Read Quechua Cuzco Bible 1988 2 Crónicas 12 Bible Online

2 Crónicas 12 - Quechua Cuzco Bible 1988 bible

2 Crónicas 12

¹Roboamqa kamachikuyninpi allin takyasqa atiyniyoq kaspanmi, llapan runankunapiwan Señor Diospa kamachikuy siminta saqepurqan.

²Chaymi Señor Diosta mana kasukuq kasqanku hawa, tawa wata kurakña Roboamqa Judá suyupi kamachikushaqtin Egipto rey Sisakqa Jerusalén contra maqanakuq hamurqan.

³Paywanmi Egiptomanta hamurqanku waranqa iskay pachak carretakuna, soqta chunka waranqa caballoyoq soldadokuna, mana yupay atiy Libia runakuna, Suki runakuna, Etiopía runakuna ima.

⁴Hinan Judapi pukara llaqtakunata munaychakuspan Jerusalenkama chayarqan.

⁵Roboamtaq Judá umallikunapiwan Jerusalenpi huñukusharqanku Sisak contra maqanakunankupaq, hinan profeta Semaiasqa paykunaman rispa nirqan: —Señor Diosmi nin: Qankunaqa saqerpariwarqankichismi, chayrayku ñoqapas qankunata Sisakman hap'ichisqaykichis, nispa, nispan.

⁶Hinan reyqa Israel umallikunapiwan huch'uyyaykukuspa nirqanku: —¡Chaninmi Señor Diosqa! nispa.

⁷Chaymi Señor Diosqa huch'uyyaykukusqankuta rikuspa profeta Semaiasta nirqan: —Rikunin huch'uyyaykukusqankuta, manan ch'usaqyachisaqchu aswanpas usqhayllan qespichisaq, hinaña k'arak phiñasqa kashaspaypas manan Jerusalenta Sisakwan muchuchisaqchu.

⁸Ichaqa Sisakpa kamachinmi kanqaku, ahinapi yachanqaku imaynachus ñoqa serviy kasqanta, imaynataqchus kay pacha reykuna serviypas kasqantawan, nispa.

⁹Egipto rey Sisaktaq Jerusalén contra phawaykurqan, hinaspa hap'ikapurqan Señor Diospa wasinpi llapan qhapaq-kaykunata, reypa wasinpi llapan qhapaq-kaykunata, Salomonpa ruwachisqan qori escudokunatawan, llapan chaykunatataq aparqan.

¹⁰Chaymi rey Roboamqa qori escudokunaq rantinpi ruwachirqan bronce escudokunata, hinaspa guardia umallikunaman qorqan. Paykunan reypa wasi punkunta qhawarqanku.

¹¹Señor Diospa wasinta Roboam sapa kuti riqtinmi, guardiakunaqa chay escudokuna apantin riysirqanku, kutipuqtintaq kaqta churaykapurqanku waqaychana wasiman.

¹²Roboampa huch'uyyaykukusqan hawan Señor Diospa phiñakuyninqa tiyaykurqan, chaymi mana hukpaqkamachu ch'usaqyachirqan, Judá suyupipas allillan imapas karqan.

¹³Roboamqa Jerusalenpi kamachikuyninta allinta takyachispanmi kamachishallarqan. Payqa kamachikuyta qallarishaspa tawa chunka hukniyoq watayoqmi karqan, kamachikurqantaq chunka qanchisniyoq watata Jerusalenmanta, chay llaqtatan Señor Diosqa Israelpi llapa llaqtakunamanta akllakurqan chaypi pay yupaychasqa kananpaq. Roboampa mamanqa Amón llaqtayoq Naama karqan.

¹⁴Roboamqa manan tukuy sonqochu Señor Diosta maskharqan, chaymi mana chaninta ruwarqan.

¹⁵Paypa lliw ruwasqankunaqa qelqasqa kashan Profeta Semaiaspa Qelqanpi, Profeta Iddoq Miray Qelqa qelqasqanpiwan.

¹⁶Roboamqa Jeroboamwan tukuy tiempon maqanakurqanku.

¹⁷Wañupuqtintaq Roboamtaqa Davidpa Llaqtan nisqapi p'ampapurqanku. Paypa rantinpitaq churin Abías kamachikurqan.