Read Quechua Cuzco Bible 1988 1 CRÓNICAS 22 Bible Online

1 CRÓNICAS 22 - Quechua Cuzco Bible 1988 bible

1 CRÓNICAS 22

¹Chaymi Davidqa yuyaykurqan: Kaypin Señor Diospa wasinqa kanqa, kayllapitaq Israel runakunaq sacrificio ruphachinan altarpas kanqa, nispa.

²Chaymantataq Davidqa kamachikurqan Israel suyupi tiyaq wak llaqtayoq runakuna huñukunanpaq, hinaspa paykunamanta akllarqan rumi ch'eqoqkunata Diospa wasinta sayarichinapaq rumikunata ch'eqonankupaq.

³Hinallataq askha fierrota qorqan punkukunapaq clavokunata hap'iqkunatawan ruwananpaq, qollarqantaq ancha askha bronceta mana pesay atiytaraq,

⁴askha cedro kurkukunatapas mana yupay atiytaraq. Chay cedro kurkukunataqa Sidón runakuna Tiro runakunapiwanmi askhata Davidman aparqanku.

⁵Davidmi yuyaykurqan: Salomón churiyqa warmallaraqmi, manataq ima ruwaytapas yachanraqchu, Señor Diospaq wasi sayarichinantaq ichaqa ancha musphana mentasqa kanqa, llapan kay pacha suyukunaq yachasqan. Chay hinaqa wakichipushasaqña wasi sayarichinanpaq, nispa. Chaymi Davidqa manaraq wañukapushaspa ancha askhataña wasi sayarichinapaq wakichirqan.

⁶Chaymantataq Davidqa churin Salomonta waqyachispa Israelpa Diosnin Señorpaq wasita sayarichinanta kamachirqan:

⁷Churilláy, sonqoypin yuyaykurqani Apu Señor Diosninchista hatunchanapaq wasita ruwapuyta,

⁸ichaqa Señor Diosmi niwarqan: Qanqa askha runatan wañuchirqanki, hatun maqanakuykunapitaq maqanakurqankipas. Manan ñoqapaq wasita ruwapuwankimanchu, ñawpaqeypi kay pachapi askha runata wañuchisqaykirayku.

⁹Aswanpas huk churiykin nacenqa, paymi kanqa llamp'u runa. Ñoqan muyuriqpi llapan awqankunamanta waqaychaspa sumaqta kawsachisaq, chaymi sutinpas Salomón kanqa, Israel suyumantaq qosaq sumaq kawsayta llamp'u kawsayta Salomón wañukapunankama.

¹⁰Paymi ñoqapaq wasita ruwapuwanqa. Paymi ñoqaq churiy kanqa, ñoqataq paypa taytan kasaq. Israel suyupitaq paypas mirayninpas kamachikushallanqapuni, nispa.

¹¹Chay hinaqa, churilláy, Apu Señor Diosninchis qanwan kachun. Paymi nisqanman hina kallpachasunki paypaq wasita ruwanaykipaq.

¹²Señor Dios munachun yachayniyoq allin yuyayniyoq kanaykita, Israel suyuta kamachishaspayki Apu Señor Diosniykiq kamachikuy siminta hunt'anaykipaq.

¹³Tukuypi allin kanaykipaqqa makilla qhaway Señor Diospa kamachikuyninkunata unanchayninkunata hunt'anaykipaq, chaykunatan payqa Israelpaq Moisesman qomusqa. ¡Kallpachakuy! Ama pisi kallpayaychu, ama manchakuychu, amataq musphaypaschu.

¹⁴Ñoqaqa anchata kallpachakuspaymi Señor Diospa wasinpaq wakichirqani kinsa waranqaq waranqan tawa pachak waranqa kilo qorita, kinsa chunka tawayoq waranqaq waranqan kilo qolqeta, broncetapas fierrotapas mana pesay atiyta, hinallataq rumitapas, kurkutapas. Chaymanñachá qan yapaykunki.

¹⁵Askhan llank'aqniykikunapas kanqaku, rumi ch'eqoqkuna, wasi perqaqkuna, k'ullu llaqllaqkuna, hinallataq tukuy llank'ay yachaq askha runakunapas.

¹⁶Askhan kashan qoripas qolqepas broncepas fierropas. Llank'allayña, Señor Diostaq qanwan kachun, nispa.

¹⁷Hinaspataq Davidqa Israel suyupi llapan umallikunata kamachirqan Salomón churinta yanapanankupaq:

¹⁸Qankunawanmi Apu Señor Diosninchis kashan, paymi thak kawsayta suyuntinpi qorqasunkichis. Señor Diosmi kay suyupi tiyaq runakunata hap'ichiwarqan, chaymi kay suyutaqa Señor Dios munaychakun Israel llaqtanpas munaychakullantaq.

¹⁹Chay hinaqa, tukuy sonqo tukuy alma Apu Señor Diosniykichista maskhaychis. Llank'aychis, Señor Diospa wasinta sayarichiychis, Señor Diospa rimanakuynin cajata, Diospaq t'aqasqa serviciokunata ima apaspa chayman churanaykichispaq. Chay wasin kanqa Señor Diosta hatunchanapaq, nispa.