Read Quechua Cuzco Bible 1988 ISKAYKAQ REYES 8 Bible Online

ISKAYKAQ REYES 8 - Quechua Cuzco Bible 1988 bible

ISKAYKAQ REYES 8

¹Churinta kawsarichirqan chay Sunem llaqta warmitan Eliseoqa nisqa: Maymanchá atinki hina qanpas familiaykipas tiyaq ripuychis, Señor Diosmi willawan qanchis wata kay suyupi sinchi yarqay kananta, nispa.

²Hinan warmiqa profetaq yuyaychasqanman hina familiantin ripurqan, Filistea suyupitaq qanchis watata tiyarqanku.

³Qanchis wata qhepatataq warmiqa Filistea suyumanta kutipurqan, hinaspa payqa reyman rirqan wasinta hallp'antawan kutichipunanta rogakuspa.

⁴Reyqa profeta Eliseoq kamachin Gehaziwanmi rimasharqan, hinaspa valekurqan Eliseoq tukuy musphana ruwasqankunata willananpaq.

⁵Gehaziqa imaynatachus Eliseoq huk warmiq churinta kawsarichisqanta reyman willashaqtinmi chay kikin warmi reyman chayarqan wasinta hallp'antawan kutichipunanta rogakunanpaq. Hinan Gehaziqa reyta nirqan: —Reyníy, kaymi chay warmi, kaytaqmi Eliseoq kawsarichisqan churinpas, nispa.

⁶Reytaq warmita tapurqan chay ruwasqamanta, hinan payqa lliwta willarqan. Chaymi reyqa huk oficialninta kamachirqan: —Kay warmiman kutichipuy llapan kaqninkunata, kay suyumanta ripusqan p'unchaymantapacha kunankama hallp'anpa rurusqantapas kutichipullaytaq, nispa.

⁷Chay qhepatataq Eliseoqa Damascota rirqan. Chay tiempopin Siria rey Ben-Hadad onqosqa kasharqan, hinan willarqanku: —Diospa profetan Eliseon chayamun, nispa.

⁸Chaymi reyqa Hazaelta nirqan: —Huk sumaq sonqota aparikuspa profetawan tupaq riy. Hinaspa valekunki Señor Diosta tapunanpaq kay onqoymanta qhaliyasaqchu manachu chayta, nispa.

⁹Hinan Hazaelqa Eliseoman rirqan, Damasco llaqtapi allinnin kaqkunamanta tawa chunka camellokunapi sumaq sonqo cargaykusqa. Profetaq qayllanman chayaspataq nirqan: —Kamachiyki Siria rey Ben-Hadadmi kachamushawan: Onqoyniymanta qhaliyasaqchu manachu chayta tapuykampuway, nispan, nispa.

¹⁰Eliseotaq kutichirqan: —Phaway, willamuy: Qhaliyanqan onqoyninmanta, nispa. Chaywanpas Señor Diosmi rikuchiwan wañupunanta.

¹¹Eliseotaq chay rato Hazaelta mana chinkachispa allinta qhawaykurqan, chaymi Hazaelqa qhawashallasqanrayku pukamanraq tukurqan. Profetataq waqayta qallarirqan,

¹²chaymi Hazaelqa tapuykurqan: —¿Imamantan waqanki? nispa. Eliseotaq kutichirqan: —Israel runakunata sinchi mana allin ruwanaykitan yachani, pukarankunatan ninawan kanaykunki, waynankunatapas erqenkunatapas wañuchinki, onqoq warmikunatapas wiksanta khallanki, nispa.

¹³Hazaeltaq kutichirqan: —¿Imaynataq chay hinata ruwayman? ¡Ñoqaqa huk alqo hinallan kakushani! nispa. Eliseotaq nirqan: —Señor Diosmi rikuchiwan Siria rey kanaykita, nispa.

¹⁴Hinan Hazaelqa Eliseoq qayllanmanta ripurqan, hinaspa reyninman qayllaykurqan, chaymi reyninqa tapuykurqan: —¿Ima nisunkin Eliseo? nispa. Hazaeltaq kutichirqan: —Qhaliyanqapunin onqoyninmantaqa, niwanmi, nispa.

¹⁵Qhepantin p'unchaytaq Hazaelqa huk p'achata hap'ispa ch'arancharqan, hinaspa reypa uyanta qataykurqan wañunankama. Chay qhepatataq rantinpi Hazael kamachikurqan.

¹⁶Ahabpa churin Joram tawa wata kurakña Israelpi kamachikushaqtinmi, Josafatpa churin Joramqa Judapi kamachikuyta qallarirqan.

¹⁷Kamachikuyta qallarishaspaqa kinsa chunka iskayniyoq watayoqmi karqan, kamachikurqantaq Jerusalenmanta pusaq watata.

¹⁸Joramqa Israel reykuna hinan ruwarqan, Ahabpa ayllunpa ruwasqanta hina. Warminmi karqan Ahabpa ayllunmanta, Joramqa manapunin Señor Diospa munayninman hinachu ruwarqan.

¹⁹Chaywanpas Señor Diosqa manan Judata ch'usaqyachiyta munarqanchu, David kamachinta munakusqanrayku, paymanmi prometesqa: Mirayniykiqa kamachishallanqapunin, nispa.

²⁰Joram kamachikushaqtinmi, Edom runakunaqa Judapa munaychakuynin contra sayarirqanku, hinaspa paykuna ukhumanta reyninkuta churakurqanku.

²¹Chaymi Joramqa Zairman maqanakuq puririrqan llapan carretankunantin, Edom runakunan paykunata muyuykurqanku, rey Joramtaq ichaqa carretakuna purichiqkunapiwan tuta lloqsispanku muyuykuq Edom soldadokunata qhochurparispa pasarqanku, wakin soldadokunataq wasinkuman ayqepurqanku.

²²Chay hinapin Edom runakunaqa Judamanta kacharichikapurqanku. Chay tiempollapitaqmi Libna llaqtapas Judapa munaychakuynin contra sayarirqanku.

²³Jorammanta wakin willakuykuna, tukuy ruwasqankunamanta willakuypas Judá Reykunaq Willakuynin Qelqapi qelqasqan kashan.

²⁴Joram wañupuqtinqa, Davidpa llaqtanpin taytanpa aya p'ampananpi p'ampapurqanku. Chay qhepatataq churin Okozías rantinpi kamachikurqan.

²⁵Ahabpa churin Joram chunka hukniyoq wata kurakña Israelpi kamachikushaqtinmi, Judá rey Jorampa churin Okoziasqa kamachikuyta qallarirqan.

²⁶Iskay chunka iskayniyoq watayoqmi karqan kamachikuyta qallarishaspa, kamachikurqantaq Jerusalenmanta huk watata. Mamanqa Israel rey Omriq nietanmi karqan, Atalía sutiyoq.

²⁷Ahabpa ayllunwan aylluchakusqanraykun Okoziasqa paykunaq ruwasqanta hina ruwarqan, chaymi payqa manapuni Señor Diospa munayninman hinachu ruwarqan.

²⁸Okoziasqa Ahabpa churin Joramwanmi huñukurqan Galaadpa Ramot llaqtanpi Siria rey Hazael contra maqanakunanpaq. Siria soldadokunataq Joramta k'irirqan,

²⁹chaymi payqa Jezreelta kutipurqan, Ramot llaqtapi k'irichikusqanta hampikuq. Joram onqosqa kashaqtinmi, Okoziasqa Jezreelta rirqan pay watukuq.