Read Quechua Cuzco Bible 1988 ISKAYKAQ REYES 5 Bible Online

ISKAYKAQ REYES 5 - Quechua Cuzco Bible 1988 bible

ISKAYKAQ REYES 5

¹Naamanmi karqan Siria suyu reypa ejerciton umalli. Paywanmi Señor Diosqa Siria suyuta qespichirqan, chaymi reyqa payta ancha allinta hap'irqan munakurqantaq. Naamanqa atiyniyoq qharin karqan, ichaqa aycha qaranpi millay onqoyniyoqmi karqan.

²Huk kutinmi Siria runakunaqa Israel suyuman llat'anaq phawaykuspa huk sipaschata hap'ispa aparqanku, hinan qhepakurqan Naamanpa warminpa muchachan.

³Chay sipaschan patronanta nirqan: —Samariapi kashaq profetaman patronniy rinman chayqa, aycha qaranpi millay onqoyninmanta qhaliyapunmanmi, nispa.

⁴Hinan Naamanqa reyninman rispa sipaspa nisqanta willarqan.

⁵Chaymi Siria suyu reyqa nirqan: —Allinmi. Phaway riy, ñoqaña Israel reyman cartatawan apachisqayki, nispa. Hinan Naamanqa rispa aparikurqan kinsa chunka waranqa qolqeta, soqta waranqa qorimanta qolqeta, chunka sayay p'achatawan.

⁶Apallarqantaq cartatapas Israel reypaq, chay cartapin nirqan: —Kay qelqatan apachimuyki ejercitoy umalli Naamanta aycha qaranpi millay onqoyninmanta qhaliyachinaykipaq, nispa.

⁷Israel reytaq chay cartata leespa mancharikuymanta p'achanta llik'ikurqan, nirqantaq: —¿Ñoqari Dioschu kani? ¿Ñoqari atinichu runata kawsachiyta kawsayninta qechuytapas? ¿Imanaqtinmi chay runaqa onqosqa runata qhaliyachinaypaq kachamuwan? ¡Reparaychis allinta, awqallikuytan maskhashan! nispa.

⁸Profeta Eliseotaq uyarirqan Israel rey chay carta hawa p'achanta llik'ikusqanta, chaymi willaqta kacharqan: —¿Imanaqtintaq p'achaykita llik'ikunki? Kachamuway chay runata, hinaspa Israelpi profeta kashasqanta yachanqa, nispa niqta.

⁹Hinan Naamanqa Eliseoman rirqan carretantin caballokunantin ima, chayaspataq wasin punkupi sayaykurqan.

¹⁰Eliseotaq kamachinwan nichirqan: —Phaway Jordán mayuta, hinaspa chaypi qanchis kutita bañakamuy, hinaspa aycha qarapi millay onqoyniykimanta qhaliyapunki, nispa.

¹¹Naamantaq ichaqa sinchi phiñasqa kutipuspa nirqan: —Ñoqaqa yuyarqani lloqsimuspa chaskiwanantan, hinaspa sayaykuspa Apu Señor Diosninmanta mañakunanta, chaymantataq makinwan aycha qaraypi millay onqoyniy cheqasta llamiykuwananta, ahinapi onqoyniymanta allinyapunayta.

¹²Chaypaqqa kakushanmá Damasco llaqta Abana mayupas Farfar mayupas, chaykunan aswan allin Israelpi llapan mayukunamantaqa. Chay mayukunapichá bañakushayman onqoyniymanta qhaliyanaypaqqa, nispa. Hinaspan payqa sinchi phiñasqa kutiripurqan.

¹³Kamachinkunan ichaqa payman qayllaykuspa nirqanku: —Wiraqochayku, ima sasa ruwanataña profeta kamachisunkiman chaypas, ¿manachu kasukuwaq? Chay hinaqa: Bañakamuy qhaliyasqa kanaykipaq, nishaqtinqa, ¿imaynataq manaqa bañakamuwaqchu? nispa.

¹⁴Hinan Naamanqa Jordán mayuta rirqan, chaypitaq qanchis kutita unuman chinkaykurqan, profetaq kamachisqanman hina, chaymi aychanqa wawaq aychanman hina tukurqan, qhaliyasqataq kapurqan.

