Read Quechua Cuzco Bible 1988 1 CRÓNICAS 17 Bible Online

1 CRÓNICAS 17 - Quechua Cuzco Bible 1988 bible

1 CRÓNICAS 17

¹Davidqa wasinpiñan tiyasharqan, chaymi payqa profeta Natanta nirqan: —Qhawariy, ñoqaqa cedro kurku llaqllasqa wasipin tiyani, Señor Diospa rimanakuynin cajataq ichaqa karpallapi kashan, nispa.

²Natantaq kutichirqan: —Qanwanmi Diosqa kashan, ima munasqaykita ruway, nispa.

³Chay tutapachan Diosqa Natanta rimaykurqan:

⁴Phaway David kamachiyman, hinaspa nimuy: Qanqa manan tiyanaypaq wasita ruwapuwankimanchu.

⁵Egiptomanta Israel runakunata horqomusqaymanta kunankama manan hayk'aqpas wasipiqa tiyarqanichu, aswanpas karpallapin kayneqman haqayneqman purispa huk cheqasmanta huk cheqasman rirqani.

⁶Kay tukuy unayñan llapa Israel runakunawan purimushani, manataqmi mayqen Israel qollana umallikunatapas: ¿Imanaqtinmi cedro kurku llaqllasqa wasita mana ruwapuwankichischu? nirqanichu.

⁷Chay hinaqa David kamachiyta ninki: Ñoqa Tukuy-atiyniyoq Señor Diosmi nini: Campopi ovejata michispa purishaqtiykin, ñoqa pusamurqayki Israel llaqtayta umallinaykipaq.

⁸Maypiña puriqtiykipas qanwanmi karqani, llapan awqaykikunatapas ñawpaqeykipi muchuchirqani. Kay pachapi mentasqa runakunata hinan ruwasqayki.

⁹Israel llaqtaypaqtaq huk cheqasta wakichisaq, chaypin takyachisaq, hinan tiyanqaku mana piqpa muchuchisqan. Manataq awqankupas llakichinqañachu,

¹⁰imaynan Israel llaqtayman qollana umallikunata churasqay p'unchaymanta llakichirqan hinataqa. Tukuy awqaykikunamantan qespichisqayki, prometeykitaqmi mirayniykita qonaypaqpas.

¹¹Wañukapuqtiykipas machulaykikunawanmi p'ampasqa kapunki, qanmanta paqarimuq churiykitataq kamachikuqta churasaq, hinaspa suyunta takyachisaq.

¹²Paymi wasita ruwapuwanqa, ñoqataq wiñaypaq atiyninta sayachisaq.

¹³Ñoqan taytan kasaq, paytaq churiy kanqa. Mana p'itiytan paytaqa munakusaq, manan Saulmanta hinachu t'aqakusaq.

¹⁴Ñoqan llaqtaypi umallita churasaq, paytaq ñoqapaq kamachishallanqapuni, kamachikuyninpas kashallanqapunin allin takyasqa, nispa, nispayki.

¹⁵Hinan Natanqa llapan rikhuriypi rikusqantapas uyarisqantapas lliwta Davidman willarqan.

¹⁶Chaymi rey Davidqa karpaman haykurqan, Señor Diospa qayllanpi tiyaykuspataq nirqan: Apu Señor Diosníy, kaykamañan yanapamuwanki, ichaqa ñoqapas aylluypas manan imapaschu kayku.

¹⁷Chaywanpas, Diosníy, chaykunamantaqa astawanñan ruwashanki, hamuq mitakunapaqpas prometellankitaq aylluyta saminchanaykipaq. Apu Señor Diosníy, allin mentasqa runapas kayman hinan qhawariwarqanki.

¹⁸¿Hatunchashawaqtiykiqa imatañataq niykiman? ¡Qanmi kay kamachiykita reqsiwanki!

¹⁹Señor Diosníy, qanmi munarqanki ñoqapaq kay hatun musphana ruwayta, ahinapin prometewarqanki kay hatuchachaq kaqkunata.

²⁰Señor Diosníy, lliwta uyarisqayman hinaqa manan kanchu qan hina, manan kanchu huk Diosqa, sapallaykin kanki.

²¹¿Mayqen llaqtataq kay pachapi Israel llaqtayki hinaqa kanman? Qanmi Egipto suyumanta kacharichirqanki llaqtayki kananpaq. Manchay musphanatan paykunapaq ruwarqanki, ñawpaqenkumanta llaqtakunata wikch'urqanki, chaykunawantaq qanqa hatun mentasqa sutiyoq kapurqanki.

²²Wiñay llaqtayki kananpaqmi Israelta akllakurqanki, Diosninkutaq kapurqankipas.

²³Chay hinaqa Señor Diosníy, ñoqamanpas aylluymanpas prometesqaykiqa hunt'akushallachunpuni. Nisqaykita hina ruway

²⁴prometesqayki hunt'akushanallanpaq, ahinapin ancha mentasqa kanki. Hinan runakunaqa ninqaku: Tukuy-atiyniyoq Señor Diosmi Israelpa waqaychaqnin Diosqa, nispa. Ñoqaq aylluypas mana urmaqtaq ñawpaqeykipi sayanqa.

²⁵Qanmi, Diosníy, ñoqataqa niwarqanki aylluy mana urmaq sayananta, chaymi kay confianzawan mañakamuyki.

²⁶Señor Diosníy, qanqa Diosmi kanki, qanmi prometewarqanki kay ancha allinta.

²⁷Qanmi, Señor Diosníy, aylluytaqa saminchayta munarqanki paykunata qhawashanallaykipaq. Qanmi aylluytaqa samincharqanki, wiñaypaq saminchasqataq kanqa, nispa.