Read Quechua Cuzco Bible 1988 2 Crónicas 18 Bible Online

2 Crónicas 18 - Quechua Cuzco Bible 1988 bible

2 Crónicas 18

¹Rey Josafatqa ancha mentasqa askha qhapaq-kayniyoqmi karqan, Ahabwantaq layasintin kapurqan.

²Chaymantataq pisi watakunamanta Samaria llaqtata uraykurqan rey Ahabta watukuq. Chaymi Ahabqa ovejakunata torokunata nak'achirqan Josafatpaqpas riysiqnin llapan oficialkunapaqpas, hinaspa Josafat-ta Galaadpi Ramot contra maqanakuq riysinanpaq tanqarispa

³nirqan: —¡Galaadpi Ramot llaqtaman phawaykuqtiy riysiwankimanchu? nispa. Josafat-taq kutichirqan: —Ñoqapas soldadoykunapas huk-nisqan kashayku qanwanpas runaykikunawanpas, riysisqaykikun awqa-tinkuq riqtiykiqa.

⁴Ichaqa Señor Diospa munaynintaraq tapuchiy, nispa.

⁵Hinan Israel reyqa tawa pachak profetakunata huñurqan, hinaspa paykunata tapurqan: —¿Galaadpi Ramot llaqtaman phawaykuymanchu? Icha, ¿amachu? nispa. Profetakunataq kutichirqan: —Arí, phawaykuy, Diosmi qanman hap'ichisunki, nispa.

⁶Josafat-taq tapuykurqan: —¿Manachu kaypi kan Señor Diospa huk profetan? Paytapas tapurillasunmantaq, nispa.

⁷Ahabtaq Josafatman kutichirqan: —Arí, kashanmi huk profeta, paywan Señor Diosta tapuchinanchispaq. Payqa Imlaq churin Mikaiasmi, ichaqa cheqnikunin paytaqa, manan hayk'aqpas allinkunata willawanchu, aswanpas mana allinkunallatapunin, nispa. Josafat-taq nirqan: —Ama chay hinata rimaychu, nispa.

⁸Hinan Ahabqa huk oficialninta waqyarispa kamachirqan: —Imlaq churin Mikaiasta pusarqamuway, nispa.

⁹Israel rey Ahabpas Judá rey Josafatpas rey p'achayoqmi kasharqanku, Samaria llaqtaman haykuna erapitaq tiyasharqanku kamachikuy tiyanankupikama, llapan profetakunataq ñawpaqenkupi profetizarqan.

¹⁰Kenaanaq churin Sedekiastaq fierro waqrakunata ruwakusqa, paymi qaparirqan: —Señor Diosmi nin: Kay waqrakunawanmi Siria runakunata waqranki llapanta wañuchinaykikama, nispan, nispa.

¹¹Llapan profetakunapas kaqtakama nirqanku: —Phawaykuy Galaadpi Ramot llaqtaman, atipankin, Señor Diosmi qanman hap'ichisunki, nispanku.

¹²Mikaías waqyamuqta kachasqa runataq Mikaiasta nirqan: —Llapan profetakunan huk-nisqalla reypa allinnintakama rimanku. Qanpas paykuna hina reypa allinninta rimallaytaq, nispa.

¹³Mikaiastaq nirqan: —¡Señor Diospa sutinpin jurani, imatachus Diosniy rimanaypaq kamachiwanqa, chayllatan rimasaq! nispa.

¹⁴Chaymantataq reyman qayllaykurqan, hinan reyqa tapuykurqan: —Mikaías, ¿Galaadpi Ramot llaqtaman phawaykuymanchu? Icha, ¿amachu? nispa. Mikaiastaq nirqan: —Arí, phawaykuychis, atipankichismi, paykunataqa hap'ichisunkichismi, nispa.

¹⁵Reytaq ichaqa kutichirqan: —¿Hayk'a kutitan nisqayki: Señor Diospa sutinpi juraspan cheqaqkaqtaqa willawanki, nispa? nispa.

¹⁶Hinan Mikaiasqa nirqan: —Orqo-orqopi ch'eqesqatan llapan Israel runakunata rikurqani, mana michiqniyoq ovejakunata hina. Señor Diosmi nirqan: Kay runakunaqa mana umalliyoqmi, sapanka wasinkuta ama llakisqalla kutipuchunku, nispan, nispa.

