Read Quechua Cuzco Bible 1988 1 CRÓNICAS 20 Bible Online

1 CRÓNICAS 20 - Quechua Cuzco Bible 1988 bible

1 CRÓNICAS 20

¹Qhepantin wata chiri tiempopin Joabqa reykunaq maqanakuyman lloqsinan mitapi llapan soldadonkunantin maqanakuq rirqan, hinaspan Amón runakunata muchuchirqan, chaymantataq Rabá llaqta muyuykuq rirqan. Davidtaq chaykama Jerusalenpi kasharqan. Hinan Joabqa Rabá llaqtata atipaspa thunirqan.

²Chaymantataq Davidqa Rabá llaqta runakunaq diosnin Milkommanta umiña rumiwan sumaqchasqa qori coronanta qechurqan, chay coronan pesarqan kinsa chunka kinsayoq kilo hina, Davidpa umanmantaq churarqanku. Chaymantataq Davidqa llaqtamanta askha llat'anasqakunata aparqan.

³Chay llaqta runakunatataq campoman horqospa llank'achirqan sierrawan, fierro rastrawan, hachawan ima. Ahinatan Davidqa ruwarqan Amón suyu llapan llaqtakunapi runakunata, chaymantataq payqa llapan soldadokunantin Jerusalenman kutipurqan.

⁴Chay qhepatataq Gezer llaqtapi Filistea runakunawan maqanakurqanku. Hinan Husamanta Sibekaipa hatuchaq t'aqa miraymanta Sipaita wañurqachirqan, chaymi Filistea runakunaqa atipasqa karqanku.

⁵Wakmanta Filistea runakunawan maqanakurqanku, hinan Jairpa churin Elhananqa Gatmanta Goliatpa wawqen Lahmita wañurqachirqan. Lahmiq lanza hap'inanmi telarpi bayeta k'uyuna hina sinchi rakhu karqan.

⁶Huk kutitawan Gat llaqtapi Filistea runakunawan maqanakurqanku. Chaypin huk qhari hatun sayayniyoq karqan, hatuchaq t'aqa miraymanta, paypa dedonkunan karqan iskay chunka tawayoq, sapanka makinpi soqta dedokama, kaqllataq chakinkunapipas.

⁷Chay runan Israelta k'amirqan, chaymi Davidpa wawqen Simeaq churin Jonatanqa wañurqachirqan.

⁸Chaykunan Gatpi hatuchaq t'aqa miraymanta karqan, ichaqa Davidmi oficialninkunapiwan chay qharikunata wañuchipurqanku.