Read Quechua Cuzco Bible 1988 1 CRÓNICAS 28 Bible Online

1 CRÓNICAS 28 - Quechua Cuzco Bible 1988 bible

1 CRÓNICAS 28

¹Llapan Israel umallikunatan Davidqa Jerusalenpi huñuykurqan: ayllu umallikunata, reyta serviq t'aqa-t'aqa qharikunaq umallinkunata, waranqa soldadoq umallinkunata, pachak soldadoq umallinkunata, kaqninkunapi llapan kamachiqkunata, reypa uywanta churinkunaq uywantapas michiq kamachiqkunata, reypa wasin oficialkunata, allin qharikunata, allin imaymana atiqkunata ima.

²Hinaspan rey Davidqa sayarispa paykunata nirqan: —Llaqta-masiykuna, wawqeykuna, uyariwaychis. Ñoqan yuyaykurqani Señor Diospaq huk wasita sayarichipuyta, hinaspa rimanakuynin cajata chayman churayta, Diosninchispa chakin chaypi samaykunanpaq. Lliwtañan wakichirqani wasita sayarichinaypaq.

³Diosmi ichaqa miwarqan: Manan qanqa ñoqapaq wasita sayarichipuwankimanchu, awqa-tinkuq kasqaykirayku runakunata wañuchisqaykiraykupiwan, nispa.

⁴Chaywanpas Israelpa Diosnin Señormi ñoqataqa akllawarqan taytaypa ayllun ukhumanta Israel suyupi wiñay rey kanaypaq. Judá ayllutan uma kananpaq akllarqan, Judapa ayllunkunamantataq taytaypa familianta akllarqan, taytaypa churinkuna ukhumantataq ñoqata akllawarqan, Israel suyuntinpi rey kanayta munasqanrayku.

⁵Askha wawakunatan Señor Diosqa qowarqan. Paykuna ukhumantan Señor Diosqa churiy Salomonta akllakurqan, paypa munaychakusqan Israel llaqta kamachikuy tiyanapi kamachikunanpaq.

⁶Señor Diosmi niwarqan: Churiyki Salomonmi wasitapas patiokunatapas sayarichipuwanqa, paytan churiy kananpaq akllakuni, ñoqan paypa taytan kasaq.

⁷Kunan hinachus kamachikuyniykunata unanchayniykunatapas makilla hunt'anqa chayqa, wiñaypaqmi kamachikuyninta sayachisaq, nispa.

⁸Chay hinaqa, Señor Diospa llaqtan Israel runakunaq qayllanpi, Apu Señor Diosninchispa uyarishasqan, allinta yuyaykuspa hunt'aychis paypa llapan kamachikuyninkunata kay sumaq hallp'ata hap'ikapunaykichispaq, hinaspa wañukapuspaykichis wawaykichisman herenciata wiñaypaq saqenaykichispaq.

⁹Qantaq, churíy Salomón, reqsikuy taytaykiq Diosninta, hinaspa serviy tukuy sonqowan, tukuy yuyaywan. Señor Diosqa llapan runakunaq sonqontan t'aqwin, yachantaq pakasqa lliw yuyaykusqakunatapas. Maskhankichus Señor Diosta chayqa, tarinkin payta, saqerparinkitaqchus chayqa wiñaypaqmi payqa wikch'usunki.

¹⁰Qhawariy, Señor Diosmi akllakusunki pay yupaychana wasita sayarichinaykipaq. ¡Kallpachakuy! ¡Llank'allayña! nispa.

¹¹Hinaspan Davidqa churin Salomonman wasi ruwanapaq seq'ekunata qorqan haykuna wasimanta, wasikunamanta, waqaychana wasikunamanta, patanpi ukhunpi wasikunamanta, hucha pampachachina cheqasmantawan.

¹²Qollarqantaq paypa tukuy yuyaykusqan wasi ruwanapaq seq'ekunata, Señor Diospa wasin patiokunamanta, patiokunaq muyuriqninpi wasikunamanta, Dios yupaychaypaq serviciokuna waqaychana wasikunamanta, Diospaq t'aqasqa qokuykuna waqaychana wasikunamantawan.

¹³Willallarqantaq sacerdotekunapas Leví runakunapas t'aqa-t'aqa kashasqanta, Señor Diospa wasinpi tukuy llank'aykunata, Dios yupaychaypi apaykachananku tukuy serviciokunatawan.

¹⁴Davidmi kamachikurqan hayk'a qorichus kanman sapanka qori serviciopaq, hayk'a qolqechus kanman sapanka qolqe serviciopaq chayta:

¹⁵qori candeleropaq, qori lamparakunapaq, qolqe candeleropaq, qolqe lamparakunapaq,

¹⁶Diospa ñawpaqenpi churana t'antapaq sapanka qori mesapaq, sapanka qolqe mesapaqpas.

¹⁷Kamachillarqantaq hayk'a ch'uya qorichus kanman trinchekunata, puruñakunata, qerukunata, p'ukukunata ruwanapaq, hayk'a qolqechus kanman qolqe p'ukukunata ruwanapaq,

¹⁸hayk'achus ch'uya qori kanman incienso q'osñichina altarta ruwanapaq chaytapas. Davidqa qollarqantaq huk seq'eta Diospa carretan nisqa qori raphrayoqkunamanta, chaykunan mast'arisqa raphranwan Señor Diospa rimanakuynin cajata pakarqanku.

¹⁹Davidmi nirqan: Tukuy kay seq'ekunatan Señor Diosqa qelqachiwarqan, imaynatachus chay llank'aykunapi llank'anataqa lliwtan yachachiwarqan, nispa.

²⁰Hinaspan Davidqa churin Salomonta nirqan: —Kallpachakuy, qhari kay, llank'allayña. Ama manchakuychu, amataq pisi kallpayaychu, Apu Señor Diosniymi qanwan kanqa. Payqa manan saqesunkichu, manataq wikch'usunkichu Señor Dios yupaychana wasipi tukuy llank'aykunata tukunaykikama.

²¹Kaypin kashanku sacerdote t'aqakuna Leví runa t'aqakunapas Señor Diospa wasinpi tukuy llank'aykunata llank'anankupaq, hinallataq tukuy llank'ay atiq qharikunapas usqhaylla yanapanasuykipaq. Oficialkunapas llapan runakunapas lliw kamachisqaykitaqa kasusunkipunin, nispa.