¹⁷Israel reytaq Josafat-ta nirqan: —Nishaykin riki, manan hayk'aqpas kay runaqa allinkaqta willawanmanchu, aswanpas mana allinkaqllatapunin, nispa.

¹⁸Mikaiastaq rimashallarqan: —Chhaynaqa, uyariy Señor Diospa rikuchiwasqanta: Señor Diostan rikurqani kamachikuy tiyananpi tiyashaqta, pañanpipas lloq'enpipas llapan hanaq pachapi kashaqkuna sayashaqta.

¹⁹Hinan Señor Diosqa tapuykurqan: —¿Pitaq rinman Israel rey Ahabta tanqariq, Galaadpi Ramot llaqtaman phawaykunanpaq, hinaspa chaypi wañunanpaq? nispa. Hinan nirqanku hukkuna hukta, wakinkunataq huk-hinata.

²⁰Chayllamanmi huk espíritu Señor Diospa ñawpaqenman asuykuspa nirqan: —Ñoqan tanqarimusaq, nispa. Hinan Señor Diosqa tapuykurqan: —¿Imaynatataq ruwawaqri? nispa.

²¹Espiritutaq kutichirqan: —Reypa llapan profetankunatan llullakuyta rimachisaq, nispa. Chaymi Señor Diosqa nirqan: —Phaway q'otumuy, allinpunin kanqa, nispa.

²²Chhaynaqa yachay, Señor Diosmi llullakuy espirituta llapan kay profetaykikunaq siminman churan, hinallataq Señor Diosqa wañunaykita unanchan, nispa.

²³Hinan Kenaanaq churin Sedekiasqa qayllaykuspa Mikaiasta uyapi ch'aqlaspa nirqan: —¿Maynintan Señor Diospa Espiritun ñoqamanta lloqsirqorqan qanman rimaykunasuykipaq? nispa.

²⁴Mikaiastaq kutichirqan: —Huk wasiq ukhunpi pakakuspa ayqenki chay p'unchayñan yachanki, nispa.

²⁵Chaymi Israel reyqa kamachirqan: —¡Hap'iychis Mikaiasta, hinaspa llaqta kamachiq Amonman churiy Joasmanwan apaychis!

²⁶Niychis paykunata: —Reymi kamachisunkichis watay wasiman wisq'anaykichispaq, hinaspa huch'uy t'antallata pisi unullatawan qonaykichispaq, allillan qhalilla rey kutimunankama, nispa, nispaykichis.

²⁷Mikaiastaq nirqan: —Allinchus qhalitaqchus kutimunki chayqa, kay nisqayqa manan Señor Diospa siminchu, nispa. Yapaykuspataq nirqan: —Llapan runakuna, allinta kayta yuyaychis, nispa.

²⁸Chaymantataq Israel rey Ahabqa Judá rey Josafatpiwan Galaadpi Ramot llaqtaman wicharqanku.

²⁹Hinan Israel reyqa Josafat-ta nirqan: —Huk-hina p'achayoq maqanakuyman risaq, qantaq rey p'achaykiwan churakunki, nispa. Chhaynaqa huk-hina p'achayoqmi Ahabqa maqanakuyman rirqan.

³⁰Siria reyqa carretakunata purichiq umallikunatan kamachisqa: Aman piwanpas maqanakunkichischu, aswanpas Israel rey Ahabllawanmi, nispa.

³¹Carretakunata purichiq umallikunataq Josafat-ta rikurqospanku Israel rey Ahab kananpaq yuyarqanku, chaymi payman kutirirqanku phawaykunankupaq. Josafat qapariqtintaq Señor Diosqa amachaykurqan, awqankunatapas paymanta karuncharqan.

³²Chaymi carretakunata purichiq umallikunaqa mana Israel rey Ahabchu kasqanta rikuspa, manaña qatirqankuchu.

³³Ichaqa huk soldadon wach'inanwan ch'usaqllaman wach'irqan, chay wach'isqan Israel reypa coraza k'akllunta haykurqan. Chaymi Ahabqa carreta purichiqta nirqan: —¡Kutichimuy carretata! ¡Horqopuway maqanakuymanta! ¡K'irisqan kashani! nispa.

³⁴Chay p'unchayqa sinchitapunin maqanakurqanku, chaymi reyqa Siria soldadokunaq chimpanpi ch'isinkama carretanman k'askaykukuspa sayasharqan. Inti chinkaykuytataq wañupurqan.