mana chayqa manachá hamuymanchu! ¡Paymi kamachiwarqan phawaykunaypaqpas thuninaypaqpas! nispan, nispa.

²⁶Hinan Eliakimqa Sebnapiwan Joapiwan Asiria suyu oficialman kutichirqanku: —Valekuykikun, Arameo simipi rimaykuwayku, ñoqaykuqa yachaykun chay simita. Ama Hebreo simipiqa rimawaykuchu, perqa patapi kashaq llapan runakunan uyarishanku, nispa.

²⁷Asiria suyu oficialtaq ichaqa nirqan: —Wiraqochayqa manan kamachiwarqan kay simikunata reyniykichisman qankunamanwan willanallaypaqchu, aswanpas perqa patapi kashaq runakunamanwan willanaypaqmi, qankunapas paykunawan kuskan hatun hisp'ayniykichista mikhukunkichis, unu hisp'ayniykichistapas ukyakunkichis, nispa.

²⁸Sayaykuspataq aswan kunkayoqta Hebreo simipi qaparirqan:

²⁹—Ancha hatun Asiria reypa nisqanta uyariychis: Ama Ezekiaswan q'otuchikuychischu. Payqa manan makiymanta qespichisunkichismanchu,

³⁰Señor Diosman hap'ipakunaykichista munaspa Ezekías nisunkichis: Señor Diosninchismi qespichiwasun, payqa manan munanqachu Asiria suyu rey kay llaqtata munaychakunanta, nispa chayqa, ama sonqoykichista suwachikuychischu, nispa.

³¹Chay hinaqa ama Ezekiasta kasuychischu, Asiria reymi nin: Ñoqawan allipunaychis, hinaspa hamuwaychis. Sapankaykichistaq mikhunkichis uvasniykichista, higosniykichistapas, p'uytuykichis unutapas ukyankichis.

³²Chaymantataq hallp'aykichisman rikch'akuq wak hallp'aman apasqaykichis. Chaypin kan trigo chakrapas, uvas chakrapas, olivos chakrapas, t'antapas upi vinopas, miel misk'ipas. Ahinapin kawsankichis, manataq wañunkichischu. Ezekiastaqa ama kasuychischu, payqa yanqan q'otusunkichis: Señor Diosmi qespichiwasunchis, nispan.

³³Manan wak llaqtakunaq diosninkupas ñoqa Asiria reypa atiyniymantaqa suyunta qespichiyta atirqanchu.

³⁴¿Maypitaq Hamatpa Arfadpa diosninkunapas? ¿Maypitaq Sefarvaimpa, Henaq, Ivaq diosninkunapas? ¿Qespichirqanchu chay dioskuna Samariata atiyniymanta?

³⁵¿Chay suyukunaq llapan diosninkunamanta mayqennintaq atiyniymanta suyunta qespichirqan? ¿Chaychu kunan Jerusalenta Señor Dios qespichinman? nispa, nispan.

³⁶Hinan runakunaqa ch'inlla karqanku, manataq huk simitapas kutichirqankuchu, reymi kamachisqa: Aman ima nispapas kutichinkichischu, nispa.

³⁷Chaymantataq reypa mayordomon Eliakim, qelqaq Sebna, qelqa waqaychaq Joapiwan p'achankuta llakikuymanta llik'ikurqanku, hinaspa Ezekiasman rispa Asiria suyu qollana oficialpa rimasqanta willarqanku.