Read Quechua Cuzco Bible 1988 1 CRÓNICAS 11 Bible Online

1 CRÓNICAS 11 - Quechua Cuzco Bible 1988 bible

1 CRÓNICAS 11

¹Llapan Israel runakunan Davidman Hebronta hamurqanku, hinaspan nirqanku: —Ñoqaykuqa yawarniykin cuerpoykin kayku.

²Saúl kamachikushaqtinraqmi qanqa maqanakuypi Israelpa soldadonkunaq umallin karqanki. Apu Señor Diosninchispas nirqasunkin: Qanmi Israel llaqtayta michinkipas kamachinkipas, nispa, nispanku.

³Ahinatan Israelpi llapan kurak runakuna rey Davidman Hebronta hamurqanku, chaypin reyqa paykunawan Señor Diospa ñawpaqenpi rimanakurqan. Hinan Davidta Israelpi rey kananpaq aceitewan hawirqanku, Señor Diospa siminta Samuelpa willasqanman hina.

⁴Chay qhepatataq rey Davidqa llapan Israel runakunapiwan Jebus nisqa Jerusalenta rirqan. Chaypi tiyaq Jebus runakunataq

⁵Davidta nirqanku: —Manan qanqa haykumuyta atiwaqchu, nispa. Davidtaq ichaqa Sión pukarata munaychakurqan, chaymi Davidpa Llaqtan nisqa kapurqan.

⁶Davidmi nisqa: Pichus ñawpaqta Jebus runakunaman phawaykuspa wañuchinqa chaytan umallita churasaq, nispa. Sarviaq churin Joabtaq ñawpaqta phawaykurqan, chaymi payta umallita churarqan.

⁷Davidtaq Sión pukarapi tiyarqan, chaymi chay pukarata Davidpa Llaqtan nispa suticharqanku.

⁸Hinan Davidqa pukaraq muyuriqninpi llaqtata sayarichirqan p'ukru hunt'achisqa cheqasmanta muyuriq perqakama, Joabtaq wakin llaqtata allicharqan.

⁹Tukuy-atiyniyoq Señor Diosmi paywan karqan, chaymi Davidqa astawanpuni kallpachakusharqan.

¹⁰Davidpa mentasqa soldadonkunaq umallinkunapiwan llapan Israel runakunapiwanmi rey kananpaq Davidta yanaparqanku, hinallataq kamachikuynin Israel suyupi takyasqa kananpaq yanaparqanku, Señor Diospa nisqanman hina.

¹¹Kaykunan chay mentasqa soldadokuna: Hakmonimanta Jasobeammi kinsantin umallikunaq qollanan karqan, paymi huk maqanakuypi kinsa pachak soldadokunata lanzanwan wañurqachirqan.

¹²Ahoh ayllumanta Dodoq churin Eleazar, kinsantin umalli qharikunamanta iskaykaq karqan.

¹³Chay Eleazarmi Davidwan kuska kasharqan Pasdaminpi Filistea soldadokuna chaypi maqanakunanpaq huñukushaqtin. Israel soldadokuna Filistea soldadokunamanta

¹⁴ayqeshasqan cheqaspitaq cebada chakra karqan, hinan Eleazarqa soldadonkunapiwan chakra chawpipi sayaykuspa tupapakurqanku. Hinaspataq Filistea soldadokunata atiparqanku, ahinatan Señor Diosqa allintapuni atipachirqan.

¹⁵Kinsa chunka umallikunamanta kinsa umallikunan Adulam qaqa t'oqo qaylla qaqata Davidman uraykurqanku, Filistea soldadokunataq qaynakuspa Refaim wayq'opi kasharqanku.

¹⁶Davidqa pukarapin kasharqan, Filistea soldadokuna Belenpi kashaqtin.

¹⁷Hinan Davidqa anchata munaykuspa nirqan: —¡Ayyha! ¡Ukyaykullayman Belén llaqta punku p'uytu unuta! nispa.

