Read Quechua Cuzco Bible 1988 ISKAYKAQ REYES 2 Bible Online

ISKAYKAQ REYES 2 - Quechua Cuzco Bible 1988 bible

ISKAYKAQ REYES 2

¹Eliastaq muyuq wayrapi hanaq pachaman Señor Diospa hoqaripunanña kashaqtin, Eliseopiwan Gilgalmanta risharqanku.

²Hinan Eliasqa Eliseota nirqan: —Kaypi qhepakuy, Señor Diosmi Betelman rinaypaq kamachiwan, nispa. Eliseotaq kutichirqan: —Señor Diosraykun qanraykun jurani manan qhepaymanchu, nispa. Hinan Betelman kuska rirqanku.

³Betelpi tiyaq profetakunataq Eliseowan tupaq lloqsimuspanku payta nirqanku: —¿Yachankichu wiraqochaykita qayllaykimanta Señor Diospa apakapunanta? nispa. Eliseotaq kutichirqan: —Arí, yachaniñan, ch'inlla kaychis, nispa.

⁴Eliasqa wakmanta Eliseota nirqan: —Kunanqa kaypi qhepakapuy, Señor Diosmi Jericoman rinaypaq kamachiwan, nispa. Paytaq kutichirqan: —Señor Diosraykun qanraykun jurani, manan qhepaymanchu, nispa. Hinan Jericoman kuska rirqanku.

⁵Jericopi tiyaq profetakunataq Eliseoman qayllaykuspa nirqanku: —¿Yachankichu wiraqochaykita qayllaykimanta Señor Diospa apakapunanta? nispa. Eliseotaq kutichirqan: —Arí, yachaniñan, ch'inlla kaychis, nispa.

⁶Hinamantataq Eliasqa Eliseota nirqan: —Kaypi qhepakapuy, Señor Diosmi Jordanman rinaypaq kamachiwan, nispa. Paytaq kutichirqan: —Señor Diosraykun qanraykun jurani, manan qhepakuymanchu, nispa. Chaymi iskayninku kuskallapuni risharqanku.

⁷Jericopi tiyaq phisqa chunka profetakunataq qhepankuta rirqan. Eliastaq Eliseopiwan Jordán mayu pataman chayaspa sayaykuqtinku, profetakunaqa paykunaq as qhepaneqninpi sayaykullarqantaq.

⁸Hinan Eliasqa capanta k'uyurqan, hinaspa chaywan mayuta waqtaykurqan, chaymi unuqa iskay ladoman t'aqakurqan, iskayninkutaq ch'akinta chimparqanku.

⁹Chimpaspankuñataq Eliasqa Eliseota nirqan: —Manaraq qayllaykimanta hoqarisqa kashaqtiy, mañakuway imatachus qanpaq ruwanayta, nispa. Paytaq nirqan: —Valekuykin atiyniykiwan kallpachawanaykita qanpa rantiykipi qhepanaypaq, nispa.

¹⁰Eliastaq nirqan: —Sinchi sasatan mañakunki, ichaqa qayllaykimanta hoqarisqa kasqayta rikunki chayqa chaskinkin, mana hinaqa, manan chaskinkichu, nispa.

¹¹Iskayninku parlaspa rishaqtinkutaq, huk nina carreta nina caballokunantin chawpinkuman haykuspa t'aqarqan. Hinan Eliasqa huk muyuq wayrapi hanaq pachaman wicharipurqan.

¹²Eliseotaq chayta rikuspa qaparirqan: ¡Taytalláy! ¡Taytalláy! ¡Qanqa Israelpa atiyniyoq hark'aykuqninmi karqanki! nispa. Eliseoqa manan hayk'aqpas Eliasta rikurqanñachu. Payqa llakikuymantan p'achanta hap'ispa iskayman llik'irqan.

¹³Chaymantataq Eliseoqa Eliaspa urmaqaq capanta hoqarispa kutipurqan, Jordán mayu patapitaq sayaykurqan.

¹⁴Hinaspanmi Eliaspa capanwan unuta waqtaykuspa nirqan: ¿Maypin kashan Eliaspa Apu Señor Diosninqa? nispa. Waqtaykuqtin hinan unuqa iskayman t'aqakurqan, chaymi Eliseoqa ch'akinta chimparqan.

¹⁵Chimpapi qhepaq Jericomanta profetakunataq chayta rikuspanku nirqanku: Eliaspa atiyninmi Eliseopi qhepapun, nispa. Chaymi Eliseota chaskiq rirqanku, qayllaykuspataq ñawpaqenpi qonqorikurqanku.

¹⁶Hinaspa nirqanku: —Qhawariy, ñoqayku kamachiykiwanmi kashan kallpayoq phisqa chunka qharikuna, chay hinaqa, kachasun wiraqochayki maskhaqta. Paqtan Señor Diospa Espiritun hoqarispa mayqen orqomanpas wayq'omanpas wikch'unman karqan, nispa. Eliseotaq kutichirqan: —Ama kachaychischu, nispa.

¹⁷Sinchita rimapayaqtinkutaq Eliseoqa uyakurqan, hinaspa: —Kachaychis, nirqan. Paykunataq kacharqanku phisqa chunka qharikunata, hinan paykunaqa kinsa p'unchay maskhamuspa mana tarimurqankuchu.

¹⁸Chaymi Jericó llaqtapi Eliseoman kutimpurqanku, Eliseotaq paykunata nirqan: —Ñoqaqa “ama riychischu” nirqaykichismi, nispa.

¹⁹Chay llaqta runakunataq Eliseota nirqanku: —Qhawariy, kay llaqtaq kasqan cheqasqa ancha allinmi qan wiraqochaykuq rikusqayki hinapas, ichaqa unun mana allinchu, chaymi warmikunata sulluchin, nispa.

²⁰Eliseotaq nirqan: —Huk mosoq p'ukupi kachita churaykuspa apamuwaychis, nispa. Hinan paykunaqa aparqanku.

²¹Eliseotaq unu pukyuman rispan, kachiwan hich'aykuspa, nirqan: —Señor Diosmi nin: Ñoqan unu pukyuta ch'uyanchani, kunanmantaqa manan pitapas wañuchinqapaschu sulluchinqapaschu, nispan, nispa.

²²Chaymantapachan unuqa Eliseoq nisqanman hina allin kapurqan.

²³Chay qhepatataq Eliseoqa Jericomanta Betelman rirqan. Ñanta wichashaqtintaq llaqtamanta waynachakuna lloqsispanku Eliseota k'amirqanku: —¡Yaw q'ara uma, lloqsiy kaymanta! ¡Yaw q'ara uma, lloqsiy kaymanta! nispanku.

²⁴Eliseotaq qhepanta qhawarikuspa rikurqan, hinan Señor Diospa sutinpi ñakarqan. Chaymantataq sach'a-sach'amanta iskay ukumarikuna lloqsirqamuspan chay waynachakunamanta tawa chunka iskayniyoqta llik'irqarirqan.

²⁵Betelmantan Eliseoqa Carmelo orqoman rirqan, chaymantataq Samaria llaqtaman kutimpurqan.