Read Quechua Cuzco Bible 1988 1 CRÓNICAS 15 Bible Online

1 CRÓNICAS 15 - Quechua Cuzco Bible 1988 bible

1 CRÓNICAS 15

¹Llaqtanpin Davidqa wasikunata paypaq ruwakurqan, Diospa cajanpaqtaq huk cheqasta wakichispa chaypi karpata sayarichirqan.

²Hinaspa nirqan: —Diospa cajantaqa Leví runakunallan apanan, Señor Diosmi paykunataqa akllakusqa cajanta apapunanpaqpas tukuy tiempo payta servinanpaqpas, nispa.

³Chaymi Davidqa llapan Israel runakunata Jerusalenpi huñuykurqan, Señor Diospa cajanta wakichisqan karpaman apanankupaq.

⁴Huñullarqantaq Aaronpa mirayninta, Leví runakunaq miraynintapas.

⁵Chaymi Kohat ayllumanta hamurqan umalli Uriel pachak iskay chunkayoq wawqenkunapiwan.

⁶Merari ayllumanta hamurqan umalli Asaías iskay pachak iskay chunkayoq wawqenkunapiwan.

⁷Gersón ayllumanta hamurqan umalli Joel pachak kinsa chunkayoq wawqenkunapiwan.

⁸Elizafán ayllumanta hamurqan umalli Semaías iskay pachak wawqenkunapiwan.

⁹Hebrón ayllumanta hamurqan umalli Eliel pusaq chunka wawqenkunapiwan.

¹⁰Uziel ayllumanta hamurqan umalli Aminadab pachak chunka iskayniyoq wawqenkunapiwan.

¹¹Davidqa waqyallarqantaqmi sacerdote Sadokta Abiatartawan, Leví runakuna Urielta, Asaiasta, Joelta, Semaiasta, Elielta, Aminadabtawan.

¹²Hinaspan paykunata nirqan: —Qankunan Leví ayllu runakunaq umallinkuna kankichis, ch'uyanchakuychis qankunapas wawqeykichispas, Israelpa Diosnin Señorpa cajanta wakichisqay karpaman apamunaykichispaq.

¹³Ñawpaq kutiqa manan qankunachu aparqankichis, chaymi Apu Señor Diosninchisqa muchuchiwarqanchis. Manataq payta tapurqanchischu imaynatachus ruwananchispaq, nispa.

¹⁴Hinan sacerdotekunapas Leví runakunapas ch'uyanchakurqanku Israelpa Diosnin Señorpa cajanta apanankupaq.

¹⁵Chaymantataq Leví runakunaqa Diospa cajanta wanturqanku, cajataqa k'aspinmantan rikraykukurqanku, Señor Diospa Moiseswan kamachisqanman hina.

¹⁶Davidtaq Leví runakunaq umallinkunata kamachirqan: Wawqeykichiskunamanta churaychis takiqkunata kusisqa takinankupaq, churallaychistaq tocaqkunatapas, arpata, tawtinkuta, platillota ima tocanankupaq, nispa.

¹⁷Hinan Leví runakunaqa churarqanku Joelpa churin Hemanta, wawqenkunamanta Berekiaspa churin Asafta, Merari ayllumanta wawqenkunamantawan Kusaiaspa churin Etanta.

¹⁸Paykunaman qatiq kaq wawqenkunatataq churarqan Zakariasta, Jaazielta, Semiramot-ta, Jehielta, Unita, Eliabta, Benaiata, Maasiasta, Matatíasta, Elifelehuta, Mikniasta, punku, qhawaqkuna Obed-edomta, Jeieltawan.

¹⁹Hinan Hemán, Asaf, Etanpiwan takiqkunaqa broncemanta platillokunata tocarqanku.

²⁰Zakarías, Aziel, Semiramot, Jehiel, Uni, Elial, Maasías, Benaiaspiwanmi ñañuman tupasqa tawtinkukunata tocarqanku.

²¹Matatías Elifelehu, Miknías, Obed-edom, Jeiel, Azaziaspiwantaq rakhuman tupasqa arpakunata tocarqanku.

²²Leví runakunaq umallin Kinaniastataq takiqkuna kamachiqta churarqan, takikunapi hamawt'a kasqanrayku.

²³Berekiaswan Elkanawan Obed-edomwan Jehiaspiwantaq caja karpa punkuta qhawarqanku. Diospa cajanpa ñawpaqenpi corneta tocaq sacerdotekunataq karqan Sebanías, Josafat, Natanael, Amasai, Zakarías, Benaías, Eliezerpiwan,

²⁵Ahinatan Davidqa Israel kurak runakunapiwan waranqa soldadoq umallinkunapiwan kusisqa rirqanku Obed-edompa wasinmanta Señor Diospa rimanakuynin cajata apanankupaq.

²⁶Diosmi kallpacharqan Leví runakunata paypa rimanakuynin cajata apashaqtinku, chaymi qanchis torillota qanchis anejotawan sacrificiota haywarqanku.

²⁷Davidqa sumaq linomanta p'achayoqmi linomanta sotanayoqmi rirqan, hinallataq caja wantuq llapan Leví runakunapas, takiqkunapas, takiqkuna takichiq Kinaniaspas sumaq lino p'achayoq karqanku.

²⁸Llapan Israel runakunan ancha kusisqa qaparispa Señor Diospa rimanakuynin cajata aparqanku, putututa, cornetata, platillota, tawtinkuta, arpatawan tocaspanku.

²⁹Señor Diospa rimanakuynin cajata Davidpa llaqtanman chayachiqtinkutaq, Saulpa ususin Mikalqa wasi ventanamanta rey Davidta rikurqorqan tusushaqta saltashaqta, chaymi sonqonpi pisicharqan.