Read Quechua Cuzco Bible 1988 2 Crónicas 19 Bible Online

2 Crónicas 19 - Quechua Cuzco Bible 1988 bible

2 Crónicas 19

¹Judá rey Josafatqa Jerusalén llaqtapi wasinman allillan kutipushaqtinmi,

²Hananiq churin profeta Jehuqa payman qayllaykuspa nirqan: —¿Imanaqtinmi mana chanin runakunata yanapanki? ¿Señor Diosta cheqniqkunatachu munakunki? Chay ruwasqaykimantan Señor Diosqa qanpaq phiñakun.

³Chaywanpas wakintaqa allintan ruwarqanki, Judá suyuntinmanta Asera nisqa diosaq rikch'ayninkunata wikch'uspayki, tukuy sonqo Señor Diosta servinaykipaq yuyaykukurqanki, nispa.

⁴Josafatqa Jerusalenpin tiyarqan, hinaspa suyupi llaqtakunata watukuq puririrqan Beersebamanta Efraín orqo-orqokama, runakunata machulankuq Diosnin Señorman kutirikunankupaq kallpachaspa.

⁵Judá suyuntinpi llapan pukara llaqtakunapitaq juezkunata churarqan.

⁶Hinaspa chay juezkunata nirqan: —Allinta yuyaykuychis ruwanaykichispaq. Manan runakunaq sutinpichu t'aqtankichis, aswanpas Señor Diospa sutinpin, payqa qankunawanmi kashan t'aqtashaqtiykichis,

⁷chhaynaqa, Señor Diosta manchakuywanpuni lliwta ruwaychis. Allinta yuyaykuspapuni kuskachaychis, Apu Señor Diosninchisqa chaninmi, payqa manan runakunaman sayapakunchu, manataq lluk'iykusqa chaskinatapas munanchu, nispa.

⁸Jerusalenpipas Josafatqa churallarqantaqmi juezkunata Señor Diospa kamachikuy siminta p'akiqkunata Jerusalenpi tiyaq runakunaq ch'aqwayninkunata t'aqtanankupaq. Chaykunan karqan wakin Leví runakuna, sacerdotekuna, Israel ayllu umallikuna ima.

⁹Hinan Josafatqa paykunata kamachirqan: Señor Diosta manchakuywanmi lliwta ruwankichis, hunt'aq-kay chanin-kay sonqowan.

¹⁰Llaqtakunapi tiyaq wawqeykichiskuna hamusunkichis, sasachakuyninkunata quejakuspanku, runa wañuchisqamantapas kamachikuy simimantapas, unanchaymantapas, chaninchaymantapas chayqa, paykunata anyaychis Señor Dios contra ama huchallikunankupaq, mana chayqa Señor Diosmi phiñakunqa qankunapaqpas wawqeykichispaqpas. Chhaynata ruwaspaykichisqa, manan huchallikunkichischu.

¹¹Sacerdote Amariasmi Señor Diospa tukuy unanchayninkunapi umalliykichis kanqa, Judá ayllu umalli Ismaelpa churin Zebadiastaq reypa tukuy kamachikuyninkunapi umalliykichis kanqa. Leví runakunataq oficialniykichis kanqa. ¡Kallpachakuychis ahinata ruwanaykichispaq! Señor Diosqa allin ruwaqta yanapachun, nispa.