Read Quechua Cuzco Bible 1988 1 CRÓNICAS 29 Bible Online

1 CRÓNICAS 29 - Quechua Cuzco Bible 1988 bible

1 CRÓNICAS 29

¹Chaymantataq Davidqa llapan huñuykusqa runakunata nirqan: —Diosqa churiy Salomonllatan akllakurqan. Payqa warmallaraqmi, manan yuyaykukuytapas yachanraqchu. Llank'ananqa ancha hatunmi, manan wasitaqa runakunapaqchu sayarichinqa, aswanpas Señor Diospaqmi.

²Chaymi tukuyta atisqayman hina askhata huñurqani Diosniypa wasinta sayarichinanpaq: qorita, qolqeta, bronceta, fierrota, kurkutawan, sapanka chaykunawan tukuy necesitasqanta ruwananpaq, huñullarqanitaq yanayoq-yuraq umiñata, ch'olqochina umiñakunata, color-color rumikunata, tukuy t'aqa umiñakunata, yuraq qespi rumikunatapas askhatapuni.

³Tukuy chay huñusqaykunamanmi yapaykullanitaq Diosniypa wasinta munakusqayrayku. Ñoqaq kaqniykunamantan qorita qolqetawan qoni:

⁴pachak waranqa kilo ch'uyay-ch'uya qorita, iskay pachak kinsa chunka waranqa kilo ch'uya qolqeta, yupaychana wasi perqakunata qatanapaq,

⁵qori serviciokunapaq, qolqe serviciokunapaq, artesanokunaq tukuy imaymana ruwanankupaqwan. Chay hinaqa, ¿mayqenniykichistaq mana mich'akuspa tukuy sonqo Señor Diospaq qoyta munankichis? nispa.

⁶Hinan ayllu umallikuna, waranqa soldadoq umallinkuna, pachak soldadoq umallinkuna, ayllu oficialkuna, reypa kaqninkunapi kamachikuqkunapas tukuy sonqo ofrendankuta aparqanku

⁷Señor Diospa wasinta sayarichinapaq: pachak soqta chunka phisqayoq waranqa kilo qorita, chunka waranqa qorimanta qolqeta, kinsa pachak kinsa chunka waranqa kilo qolqeta, soqta pachak waranqa kilo bronceta, kinsa waranqaq waranqan kinsa pachak waranqa kilo fierrotawan.

⁸Umiñayoq llapan runakunapas umiñankuta qorqanku Señor Diospa wasinpi qhapaq-kaykunapaq. Chaykunatan waqaycharqan Gersonpa miraynin Jehiel.

⁹Chaymi llapa llaqta anchata kusikurqanku tukuy sonqo ofrendankuta Señor Diospaq qosqankumanta. Hinallataq rey Davidpas anchatapuni kusikurqan.

¹⁰Chaymantataq Davidqa llapa huñuykusqa runakunaq qayllanpi Señor Diosta hatunchaspa nirqan: —Jacob machulaykuq Diosnin Señor wiñay-wiñaykama yupaychasqan kanki.

¹¹Qanqa, Señor Diosníy, hatunmi atiyniyoqmi kanki, qanqa manchanataq qhapaqtaq lliphlli-kayniyoqtaq kanki. Qanpan hanaq pachapi kay pachapi tukuy kaqkunapas. Qanmi, Señor Diosníy, munaychakunki, qanmi hatunchasqa Qollanaqa kanki.

¹²Qanmantan qhapaq-kaypas atiypas hamun, llapallantan qanqa kamachinki. Qanpan kallpapas atiypas, llapallanta hatunchanaykipaqpas kallpachanaykipaqpas.

¹³Chay hinaqa, Diosniyku, graciastan qoykiku, qollanan sutiykitataq yupaychaykiku.

¹⁴¿Imataq ñoqari kani? ¿Imataq llaqtaypas, mana mich'akuspa qonaykupaq? Tukuymi qanpa, qanmanta chaskisqallaykutan qoykiku.