¹⁸Chaymi kinsantin qhari soldadokuna Filistea soldadokunata tanqarparispa karpa-karpankuman haykurqorqanku, hinaspa llaqta punku p'uytumanta unuta horqomuspanku Davidman aparqanku. Paytaq ichaqa mana ukyayta munarqanchu, aswanpas Señor Diospaq ofrendata hina hich'aspa nirqan:

¹⁹¡Amapuni Señor Diospas munachunchu kay unu ukyanayta! Kay qharikunaq yawarnintapas ukyayman hinachá kanman, paykunaqa wañuyta mana manchaspan unuta apamuwarqanku, nispa. Chaymi mana ukyayta munarqanchu. Chaytan ruwarqan kinsantin umalli qharikuna.

²⁰Joabpa wawqen Abisaitaq kinsa chunka qharikunaq umallin karqan. Paymi huk kutin kinsa pachak soldadokunata lanzanwan wañurqachirqan, chaymi paypas kinsa umalli qharikunaq umallin karqan. Paymi huk kutin kinsa pachak soldadokunata lanzanwan wañurqachirqan, chaymi paypas kinsa umalli qharikuna hinallataq mentasqa karqan,

²¹ichaqa manapunin paykunaman ayparqanchu. Chaywanpas kinsa chunka qharikunamanta aswan mentasqa kaspan paykunaq umallin kapurqan.

²²Kabseel llaqtamanta Joiadaq churin Benaiapas allin qhari kallarqantaq, paymi musphanakunata ruwarqan. Moabmanta maqanakuypi mentasqa iskay qharikunata wañuchirqan. Hinallataq huk p'unchay rit'ishaqtin, t'oqoman haykuspa huk leonta wañuchirqan.

²³Iskay metro phasmin sayayniyoq Egipto runatapas wañuchillarqantaq. Chay Egipto runaqa bayeta k'uyuna hina rakhu lanzayoqmi karqan, Benaiataq ichaqa maqana hap'intin asuykurqan. Hinaspataq Egipto runaq lanzanta makinmanta qechurqospa chay kikin lanzanwan wañurqachirqan.

²⁴Chaytan ruwarqan Joiadaq churin Benaía, chaymi paypas kinsa umalli qharikunawan kuska mentasqallataq karqan,

²⁵ichaqa manapunin paykunaman ayparqanchu. Chaywanpas kinsa chunka qharikunamanta aswan mentasqan karqan. Hinan Davidqa waqaychaqnin guardiakunaq umallinta churarqan.

²⁶Kaykunan allin qhari soldadokuna karqan: Joabpa wawqen Asael, Belenmanta Dodoq churin Elhanán,

²⁷Harodmanta Samot, Pelonmanta Heles,

²⁸Tekoamanta Ikispa churin Ira, Anatotmanta Abiezer,

²⁹Husamanta Sibekai, Ahohmanta Ilai,

³⁰Netofamanta Maharai, Netofamanta Baanaq churin Heled,

³¹Benjamín ayllumanta Gabaa llaqtamanta Ribaipa churin Itai, Piratonmanta Benaía,

³²Gaas k'aha-k'ahamanta Hurai, Arbatmanta Abiel,

³³Bahurimmanta Azmavet, Saalbonmanta Eliaba,

³⁴Gizonmanta Hasempa churinkuna, Ararmanta Sageq churin Jonatán,

³⁵Ararmanta Sakarpa churin Ahiam, Urpa churin Elefal,

³⁶Mekiratmanta Hefer, Pelonmanta, Ahías,

³⁷Karmelmanta Hezro, Ezbaipa churin Naarai,

³⁸Natanpa wawqen Joel, Hagriq churin Mebhar,

³⁹Amonmanta Selek, Sarviaq churin Joabpa arma apaysiqnin Beerotmanta Naharai,

⁴⁰Itrinmanta Ira, Garetpiwan,

⁴¹Het runa Urías, Ahlaipa churin Zabad,

⁴²Rubén ayllumanta Sizaq churin Adina kinsa chunka runankunapiwan (payqa Rubén aylluq umallinmi karqan),

⁴³Maakaq churin Hanán, Mitnimanta Josafat,

⁴⁴Astarotmanta Uzías, Aroermanta Hotampa churinkuna Samapiwan Jehielpiwan,

⁴⁵Simriq churin Jediael, Tizmanta wawqen Johapiwan,

⁴⁶Mahavamanta Eliel, Elnaanpa churinkuna Jerebaipiwan Josaviapiwan, Moabmanta Itma,

⁴⁷Eliel, Obed, Medobamanta Jaasielpiwan.