Read Quechua Cuzco Bible 1988 1 CRÓNICAS 18 Bible Online

1 CRÓNICAS 18 - Quechua Cuzco Bible 1988 bible

1 CRÓNICAS 18

¹Chay qhepatataq Davidqa Filistea runakunata sinchita atiparqan, hinaspan Gat llaqtata qaylla llaqtachankunatawan qechuspa munaychakurqan.

²Hinallataq Moab llaqta runakunata atiparqan, chaymi Moab runakunaqa Davidpa kamachisqan kapurqanku, contribuciontapas pagarqanku.

³Soba rey Hadad-ezertapas atipallarqantaq Hamatpi Eufrates mayu qaylla hallp'ata munaychakuq rishaqta.

⁴Hinaspan waranqa carretakunata, qanchis waranqa caballoyoq soldadokunata, iskay chunka waranqa soldadokunatawan presota aparqan, carreta aysaq caballokunatataq yaqa llapanta hank'unta kuchurqarirqan, pachak carretakunallapaqña puchuchikurqan.

⁵Damasco llaqtamanta Aram soldadokunan Soba rey Hadad-ezerman maqanakuypi yanapaq rirqanku, Davidtaq ichaqa paykunatapas atipallarqantaq, hinaspa iskay chunka iskayniyoq waranqa soldadokunata wañuchirqan.

⁶Chaymi Davidqa Aram suyupi Damascoman soldado t'aqakunata churarqan, hinan Aram runakunaqa Davidpa kamachisqan kapurqanku, contribuciontapas pagarqanku. Ahinatan Señor Diosqa Davidta maypiña maqanakuqtinpas atipachillarqanpuni.

⁷Chaymantataq Davidqa Hadad-ezerpa oficialninkunaq apasqan qori escudokunata qechurqospa Jerusalenman aparikurqan.

⁸Hinallataq Hadad-ezerpa llaqtan Tibhatmanta Kunmantawan askha bronceta hap'ikurqan, chay broncewanmi Salomonqa ruwachirqan unu qochata, tusakunata, serviciokunata ima.

⁹Hadad-ezerqa Hamat rey Toiq awqanmi karqan, chaymi Toiqa Hadad-ezerpa llapan soldadonkunata Davidpa atipasqanta yachaspa, churin Adoramta rey Davidman napaykuqta kacharqan, qorimanta, qolqemanta, broncemanta regalokunatawan apachispa: Allinpunin Hadad-ezerta maqanakuypi atiparqanki, nispa.

¹¹Chay regalokunatan rey Davidqa Señor Diospaq t'aqarqan. Hinallataq Edommanta, Moabmanta, Amonmanta, Filisteamanta, Amalek runakunamanta ima apasqan qorita qolqeta Señor Diospaq t'aqarqan.

¹²Hinallataq Sarviaq churin Abisaipas Kachi Wayq'opi chunka pusaqniyoq waranqa Edom soldadokunata atiparqan.

¹³Hinan Davidqa Edom suyupi soldado t'aqakunata churarqan, chaymi llapan Edom runakuna Davidpa kamachisqan kapurqanku. Ahinatan Señor Diosqa Davidta maypiña maqanakuqtinpas atipachillarqanpuni.

¹⁴Davidqa llapan Israel suyutan kamachirqan, llapa runakunapaqpas chaninkaqta cheqaqkaqta ruwarqan.

¹⁵Sarviaq churin Joabmi ejercitonpi umalli karqan, Ahiludpa churin Josafat-taq qelqa waqaychaqnin karqan.

¹⁶Ahitobpa churin Sadokwan, Abiatarpa churin Ahimelekwantaq sacerdotekuna karqanku, Savsataq qelqaqnin karqan.

¹⁷Joiadaq churin Benaiataq reypa guardian Keret runakunaq, Pelet runakunaq umallin karqan. Davidpa churinkunataq paypa qayllanpi apukuna karqanku.