¹⁵Ñoqaykuqa wak llaqtayoq qorpachakuq runa hinallan ñawpaqeykipi kayku, imaynan llapan machulaykupas karqan hina. Kay pachapi kawsayniykupas llanthu hinallan chinkaripun, manan unaytachu takyan.

¹⁶¡Ay! Apu Señor Diosniyku, ch'uya sutiykipaq wasita sayarichinaykupaq huñusqayku kay llapan ofrendakunataqa qanmi qowarqankiku, qanpa kaqniykitaq llapanpas.

¹⁷Yachanin, Diosníy, sonqokuna t'aqwiq kasqaykita, chaninkaqta munasqaykitapas, chaymi kay llapan ofrendakunata apamuyki tukuy sonqo, chanin-kay sonqoywan. Kusikunitaqmi kaypi huñuykusqa llaqtaykiwanpas, tukuy sonqo ofrendankuta qosqasuykita rikuspa.

¹⁸Abraham, Isaac, Jacob machulaykuq Diosnin Señorniyku, kay llaqtaykiq sumaq sonqonta yuyaykukuynintapas kaqllata wiñaypaq waqaychay, qanta kasukuq sonqotataq qoy,

¹⁹Salomón churiymanpas qoykapuway qanta kasukuq sonqota, kamachikuyniykikunata, chaninchayniykikunata, unanchayniykikunatapas hunt'ashanallanpaq, tukuyta llank'aspantaq wasita sayarichipunasuykipaq, chaypaqmi ñoqa wakichiniña, nispa.

²⁰Chaymantataq Davidqa llapa huñuykusqa runakunata nirqan: —¡Yupaychaychis Apu Señor Diosninchista! nispa. Hinan llapa huñusqa runakunaqa machulankuq Diosnin Señorta yupaycharqanku, hinaspa paypa ñawpaqenpi reypa qayllanpi qonqor-chaki k'umuykukurqanku.

²¹Qhepantin p'unchaytaq Señor Diosman sacrificiokunata haywarqanku, ruphachina sacrificiokunatapas ruphachirqanku waranqa torillota, waranqa borregota, waranqa anejotawan, sapankata vino ofrendantintakama. Haywallarqankutaq askha sacrificiota llapan Israel runakunamanta.

²²Chay p'unchaymi ancha kusisqa Señor Diospa ñawpaqenpi mikhurqanku ukyarqanku, hinaspa iskaykaq kutipi Davidpa churin Salomonta rey kasqanta sut'incharqanku, Señor Diospa qayllanpi uma kananpaq aceitewan hawispanku. Sadoktataq sacerdotepaq aceitewan hawirqanku.

²³Hinan Salomonqa Señor Diospa kamachikuy tiyananpi rey tiyaykurqan, taytan Davidpa rantinpi. Salomonpaqqa tukuymi allinkama karqan, llapan Israel runakunapas paytaqa kasurqanmi.

²⁴Hinataq llapan oficialkuna, allin qharikuna, rey Davidpa churinkuna ima rey Salomonta kasukunankupaq prometekurqanku.

²⁵Señor Diostaq anchata Salomonta hatuncharqan, chaytan llapan Israel runakunaqa yacharqanku. Suyu kamachisqanpitaq hatun atiyta qorqan, chaymi Israel suyupi ñawpaqta mana pay hina reyqa karqanchu.

²⁶Isaipa churin Davidqa llapan Israel suyupi kamachikurqan tawa chunka watata. Qanchis wata Hebronmanta kamachikurqan, Jerusalenmantataq kinsa chunka kinsayoq watata.

²⁸Payqa sinchi yuyaqñan wañukapurqan, qhapaq-kayninpipas yachayninpipas ch'isiyasqa runaña.

²⁹Rey Davidpa ruwasqankunaqa qallariymanta p'uchukaykama qelqasqan kashan profeta Samuelpa Willakuynin Qelqapi, profeta Natanpa Willakuynin Qelqapi, profeta Gadpa Willakuynin Qelqapiwan.

³⁰Llapan kamachikusqankunamanta, atiyninmanta, hinallataq Israel suyupi, llapan wak suyukunapipas imaymana payta qatisqanmantawan qelqasqallataq kashan.