Read Quechua Cuzco Bible 1988 2 Crónicas 33 Bible Online

2 Crónicas 33 - Quechua Cuzco Bible 1988 bible

2 Crónicas 33

¹Manasesqa chunka iskayniyoq watayoqmi karqan kamachikuyta qallarishaspa, kamachikurqantaq Jerusalenmanta phisqa chunka phisqayoq watata.

²Payqa manapunin Señor Diospa munayninman hinachu ruwarqan, aswanpas Israelpa qayllanmanta Señor Diospa wikch'usqan suyukunaq mana chanin millay ruwasqankunatan ruwarqan.

³Taytan Ezekiaspa thunisqan wak'a dios yupaychana cheqaskunatan wakmanta sayarichirqan, Baal nisqa diospa altarninkunatapas, Asera nisqa diosaq rikch'ayninkunatapas ruwarqan, hinallataq hanaq pachapi kaq llapan ch'askakunatapas yupaycharqan.

⁴Manasesqa Señor Dios yupaychana wasipin altarkunata sayarichirqan, chay wasimantaqa khaynatan Señor Diosqa nisqa: Jerusalén llaqtapin wiñaypaq yupaychasqa kasaq, nispa.

⁵Iskaynin pationpipas hanaq pacha ch'askakunata yupaychananpaqmi altarkunata sayarichirqan.

⁶Churinkunatan Ben-Hinom wayq'opi sacrificiopi ruphachirqan, watuytapas layqakuytapas yacharqanmi, wañusqakunaq almanta rimachiqkunawanpas, mana allin espiritukunata rimachiqkunawanpas tapuchillarqantaqmi. Ruwasqankunaqa sinchi mana chaninmi karqan, manan Señor Diospa munayninman hinachu, ahinapin Señor Diosta phiñachirqan.

⁷Señor Dios yupaychana wasipipas thupaspa ruwasqan rikch'ayta churarqan, chay wasimantaqa Señor Diosmi Davidta churin Salomontawan nisqa: Israel llapan ayllukuna ukhupin akllakuni Jerusalén llaqtata kay wasitawan chaypi ñoqa yupaychasqallapuni kanaypaq.

⁸Kamachiy Moisespa Israel runakunaman qosqan kamachikuy simiykunata, yachachikuyniykunata, unanchayniykunatapas paykuna makilla hunt'anqaku chayqa, machulaykichisman qosqay suyumantaqa manapunin wikch'usaqchu, nispa.

⁹Manasestaq ichaqa Judá runakunata Jerusalenpi tiyaq runakunatapas waqllichirqan, Israel runakunataq qayllankumanta Señor Diospa wikch'usqan runakunamantapas aswantaraq huchallikurqanku.

¹⁰Hinan Señor Diosqa rimaykurqan Manasesta llaqtan runakunatapas, paykunataq ichaqa mana kasukurqankuchu.

¹¹Chaymi Señor Diosqa paykuna contra Asiria reypa ejerciton umallikunata kachamurqan, hinan chay umallikunaqa Manasesta presota hap'ispanku cadenawan watasqata senqanpi ganchoyoqta Babiloniaman aparqanku.

¹²Chaymantataq Manasesqa sinchi ñak'arichisqa kaspan, machulankunaq Diosnin Señorpa ñawpaqenpi huch'uyyaykukuspa rogaykukurqan.

¹³Chaymi Señor Diosqa mañakusqanta uyarispa sumaqta qhawarirqan, hinaspan Jerusalenman kutichipurqan, Judá suyutapas qopurqan. Hinan Manasesqa yacharqan Señor Diosllapuni Diosqa kasqanta.

¹⁴Chay qhepatataq Manasesqa Davidpa Llaqtan nisqa inti lloqsimuy lado perqata sayarichirqan Gihón pukyu inti haykuy wayq'o cheqasmanta Challwa Punkukama. Chay perqasqanmi Ofel moqota muyuykurqan, ancha altotaq karqanpas. Hinataq Judá suyuq llapan pukara llaqtankunaman ejército umallikunata churarqan.

¹⁵Hinallataq Señor Dios yupaychana wasimanta wikch'urqan wak dioskunata paypa churasqan rikch'ayta ima. Señor Dios yupaychana wasiq kasqan orqopi Jerusalén llaqtapi ruwasqan altarkunatapas lliwtan thunirqan, hinaspan llaqtamanta horqospa wikch'urqan.

¹⁶Chaymantataq Manasesqa Señor Diospa altarninta allicharqan, hinaspa chaypi sumaq kawsay sacrificiokunata, gracias qoy sacrificiokunatawan haywarqan. Judá runakunatataq kamachirqan Israelpa Diosnin Señorta servinankupaq.

¹⁷Chaywanpas runakunaqa wak'a dios yupaychana cheqasllapipunin sacrificiota haywasharqanku, ichaqa Apu Señor Diosnillankumanmi haywarqanku.

¹⁸Manasesmanta wakin willakuykunaqa, Diosninmanta mañakusqan, Israelpa Diosnin Señorpa sutinpi profetakunaq rimaykusqan simikunapas llapanmi Israel Reykunaq Willakuynin Qelqapi qelqasqa kashan.

¹⁹Hinallataq mañakusqanmanta, mañakuynin uyarisqa kasqanmanta, tukuy huchankunamanta, Diospaq mana hunt'aq kasqanmanta, manaraq huch'uyyaykukushaspa wak'a dios yupaychana cheqaskuna sayarichisqanmanta, Asera nisqa diosaq rikch'aynin ruwasqanmanta, wak rikch'aykuna ruwasqanmantapas Profetakunaq Willakuynin Qelqapi qelqasqa kashan.

²⁰Manasés wañupuqtinqa hallp'anpin p'ampapurqanku. Chay qhepatataq churin Amonqa rantinpi kamachikurqan.

²¹Amonqa iskay chunka watayoqmi karqan kamachikuyta qallarishaspa, kamachikurqantaq Jerusalenmanta iskay watata.

²²Payqa manapunin Señor Diospa munayninman hinachu ruwarqan, aswanpas taytan Manasés hinan ruwarqan. Chaymi taytanpa ruwasqan llapan rikch'aykunata servispa sacrificiota haywarqan.

²³Amonqa manan hayk'aqpas Señor Diospa ñawpaqenpi huch'uyyaykukurqanchu imaynan taytan Manasés huch'uyyaykukurqan hinataqa, aswanpas huchallikuypin t'iqmurqan.

²⁴Amonpa kikin oficialninkunan pay contra rimanakurqanku, hinaspa wasinpi payta wañurqachirqanku.

²⁵Judá suyu runakunataq ichaqa rey Amón contra llapan rimanakuqkunata wañuchirqanku, hinaspa churin Josiasta taytanpa rantinpi reyta churarqanku.