Read Quechua Cuzco Bible 1988 ISKAYKAQ REYES 24 Bible Online

ISKAYKAQ REYES 24 - Quechua Cuzco Bible 1988 bible

ISKAYKAQ REYES 24

¹Joakimpa kamachikusqan tiempopin Babilonia rey Nabukodonosorqa Judá suyuta munaychakuq phawaykurqan, chaymi Joakimqa kinsa wata payta servirqan. Chaymantataq huk-hinata yuyaykuspa Nabukodonosor contra sayarirqan.

²Ichaqa Señor Diosmi Joakim contra kachamurqan t'aqa-t'aqa llat'anaqkunata, paykunan karqan Babiloniamanta, Siriamanta, Moabmanta, Amonmantawan. Chaykunatan Señor Diosqa kachamurqan Judata ch'usaqyachinanpaq, kamachin profetakunawan willachisqanman hina.

³Señor Diosqa yuyaykurqanmi ñawpaqenmanta Judá runakunata wikch'upuyta Manasespa tukuy huchankuna hawa, mana huchayoq runakunata wañuchisqan hawa, chayraykun llat'anaqkunata kacharqan. Manasesmi Jerusalenpi runakunata wañuchispa hinantinpi yawarta hich'asqa, manataqmi Señor Diosqa payta pampachayta munarqanchu.

⁵Joakimmanta wakin willakuykunapas tukuy ruwasqanmantapas Judá Reykunaq Willakuynin Qelqapi qelqasqan kashan.

⁶Wañupuqtinqa churin Joakinmi rantinpi kamachikurqan.

⁷Chaymantapachan Egipto suyu reyqa manaña hayk'aqpas suyunmanta lloqsirqanchu, Babilonia suyu reymi tukuy hallp'ankunata hap'ikapurqan Egipto wichay qorpa mayumanta Eufrates mayukama.

⁸Joakinqa chunka pusaqniyoq watayoqmi karqan kamachikuyta qallarishaspa, kamachikurqantaq Jerusalenmanta kinsa killata. Maman Nehustaqa Jerusalenmanta Elnatanpa ususinmi karqan.

⁹Joakinqa manapunin Señor Diospa munayninman hinachu ruwarqan, aswanpas taytan hinan ruwarqan.

¹⁰Haqay p'unchaykunapin Babilonia rey Nabukodonosorpa soldadonkuna Jerusalén llaqta contra rirqanku hinaspa muyuykurqanku.

¹¹Llaqtata soldadokuna muyuykushaqtintaq, rey Nabukodonosorqa chayarqan.

¹²Hinan Judá rey Joakinpas, mamanpas, oficialninkunapas, uma runakunapas, yuyaychaqninkunapas Babilonia reypa qayllanpi huch'uyyakapurqanku. Chaymi Nabukodonosorqa qanchis wata kurakña kamachikushaspan Joakinta presota hap'irqan.

¹³Chaymantataq Señor Dios yupaychana wasimanta reypa wasinmantawan llapan chaypi kaq qhapaq-kaykunata aparqan, hinallataq Señor Dios yupaychana wasipaq Israel rey Salomonpa ruwachisqan qorimanta llapan serviciokunata p'akirqan, Señor Diospa willasqanman hina.

¹⁴Chay qhepatataq Jerusalenpi tiyaq chunka waranqa runakunata kamachipaq aparqan, chaykunan karqan llapan uma runakuna, allinnin soldadokuna llapan herrerokuna artesanokuna ima. Chaymi Judá suyupiqa sinchi wakcha runakunallaña qheparqan.

¹⁵Hinallataq Nabukodonosorqa Babiloniaman aparqan rey Joakinta, mamanta, warminkunata, oficialninkunata, suyupi umallikunata ima.

¹⁶Apallarqantaq kamachipaq qanchis waranqa llapan qhapaqkunata, artesanokunatawan herrerokunatawantaq waranqata, paykunan karqanku allin kallpasapa maqanakuyman rinanpaqpas kusallaña.

¹⁷Chaymantataq payqa Joakinpa tion Mataniasta paypa rantinpi reyta churarqan, suticharqantaq Sedekías sutiwan.

¹⁸Sedekiasqa iskay chunka hukniyoq watayoqmi karqan kamachikuyta qallarishaspa, kamachikurqantaq Jerusalenmanta chunka hukniyoq watata. Maman Hamutalqa Libnamanta Jeremiaspa ususinmi karqan.

¹⁹Sedekiasqa manapunin Señor Diospa munayninman hinachu ruwarqan, aswanpas Joakim hinan ruwallarqantaq.

²⁰Jerusalén runakunapas Judá runakunapas sinchitapuni Señor Diosta phiñachirqanku, chaymi payqa ñawpaqenmanta wikch'urqan.