Read Quechua Cuzco Bible 1988 2 Crónicas 31 Bible Online

2 Crónicas 31 - Quechua Cuzco Bible 1988 bible

2 Crónicas 31

¹Chay fiesta lliw tukukapuqtintaq fiestapi kaq llapan Israel runakuna Judá suyuq llaqtankunata puririrqanku, hinaspa yupaychana saywa rumikunata p'akirqanku, Asera nisqa diosaq rikch'ayninkunatapas thunirqanku. Hinallataq Judapi, Benjaminpi, Efrainpi, Manasespiwan kashaq llapan wak'a dios yupaychana cheqaskunata altarkunatapas lliwta thunirqanku. Chaymantataq paykunaqa llaqtankuman kutipurqanku, sapanka hallp'ankumankama.

²Ezekiasqa wakmanta sacerdotekunata Leví runakunata tupaqninkuman hina t'aqa-t'aqata llank'ayninkuman churarqan. Paykunatan churarqan ruphachina sacrificiota sumaq kawsay sacrificiotawan haywanankupaq, yupaychana wasipi graciasta qonankupaq yupaychanankupaq, punkukunata qhawanankupaqwan.

³Rey Ezekiasqa Señor Diospa kamachikuynin qelqaman hina haciendanmanta qorqan ch'isin paqar ruphachina sacrificiopaq, samana p'unchaykunapi ruphachina sacrificiopaq, Mosoq Killa Fiestapi ruphachina sacrificiopaq, hatun fiestakunapi ruphachina sacrificiopaqwan.

⁴Jerusalén llaqtapi tiyaq llapan runakunatataq kamachirqan sacerdotekunaman Leví runakunamanwan tupaqninkuta qonankupaq, ahinapi paykuna Señor Diospa kamachikuyninman hina mana kuyuq llank'anankupaq.

⁵Chay kamachikuy ch'eqeriqtinmi Israel runakunaqa mana mich'akuspa ñawpaqkaq rurumanta qorqanku trigota, vinota, aceiteta, miel misk'ita, hayk'an chakra llank'asqanku rurukunatawan, hinallataq tukuy kaqninkumanta diezmonkuta askhatapuni aparqanku.

⁶Chhaynallataq Judá suyuq llaqtankunapi tiyaq Israel runakunapas Judá runakunapas wakamanta, ovejamanta, cabramantawan diezmonkuta qorqanku, hinallataq chakrankuq rurunmantapas diezmonkuta aparqanku Apu Señor Diosninkupaq t'aqasqa kananpaq, hinaspan chaykunata qotu-qotuta churarqanku.

⁷Kinsakaq killapin diezmonku qotuyta qallarirqanku, qanchiskaq killapitaq tukurqanku.

⁸Ezekiastaq oficialninkunapiwan diezmo qotusqanku qhawaq rirqanku, hinaspa chaykunata rikuspa Señor Diosta yupaycharqanku, Israel llaqtatataq samincharqanku.

⁹Ezekiastaq sacerdotekunata Leví runakunatawan tapuykurqan chay diezmo qotukunamanta.

¹⁰Hinan Sadokpa ayllunmanta uma sacerdote Azariasqa kutichirqan: Señor Diospa yupaychana wasinman apamuyta qallarisqankumantapachan ñoqaykuqa saksata mikhuyku, chaywanpas askhapunin puchuykun, llaqtanta Señor Dios saminchasqanrayku, chaymi kay askha ofrendakuna puchuykun, nispa.

¹¹Hinan Ezekiasqa kamachikurqan Señor Dios yupaychana wasipi kaq waqaychana wasikunata wakichinankupaq. Chay wasikunata wakichispankutaq

¹²chayman makilla waqaycharqanku sacerdotekunapaq kaq ofrendakunata, diezmokunata, Señor Diospaq t'aqasqakunatapas. Chayta waqaychaqpaqtaq rey Ezekiasqa yupaychana wasipi umalli Azariaspiwan churarqanku Leví runa Konaniasta umallita, wawqen Simeitataq payman qatiq umallita. Paykunaq kamachinkupi llank'aqkunatataq churarqan Jehielta, Azaziasta, Nahat-ta, Asaelta, Jeremot-ta, Jozabadta, Elielta, Ismakiasta, Mahat-ta, Benaiatawan.

¹⁴Inti Lloqsimuy nisqa Punku qhawaq Leví ayllumanta Imnaq churin Koretaq Diosman sumaq sonqo ofrendakunata, Señor Diospaq t'aqasqa ofrendakunata, ancha ch'uya ofrendakunata ima chaskinanpaq rakinanpaqwan churasqa karqan.

¹⁵Sacerdotekunaq tiyasqan llaqtakunapin Korepa llank'aqmasinkuna karqan Edén, Miniamin, Jesúa, Semaías, Amarías, Sekaniaspiwan. Paykunan sacerdotemasinkuta t'aqankuman hina tupaqninta kurakmanpas sullk'amanpas kuskata makilla rakirqanku.

¹⁶Kinsa watayoqmanta wichayman sacerdote t'aqa miraypi qelqasqakunaman tupaqninkuta rakirqanku, ahinatan chaskirqanku Señor Dios yupaychana wasita t'aqa-t'aqa llank'ayninkuman hina riqkuna.

¹⁷Sacerdotekunan ayllunkuman hina qelqasqa karqanku, Leví runakunataq iskay chunka watayoqmanta wichayman qelqasqa karqanku t'aqankuman hina, llank'anankuman hina.

¹⁸Paykunaqa llapa familiantinmi qelqasqa karqanku: wawankuna, warminkuna, churinkuna, ususinkuna ima. Tupaqninkuta chaskinankupaqmi sacerdotekunapas Leví runakunapas ch'uyanchasqaña karqanku.

¹⁹Aaronpa miraynin wakin qharikunan sacerdotekunaq tiyasqan llaqtakunaq muyuriqninpi tiyarqanku, chaymi sapanka llaqtapi huk sacerdote churasqa karqan paykunaman tupaqninta rakinanpaq. Hinallataq chay sacerdoteqa rakirqan mirayninkuman hina qelqasqa Leví runakunamanpas.

²⁰Chhaynatan Ezekiasqa Judá suyuntinpi ruwarqan. Apu Señor Diosninpa munayninman hina chaninta, cheqaqta, allinta ruwarqan.

²¹Ezekiasqa Diospaq hunt'aq-kaywan tukuy sonqowan yupaychana wasipi llank'ayta lliwta ruwarqan, hinallataq Diospa kamachikuyninkunata yachachikuyninkunatapas kasukurqan, chaymi payqa anchatapuni allinyarqan.