Read Quechua Cuzco Bible 1988 1 CRÓNICAS 19 Bible Online

1 CRÓNICAS 19 - Quechua Cuzco Bible 1988 bible

1 CRÓNICAS 19

¹Amón suyu runakunaq reynin Nahas wañupuqtintaq, churin Hanun rantinpi kamachikurqan.

²Hinan Davidqa nirqan: —Hanunpa taytan Nahasqa khuyapayawarqanmi, ñoqapas churin Hanunman oficialniykunata kachasaq taytanmanta llakikuyninpi sonqochaykuqta, nispa. Davidpa oficialninkuna Hanún sonqochaq Amón suyuman chayaqtintaq,

³chay suyupi uma qharikunaqa Hanunta nirqanku: —¿Davidqa taytaykita munakuspa sonqochaqta kachamusqasuykitachu yuyanki? Aswanpas, ¿manachu llaqtanchista reqsinanpaq, qhawarananpaq, chay qhepatataq atipawananchispaq kachamunman? nispa.

⁴Chaymi Hanunqa Davidpa oficialninkunata hap'ispa sunkhanta k'isurqachirqan, p'achantapas kuskanta sikipatankama wit'urqachirqan, hinaspataq kacharparipurqan.

⁵Chaytan Davidman willarqanku, hinan payqa willaqkunata kacharqan taripananpaq, paykuna sinchi p'enqasqa kashasqankurayku. Davidqa nirqanmi: Jericó llaqtapi qhepakuychis sunkhaykichis wiñanankama, chaymantaña kutimpunkichis, nispa.

⁶Hanuntaq Amón runakunapiwan Davidwan cheqnichikusqankuta reparakuspa, kinsa chunka waranqa kilo qolqewan mink'akurqanku carretakunata caballoyoq soldadokunatawan Mesopotamiamanta, Aram suyupi Maakamanta, Sobamantawan.

⁷Ahinapin mink'akurqan Maaka reyta, ejercitonta, kinsa chunka iskayniyoq waranqa carretankunatawan. Hinan paykunaqa rispanku Medeba qhawaypi karpakurqanku. Amón runakunapas sapanka llaqtankumanta huñukullarqankutaq maqanakuyman rinankupaq.

⁸Tukuy chaykunata yachaspataq Davidqa ejerciton umalli Joabta kacharqan llapan soldadonkunatawan.

⁹Amón soldadokunataq lloqsimuspa llaqta punku haykunapi maqanakuypaq wakichikurqanku. Yanapaq riq reykunataq sapaq campopi kasharqanku.

¹⁰Hinan Joabqa qhepanpi ñawpaqenpi awqankuna kashasqanta rikuspa, aswan qharinkunata soldadonkunamanta akllarqospa wakichirqan Aram soldadokunawan maqanakunanpaq.

¹¹Wakin soldadokunatataq wawqen Abisaiman hap'ichirqan, hinaspan paykunata wakichirqan Amón soldadokunawan maqanakunanpaq.

¹²Nirqantaq: Aram soldadokuna atipawaqtinqa qan yanapawanki, Amón soldadokuna atipasuqtiykitaq ñoqa yanapasqayki.

¹³¡Kallpachakusun! ¡Qhari kasun llaqtanchisrayku, Diosninchispa llaqtankunarayku ima! ¡Apu Señor Diosninchispuni munasqanman hina ruwachun! nispa.

¹⁴Joabtaq soldadonkunapiwan Aram soldadokunawan maqanakuq lloqsirqan, Aram soldadokunataq ichaqa paykunaq qayllankumanta ayqekapurqanku.

¹⁵Amón soldadokunapas Aram soldadokunaq ayqekusqanta rikuspa, Joabpa wawqen Abisaipa ñawpaqenmanta kutiripullarqankutaq, hinaspa llaqtaman haykurqanku. Chaymi Joabqa chay qhepata Jerusalenman kutipurqan.

¹⁶Aram soldadokunataq ichaqa Israel soldadokunaq atipasqan kasqankuta reparakuspa, Eufrates mayu chimpaman willaqkunata kacharqanku, hinan chay chimpamanta Aram soldadokunaqa Sofakpa umallisqan hamurqanku. Sofakqa Hadad-ezerpa ejerciton umallin karqan.

¹⁷Davidtaq chayta yacharqospa, llapan Israel soldadokunata huñurqorqan, hinaspa Jordán mayuta chimparqospa Aram soldadokuna qhawaypi maqanakunanpaq soldadonkunata wakichirqan. Maqanakuyta qallariqtinkutaq Aram soldadokunaqa

¹⁸Israelpa qayllanmanta ayqepurqan. Chaymi Davidqa wañuchirqan qanchis waranqa carretapi soldadokunata, tawa chunka waranqa chakipi soldadokunata, ejército umalli Sofaktapas wañuchillarqantaq.

¹⁹Hadad-ezerpa kamachisqan llapan reykunataq Israelpa atipasqan kaspanku, Davidwan allipunayta mañakurqanku. Chaymi Aram runakunaqa Israelpa kamachisqan kapurqanku, manañataq chaymantapacha hayk'aqpas Amón runakunata yanapayta munarqankuñachu.