Read Quechua Cuzco Bible 1988 ISKAYKAQ REYES 3 Bible Online

ISKAYKAQ REYES 3 - Quechua Cuzco Bible 1988 bible

ISKAYKAQ REYES 3

¹Rey Josafat Judapi chunka qanchisniyoq wata kurakña kamachikushaqtinmi, Ahabpa churin Joramqa Samariamanta Israel suyupi kamachikuyta qallarirqan, chunka iskayniyoq watataq kamachikurqan.

²Payqa manapunin Señor Diospa munayninman hinachu ruwarqan, ichaqa manan tayta-mamankuna hinapunichu, aswanpas wikch'urqanmi taytanpa ruwachisqan Baal nisqa dios yupaychana saywa rumita.

³Chaywanpas Israelta huchallichiq Nabatpa churin Jeroboampa ruwasqantan ruwarqan, manataq chaymanta t'aqakurqanchu.

⁴Moab rey Meshaqa oveja haciendayoqmi karqan. Paymi Israel reyman sapa wata pagaq pachak waranqa borregokunata, pachak waranqa anejoq millmantawan.

⁵Ahab wañupuqtintaq ichaqa Moab reyqa Israel rey contra hatarirqan.

⁶Hinan rey Joramqa Samariamanta lloqsispa Israelpi kaq llapan soldadonkunata wakichirqan.

⁷Hinallataq Judá rey Josafatman kacharqan: —Moab reymi ñoqa contra hatarin. ¿Payman phawaykuqtiy yanapawankimanchu? nispa. Josafat-taq kutichirqan: —Arí, riysisqaykin. Ñoqapas ejercitoypas caballería soldadoykunapas huk nisqan kashayku qanwanpas runaykikunawanpas.

⁸¿Mayqen ñannintataq phawaykuq risun? nispa. Joramtaq kutichirqan: —Edompa ch'inneq ñannintan risun, nispa.

⁹Hinan Israel reypas Judá reypas Edom reypas rirqanku. Qanchis p'unchay muyurispa purishaqtinkutaq, unu pisirqan soldadokunapaqpas carga uywakunapaqpas.

¹⁰Chaymi Israel reyqa nirqan: —¡Ay! ¡Señor Diosqa kinsantinchistan pusamuwasqanchis Moab runakunaman hap'ichiwananchispaq! nispa.

¹¹Josafat-taq ichaqa nirqan: —¿Manachu kaypi Señor Diospa profetan kan paywan Señor Diosta tapuchinanchispaq? nispa. Chaymi Israel reypa huk oficialnin nirqan: —Kashanmi Safatpa churin Eliseo, paymi Eliaspa kamachin karqan, nispa.

¹²Josafat-taq nirqan: —Payqa Señor Diospa simintapunin willan, nispa. Hinan kinsantin reykunaqa Eliseoqta rirqanku.

¹³Eliseotaq Israel reyta nirqan: —¿Imataq qanri ñoqawan ruwanayki? Phaway, taytaykiq mamaykiq profetankunata tapukamuy, nispa. Israel reytaq kutichirqan: —¡Manan! Señor Diosmi kinsantiykuta huñuykuwanku, Moab runakunaman hap'ichinawankupaq, nispa.

¹⁴Hinan Eliseoqa nirqan: —Tukuy-atiyniyoq Señor Diospa kamachinmi kani, paypa sutinpin jurani, manachus Judá rey Josafat kaypi kanman chayqa, manan qantaqa chhikantapas qhawariykimanchu.

¹⁵Chay hinaqa pusamuwaychis arpa tocaqta, nispa. Arpa tocaq tocashanankamataq Señor Diospa atiynin Eliseota hunt'aykurqan,

¹⁶hinan payqa nirqan: —Señor Diosmi nin: Askha yarqhakunata kay wayq'opi hasp'iychis.

¹⁷Manan kanqachu wayrapas parapas, kay wayq'opin ichaqa askha unu phawanqa, hinan qankuna, soldadoykichiskuna, carga uywaykichiskuna, wak uywaykichiskunapas ukyankichis, nispa.

¹⁸Chaywanpas chaykunaqa pisiraqmi Señor Diospaqqa, payqa Moab runakunatan qankunaman hap'ichisunkichis.

¹⁹Alto perqayoq llapan llaqtankunatapas sumaq llaqtankunatapas thuninkichis, llapan allin ruruq sach'ankunatapas wit'unkichis, llapan unu pukyunkunatapas purunyachinkichis, llapan allin ruruq chakrankunatapas rumiwanmi hunt'achinkichis, nispa.

²⁰Qhepantin paqartaq sacrificio hayway horasta Edom ladomanta unu phawarqan, hinantinmantaq hunt'arqan.

²¹Moab runakunataq paykunawan maqanakuq reykuna hamushasqanta yachaspa, huñurqanku maqana hap'iy atiq llapan qharikunata waynamanta machukama, chaykunatataq qorpanku waqaychaqta churarqan.

²²Qhepantin paqartaq Moab runakuna hatarishaqtinku unuta inti k'anchaykurqan, hinan paykunaqa karumanta puka unuta yawarta hina rikurqanku.

²³Chaymi ninakurqanku: —¡Qhawariy haqayqa yawarmi! Reykunachá paykunapura maqanakuspanku wañurqachinakunku. ¡Chay hinaqa, Moab runakuna, haku llat'anamusun! nispa.

²⁴Paykuna Israel runakunaq karpankuman chayaqtinkutaq, Israel runakunaqa paykunaman phawaykurqanku hinaspa ayqechirqanku, chaymi qatispanku wañuchirqanku.

²⁵Hinallataq llaqtankunatapas thunirqanku, llapan allin ruruq chakrakunamanpas sapanka qhari rumita wikch'uykurqan hunt'anankama, unu pukyukunatapas llapanta purunyachirqanku, allin ruruyoq sach'akunatapas llapanta wit'urqanku. Kir-hareset llaqtallan mana thunisqa qheparqan, warak'aqkunataq ichaqa muyuykuspa phawaykurqanku.

²⁶Hinan Moab reyqa atipasqa kasqanta rikukuspa, espadawan maqanakuq qanchis pachak qharikunata akllarqan, Siria reyman ayqenanpaq ichaqa manan atirqankuchu.

²⁷Chaymi phiwi churinta hap'ispa perqa patapi ruphachina sacrificiota haywarqan, chay churinmi rantinpi kamachikunanpaq kasharqan. Israel runakuna contrataq sinchita phiñakurqanku, chaymi Israel runakunaqa chaymanta ripuspanku llaqtankuman kutipurqanku.