¹⁵Chaymantataq payqa llapan riysiq masinkunapiwan Eliseoman kutirqan. Chayaspataq Naamanqa nirqan: —¡Kunanqa yachanin kay pachantinpi Israelpa Diosnin payllapuni Dios kasqanta! Chay hinaqa, valekuykin sumaq sonqo apamusqayta chaskiykunawaykita, nispa.

¹⁶Eliseotaq ichaqa kutichirqan: —Señor Diospa kamachinmi kani, paypa sutinpin jurani, manan chaskiykimanchu, nispa. Anchataña Naamán rimapayaqtinpas, manapunin Eliseoqa chaskirqanchu.

¹⁷Chaymi Naamanqa nirqan: —Manañataq munankichu chayqa, iskay mulaq apanan chhika hallp'ata kay Israelmanta apakusaq, manañan ñoqaqa ofrendatapas ruphachina sacrificiotapas wak dioskunaman haywasaqñachu, aswanpas Señor Diosllamanñan.

¹⁸Wiraqocha reyniy Rimón nisqa diosninpa yupaychanan wasita yupaychaq riqtinmi riysisaq, hinaspa makiyman tawnaykukuwaqtin chay wasipi qonqoriykukusaq, chayta pampachaykunallawantan Señor Diosta valekuni, nispa.

¹⁹Eliseotaq kutichirqan: —Ama llakisqalla ripuy, nispa. Hinan Naamanqa chaymanta ripurqan. Kuskan leguata hina rishaqtintaq,

²⁰profeta Eliseoq kamachin Gehaziqa yuyaykurqan: Wiraqochayqa chay Siria runa Naamanta kacharparipun, manataq apamusqan sumaq sonqota chhikallantapas chaskinchu. Señor Diospa sutinpin jurani, usqhaylla qhepanta phawarisaq icha imallatapas paymanta chaskimuyman, nispa.

²¹Chaymi Gehaziqa Naamanpa qhepanta phawarqan, Naamantaq qhepanta phawamushaqta rikuspa, carretanmanta uraykurqan chaskinanpaq, hinaspa Gehazita tapuykurqan: —¿Iman karqon? nispa.

²²Gehazitaq kutichirqan: —Manan imapas kanchu. Wiraqochallaymi kachamuwan qanman willaqta, Efraín orqo-orqopi kashaq profeta t'aqamantan chaylla iskay waynakuna chayarqamun, chaymi payqa valekusunki kinsa waranqa qolqeta iskay sayay p'achatawan chay waynakunapaq qonaykita, nispa.

²³Naamantaq kutichirqan: —Amayá chayllataqa, aswanpas soqta waranqa qolqeta aparikuy, nispa. Anchatapuni Naamanqa k'askachirqan apananpaq, chaymi iskay costalman qolqetawan iskay sayay p'achatawan winarqan, hinaspa iskay kamachinkunaman llapanta qorqan Gehaziq ñawpaqenta apananpaq.

²⁴Orqoman chayaqtinkutaq Gehaziqa kamachikunamanta qolqeta chaskispa wasinman waqaycharqan, paykunatataq kacharparipurqan.

²⁵Chay qhepatataq Gehaziqa wiraqochan Eliseoman rispa qayllaykurqan, hinan Eliseoqa tapuykurqan: —Gehazi, ¿maymantataq hamushanki? nispa. Paytaq kutichirqan: —Manan ñoqaqa maytapas rinichu, nispa.

²⁶Eliseotaq ichaqa nirqan: —Huk runa chaskinasuykipaq carretanmanta uraykushaqtinqa, yuyayniypin rikusharqayki. Manan kunanchu qolqetapas p'achatapas chaskina tiempoqa, manallataq huertata, uvas chakrata, ovejakunata, torokunata, qhari kamachita, warmi kamachita rantina tiempopaschu.

²⁷Chayrayku Naamanpa aycha qaranpi millay onqoynin wiñaypaq hap'isunki qantapas llapan mirayniykitapas, nispa. Chaymi Gehaziqa Eliseomanta t'aqarikapuspan, aycha qaranpi millay onqoyniyoq kaspa, rit'i hina yuraqllaña kapurqan.