Read Quechua Cuzco Bible 1988 2 Crónicas 2 Bible Online

2 Crónicas 2 - Quechua Cuzco Bible 1988 bible

2 Crónicas 2

¹Salomonqa yuyaykukurqanmi Señor Diosta yupaychanapaq wasita sayarichiytapas paypaq wasi sayarichikuytapas.

²Chaymi payqa chay llank'aypaq churarqan qanchis chunka waranqa qharikunata rumi q'epiqpaq, pusaq chunka waranqa qharikunata orqopi rumita ch'eqtaqpaq, chay llank'aqkunata llank'achiqpaqtaq kinsa waranqa soqta pachakniyoq qharikunata churarqan.

³Chaymantataq Salomonqa Tiro rey Hiramman willaqta kacharqan: Imaynan David taytayman cedro kurkukunata apachirqanki tiyanan wasita ruwakunanpaq, chay hinallataq ñoqamanpas apachimuway.

⁴Ñoqan Apu Señor Diosniy yupaychanapaq wasita sayarichipusaq, hinaspa paypaq t'aqasaq. Chaypin sumaq q'apaq incienso Señor Diospa ñawpaqenpi q'osñichikunqa, paypa ñawpaqenpi churana t'anta mana p'itiyta churakunqa, sapa p'unchaytaq ch'isin paqar ruphachina sacrificio haywakunqa, hinallataq samana p'unchaypi, Mosoq Killa Fiestapi, Apu Señor Diosniykuq fiestankunapi ima. Diosmi kamachirqan Israel runakunata chay ruwaykunata mana p'itiyta ruwashanallankupaq.

⁵Sayarichisaq chay wasiqa sinchi hatunmi kanqa, Apu Señor Diosniyku llapan dioskunamanta hatun atiyniyoq kasqanrayku.

⁶Chaywanpas, ¿pitaq Señor Diospaq wasita sayarichipuyta atinman, hanaq pachapas ancha hatun kashaspa mana chaskiyta atishaqtin? Ñoqaqa manan imapaschu kani paypaq wasita sayarichipunaypaqqa, inciensota q'osñichinallapaqchá sayarichipuymanpas.

⁷Chay hinaqa, huk qharita kachamuway qoripi, qolqepi, broncepi, fierropipas llank'ay yachaqta, sani-puka q'aytumanta, rawraq-puka q'aytumanta, llawlli-puka q'aytumanta away yachaqta, metalpipas k'iñay yachaqta. Paymi Judapi Jerusalenpi taytaypa churasqan artesanoykunapiwan llank'anqa.

⁸Apachimullawaytaq Libanomanta cedro kurkukunata, pino kurkukunata, sándalo kurkukunatawan. Allintan yachani kamachiykikuna sach'ata kumpaq kasqankuta. Ñoqaq kamachiykuna qanpa kamachiykikunawan kuska llank'anqaku

⁹askha kurkuta wakichipuwaspanku, sayarichinay wasiqa ancha hatun musphana kanqa chayrayku.

¹⁰Sach'a kumpaq kamachiykikunamanqa qosaqmi mikhunankupaq iskay chunka waranqa fanega trigota, iskay chunka waranqa fanega cebadata, iskay chunka waranqa litro aceiteta, iskay chunka waranqa litro vinotawan, nispa.

¹¹Hinan Tiro rey Hiramqa Salomonman kay hinata qelqarqan: Llaqtanta munakuspanmi Señor Diosqa paykunaq reyninta churarqasunki.

¹²Yupaychasqa kachun Israelpa Diosnin Señorqa. Paymi hanaq pachatapas kay pachatapas kamarqan. Rey Davidmanpas churita qorqan yachaysapata, allin yuyayniyoqta, allin chaninchaqta, Señor Diospaq wasita ruwapunanpaq, suyu kamachina wasitapas ruwakunanpaq.

¹³Chay hinaqa, kachamushaykin tukuy llank'ay atiq yachaysapa qharita, paymi Huram-abi sutiyoq,

¹⁴Tiro llaqta qhariq churin, Dan ayllu warmiq churin. Payqa kusatan llank'ayta yachan qoripi, qolqepi, broncepi, fierropi, rumipi, kurkupi, yachallantaqmi awayta sani-puka q'aytumanta, llawlli-puka q'aytumanta, rawraq-puka q'aytumanta, lino q'aytumantapas. Hinallataq payqa yachan tukuy t'aqa k'iñayta, imayna rikch'aq seq'eta chaskispapas payqa atinmi metalpi k'iñayta. Paymi llank'anqa artesanoykikunawan wiraqochay David taytaykiq artesanonkunapiwan.

¹⁵Chay hinaqa, wiraqocháy, rimarisqaykiman hina apachimuwayku trigota, cebadata, aceiteta, vinotawan.

¹⁶Ñoqaykuqa hayk'an munasqaykitan Libanomanta kurkuta wit'umusaqku, hinaspataq mama qochanta chaqllasqa tuytushaqta Jopekama apamusaqku, chaymantan ichaqa qanña Jerusalenman apachikunki, nispa.

¹⁷Salomonqa Israel suyupi tiyaq llapan wak llaqtayoq runakunatan yupachirqan, taytan Davidpa yupachisqanta hina, yupasqakunataq pachak phisqa chunka kinsayoq waranqa soqta pachakniyoq qharikuna karqan.

¹⁸Hinan chay qharikunata rakirqan, qanchis chunka waranqata rumi q'epiqpaq, pusaq chunka waranqata orqopi rumi ch'eqtaqpaq, kinsa waranqa soqta pachaktataq chay llank'aqkunata llank'achiqpaq.