Read Quechua Cuzco Bible 1988 2 Crónicas 14 Bible Online

2 Crónicas 14 - Quechua Cuzco Bible 1988 bible

2 Crónicas 14

¹Wañukapuqtinmi Abiastaqa Davidpa Llaqtan nisqapi p'ampapurqanku, rantinpitaq churin Asa kamachikurqan. Asaq tiemponpin suyupi runakuna chunka watata thak-kaypi kawsarqanku.

²Asaqa Apu Señor Diosninpa munayninman hinan allinta chaninta ruwarqan.

³Wikch'urqanmi wak dioskuna yupaychana altarkunata, moqo patakunapi yupaychana cheqaskunata, hinallataq yupaychana saywa rumikunata p'akirqan, Asera nisqa diosaq rikch'aynintapas thunirqan.

⁴Judá runakunatapas kamachirqanmi machulankuq Diosnin Señorta servinankupaq, yachachikuyninkunatapas kamachikuyninkunatapas hunt'anankupaqwan.

⁵Judá suyuq llapan llaqtankunapi kashaq moqo patakunapi yupaychana cheqaskunata, incienso q'osñichina altarkunatapas wikch'urqanmi. Judá suyu runakunaqa thak-kaypin kawsarqan paypa kamachisqan tiempopi.

⁶Hinan Judapi pukarayoq llaqtakunata allicharqan, suyupi thak-kay kasqanrayku. Manan chay tiempopi Judá contra awqa-tinkuy karqanchu, paykunaman Señor Dios thak-kawsayta qosqanrayku.

⁷Chaymi Asaqa Judá runakunata nirqan: —Wakmanta allichasun chay llaqtakunata, hinaspa muyuykuchisun alto perqawan torrekunawan, churasuntaq punkukunata punku wisq'anakunatawan. Kay suyuqa munayninchispin kashan, Apu Señor Diosninchista maskhasqanchisrayku, ñoqanchisqa munaynintan ruwarqanchis, chaymi payqa llapan qorpanchiskunawan sumaqpi kawsachiwanchis, nispa. Ahinapin chay llaqtakunata sayarichirqanku, allillantaq kawsarqankupas.

⁸Asaq soldadonkunan karqan Judá ayllumanta kinsa pachak waranqa hatun escudowan espadawan wakiyaqkuna, Benjamín ayllumantataq iskay pachak pusaq chunka waranqa huch'uy escudowan p'eqtawan wach'iqkuna. Llapan chay soldadokunaqa allin maqanakuy yachaq qharikunan karqanku.

⁹Chaymantataq Etiopía runa Zera sutiyoq Judá runakuna contra maqanakuq rirqan waranqa-waranqa soldadokunayoq, kinsa pachak carretakunayoq ima, hinaspa chayarqan Maresaman.

¹⁰Asataq paykuna contra maqanakuq rirqan, hinan Maresa llaqta qayllapi kashaq Sefata wayq'opi maqanakunankupaq wakichikurqanku.

¹¹Asataq Apu Señor Diosninmanta mañakurqan: Señor Diosnilláy, qanllapunin kanki pisi kallpa runata atiyniyoqmanta hark'aykukuq. Apu Señor Diosniyku, yanapaykuwayku, qanmanmi hap'ipakuyku, sutiykipitaqmi kay sinchi askha soldadokunawan maqanakusaqku. Señornilláy, qanmi Diosniyku kanki, runaqa manapunin atipasunkimanchu, nispa.

¹²Hinan Señor Diosqa Etiopía soldadokunata atipachirqan Asawan llapan Judá soldadokunawan ima, chaymi paykunaqa ayqekapurqanku.

¹³Asataq soldadonkunapiwan Gerarkama qatirqanku, hinan Señor Diosqa paykunawan Etiopía soldadokunata mana ch'ullayoqta wañuchirqan. Chaymantataq Judá soldadokunaqa llat'anasqata askhata aparqanku.

¹⁴Señor Diosmi Gerar qayllapi kashaq llapa runakunata sinchita llaksarqan, chaymi llaqtankuta thunirqanku. Chay llaqtakunapiqa askha kawsaykunan karqan, chaykunatan soldadokunaqa llat'anarqanku.

¹⁵Hinallataq phawaykurqanku uywa michiqkunaq karpankunamanpas, hinaspa aparqanku askha ovejakunata camellokunatawan. Chaymantataq Jerusalenman kutipurqanku.