Read Quechua Cuzco Bible 1988 ISKAYKAQ REYES 25 Bible Online

ISKAYKAQ REYES 25 - Quechua Cuzco Bible 1988 bible

ISKAYKAQ REYES 25

¹Chaymantataq Sedekiasqa Babilonia rey contra sayarirqan. Hinan pusaq wata kurakña Sedekías kamachikushaqtin, chunkakaq killaq chunka p'unchayninpi, rey Nabukodonosorqa llapan soldadontin Jerusalén contra puririrqan, hinaspan llaqta qhawaypi karpakurqanku. Llaqta muyuriqpitaq hark'achita ruwarqanku runakuna mana ayqenanpaq.

²Jerusalenqa muyuykusqa karqan Sedekiaspa chunka hukniyoq wata kamachikuyninkaman.

³Chay kikin watapi tawakaq killaq isqon p'unchayninpin chay llaqtata sinchita yarqay muchuchirqan, manañataq mikhunankupaq kapurqanñachu.

⁴Chaypachan Babilonia soldadokuna llaqta perqata q'asarqanku, chaymi Sedekiasqa soldadokunantin reypa huertan qaylla iskaynin perqa tupay punkunta lloqsirqospa tuta ayqekurqanku, hinaña awqa soldadokuna llaqta muyuriqpi kashaqtinpas, Jordán qheswa wayq'oman ripurqanku.

⁵Babilonia soldadokunataq ichaqa rey Sedekiasta qatiparqanku, hinaspa Jericó pampapi payman tariparqorqanku. Llapan soldadonkunataq hinantinman ch'eqeripurqan.

⁶Babilonia soldadokunataq Sedekiasta presota hap'ispanku Hamat suyupi Ribla llaqtapi kaq Babilonia reyman aparqanku. Chaypin Nabukodonosorqa kamachikurqan Sedekiaspaq imachus kananta.

⁷Hinan pay rikukushaqtin churinkunata wañuchirqanku, Sedekiastataq ñawinta horqorqanku, hinaspa bronce cadenawan watasqata Babiloniaman apachirqanku.

⁸Babilonia rey Nabukodonosor chunka pusaqniyoq wata kurakña kamachikushaqtinmi, phisqakaq killaq qanchis p'unchayninpi reypa guardian umalli Nabuzaradanqa Jerusalenman chayarqan, paymi reypa yuyaychaqnin karqan.

⁹Hinaspa ruphaykachirqan Señor Dios yupaychana wasita, reypa wasinta, llapan allichachaq wasikunata, wakin wasikunatapas.

¹⁰Paypa kamachisqan Babilonia soldadokunataq Jerusalén llaqta muyuriq perqata thunirqan.

¹¹Hinallataq Nabuzaradanqa Babiloniaman presota aparqan llaqtapi qhepaq runakunata. Babilonia reyman huñukuq runakunata, wakin runakunatawan.

¹²Sinchi wakcha runakunallata saqerqan uvas chakrakunatapas wak chakrakunatapas llank'anankupaq.

¹³Babilonia soldadokunaqa yupaychana wasipi kaq broncemanta tusakunata, carretakunata, unu qochata ima p'akirqanku, hinaspan llapan chaykunata, Babiloniaman aparqanku.

¹⁴Apallarqankutaq uspha mankakunata, palakunata, pábilo allichanakunata, pocillokunata, Señor Dios yupaychana wasipi broncemanta llapa kaqkunatawan.

¹⁵Reypa guardian umallipas apallarqantaq qorimanta qolqemanta llapan incienso q'osñichinakunatapas puruñakunatapas.

¹⁶Señor Dios yupaychana wasipaq rey Salomonpa ruwachisqan iskaynin tusakunapas unu qochapas carretakunapas sinchi llasan karqan, mana pesay atiy.

¹⁷Sapanka tusakunan sayayninman yaqa isqon metro karqan, uma puntapitaq broncemanta huk pillu karqan, iskay metro yapasqa sayayniyoq. Chaypa muyuriqnintaq broncemanta awasqa karqan bronce granadawan sumaqchasqa. Iskaynin tusakunaqa kaqkaman karqan.

¹⁸Babilonia reypa guardian umalliqa presota hap'irqan uma sacerdote Seraiasta, payman qatiq sacerdote Sofoniasta, yupaychana wasi punku qhawaq kinsa runakunatawan.

¹⁹Llaqta runakunamantataq presota hap'irqan soldadokunaq umallinta, llaqtapi kashaq reypa yuyaychaqnin phisqa qharikunata, soldadopaq huñuq umallita, soqta chunka runakunatawan.

²⁰Llapan chaykunatan Nabuzaradanqa aparqan Hamat suyupi Ribla llaqtapi kaq Babilonia reyman. Chaypin Babilonia reyqa chay runakunata hasut'ichirqan, hinaspa sipichirqan. Chay hinatan Judá suyu runakunaqa llaqtankumanta apasqa karqanku.

²²Babilonia rey Nabukodonosorqa Safanpa churin Ahikampa churin Gedaliasta churarqan Judapi saqesqan runakunata kamachinanpaq.

²³Hinan Judá suyupi ejército oficialkunaqa soldadonkunapiwan Gedaliasta llaqta kamachiqpaq Babilonia rey churasqanta yachaspanku, Mizpata rirqanku Gedaliaswan tupaq. Kaykunan rirqanku: Netaniaspa churin Ismael, Kareaq churin Johanán, Netofamanta Tanhumetpa churin Seraías, Maaka runaq churin Jaazniaspiwan, sapanka soldadontinkama.

²⁴Hinan Gedaliasqa paykunaman juraspa nirqan: —Ama Babilonia oficialkunata manchakuychischu, tiyallankichismi kay suyupiqa, Babilonia reyta serviychis, allillanmi kankichis, nispa.

²⁵Qanchiskaq killapitaq ichaqa Judá reypa ayllunmanta kaq Elisamaq churin Netaniaspa churin Ismaelqa chunka qharikunapiwan Mizpa llaqtata chayarqan, hinaspa Gedaliasta wañurqachirqanku, hinallataq paywan kashaq Judá runakunatapas Babilonia runakunatapas.

²⁶Chaymi llapan runakuna, huch'uypas hatunpas, ejército oficialkunapiwan Egipto suyuman ripurqanku, Babilonia runakunata manchakuspanku.

²⁷Evil-merodakpa Babiloniapi kamachikuyta qallarisqan watapin Judá rey Joakinta carcelmanta horqorqan. Chaymi karqan Judá rey Joakinpa preso kasqan kinsa chunka soqtayoq wataq chunka hukniyoq killan iskay chunka qanchisniyoq p'unchaypi.

²⁸Evil-merodakqa sumaqtan Joakinta rimaykurqan, hinallataq Babiloniapi paywan kashaq reykunamantapas aswan allinta qhawarirqan.

²⁹Hinan Joakinqa preso kasqan p'achanta ch'utikurqan, reypa wasinpitaq mikhurqan wañukapunan p'unchaykama.

³⁰Sapa p'unchaymi Babilonia reyqa Joakinman kawsananpaq qorqan wañukapunan p'unchaykama.