Read Quechua Cuzco Bible 1988 2 Crónicas 34 Bible Online

2 Crónicas 34 - Quechua Cuzco Bible 1988 bible

2 Crónicas 34

¹Josiasqa pusaq watayoqmi karqan kamachikuyta qallarishaspa, kamachikurqantaq Jerusalenmanta kinsa chunka hukniyoq watata.

²Josiasqa Señor Diospa munayninman hinapunin chaninta ruwarqan, payqa David machulanpa ruwasqantan kikillanta ruwarqan.

³Josiasqa qanchis wata kurakña kamachikushaspa, warmallaraq kashaspanmi David machulanpa Diosnin Señorman sonqollikuyta qallarirqan. Hinaspan chunka hukniyoq wata kurakña kamachikushaspa Judá suyuta Jerusalén llaqtata ch'uyanchayta qallarirqan, chaymi wikch'urqan Asera nisqa diosaq rikch'ayninkunata, wak'a dios yupaychana cheqaskunata, thupasqa rikch'aykunata, unuyachispa ruwasqa rikch'aykunata ima.

⁴Paypa kamachisqanmi Baal nisqa diospa altarninkunata thunirqanku, chay patakunapi kashaq incienso altarkunatapas ñut'uta p'akirqanku. P'akillarqankutaq Asera nisqa diosaq rikch'ayninkunata, thupasqa rikch'aykunata, unuyachispa ruwasqa rikch'aykunatapas, ñut'uta kutaspataq chay polvota wisñirqanku chay rikch'aykunata yupaychaq runakunaq ayan p'ampasqa pataman.

⁵Josiasqa rikch'aykunata serviq sacerdotekunaq tulluntan kikinkuq altarninkupi ruphachirqan, ahinapin Judá suyuta Jerusalén llaqtatapas ch'uyancharqan.

⁶Chhaynallatataq ruwarqan Manasés aylluq llaqtankunapi, Efraín aylluq llaqtankunapi, Simeón aylluq llaqtankunapi, Neftalí aylluq llaqtankunapipas, muyuriqninkupi thunisqa kashaq llaqtakunapipas.

⁷Ahinatan Josiasqa Israel suyuntinpi llapan altarkunata, Asera nisqa diosaq rikch'ayninkunata thunirqan, tukuy rikch'aykunatapas lliwta chhalluspa ñut'urqan. Chaymantataq Jerusalén llaqtata kutipurqan.

⁸Chunka qanchisniyoq wata kurakña kamachikushaspataq Josiasqa suyutapas yupaychana wasitapas ch'uyanchaspaña, kamachirqan Azaliaq churin Safanta, llaqta kamachiq Maasiasta, Joakazpa churin qelqaq Joastawan Apu Señor Diosninku yupaychana wasita allichanankupaq.

⁹Manasés ayllu runakuna, Efraín ayllu runakuna, Israel suyupi qhepaq runakuna, Judá ayllu runakuna, Benjamín ayllu runakuna, Jerusalén llaqtapi tiyaq runakunapiwanmi yupaychana wasiman qolqeta apamusqaku, punku qhawaq Leví runakunataq chay apamusqanku qolqeta chaskisqaku. Yupaychana wasita allichananpaq kamachisqa qharikunataq chay qolqeta uma sacerdote Hilkiasman aparqanku.

¹⁰Chaymantataq Hilkiaspiwan chay qolqeta yupaychana wasipi llank'achiq umallikunaman qorqanku. Chay umallikunataq pagarqanku yupaychana wasi allichaypi llank'aqkunaman lliwta allichanankupaq.

¹¹Hinallataq k'ullu llaqllaqkunaman rumi ch'eqoqkunamanpas qolqeta qorqanku ch'eqosqa rumikunata, chakana kurkukunata, perqa chaqllana k'aspikunatawan rantinankupaq, hinaspa Judá runakunaq mana allichachisqanta allichanankupaq.

¹²Chay runakunaqa hunt'aq-kaywanpunin llank'arqanku, paykunaq umallinkun karqan Leví runa Merariq mirayninmanta Jahatpiwan Abdiaspiwan, Leví runa Kohatpa mirayninmanta Zakariaspiwan, Mesulampiwan. Kallarqantaq allin tocay yachaq Leví runakunapas,

¹³paykunan q'epiqkunatapas tukuy t'aqa llank'aqkunatapas kamachirqan. Leví runakunamantaqa kallarqantaqmi qelqaqkuna, qelqa waqaychaqkuna, punku qhawaqkunapas.

¹⁴Señor Dios yupaychana wasiman apasqanku qolqeta horqoshaqtinkutaq, sacerdote Hilkiasqa tarirqan Señor Diospa Moiseswan qosqan kamachikuy qelqa k'uyuta.

¹⁵Hinaspan Hilkiasqa reypa qelqaqnin Safanman willarqan: —Señor Dios yupaychana wasipin kamachikuy qelqa k'uyuta tarirqoni, nispa. Safanmantaq qorqan.

¹⁶Hinan Safanqa chay qelqata reyman aparqan, hinaspa willarqan: —Ñoqayku kamachiykikunaqa kamachiwasqaykikuman hinapunin llank'ashayku.

¹⁷Señor Diospa yupaychana wasipi kashaq qolqeta horqospaykun llank'achiq umallikunaman, kikin llank'aqkunamanpas qoykuña, nispa.

¹⁸Nillarqantaq: —Sacerdote Hilkiasmi kay qelqa k'uyuta qowan, nispa. Hinaspa Safanqa reypa ñawpaqenpi chay qelqata leeykurqan.

¹⁹Chaymi rey Josiasqa Diospa kamachikuynin simikunata uyarispa llakikuymanta p'achanta llik'ikurqan,

²⁰hinaspan sacerdote Hilkiasta, Safanpa churin Ahikamta, Mikaiaspa churin Abdonta, qelqaqnin Safanta, paypa yanapaqnin Asaiastawan kamachirqan:

²¹—Riychis, Señor Diosta tapumuychis ñoqapas, Judá suyupas, Israel suyupi qhepaq runakunapas tarisqanku qelqaman hinaqa imaynachus kanaykuta. Señor Diosqa k'arak phiñasqan ñoqanchispaq kashan, machulanchiskunapas manataq paypa siminta kasukusqakuchu, manataq kay qelqaq nisqanman hinapaschu kawsasqaku chayqa, nispa.

²²Hinan Hilkiasqa reypa kachasqankunapiwan profetisa Huldaman rirqanku. Payqa Salumpa warminmi karqan, Salumtaq Harhaspa churin Tikvaq churin karqan, yupaychana wasipi p'achakuna waqaychaq. Huldaqa Jerusalenpi yapachisqa llaqtapin tiyarqan. Kachasqakuna tapuqtintaq

²³Huldaqa kutichirqan: —Israelpa Diosnin Señormi nin: Ñoqata tapuwanaykichispaq kachamuqniykichis runaman willaychis: Ñoqa Señor Diosmi nini:

²⁴Ancha hatun llakitan kay llaqtakunamanpas chaypi tiyaq runakunamanpas chayachisaq, Judá reypa qayllanpi leesqan qelqapi tukuy ñakaykuna kashan chayman hina.

²⁵Paykunaqa wikch'uwarqankun, hinaspan wak dioskunaman inciensota q'osñichirqanku, tukuy ruwasqankuwanmi phiñachiwarqanku, chayraykun phiñakuyniy kay llaqta contra rawrarin, manataqmi thaninqachu, nispa, nispaykichis.

²⁶Chaywanpas Señor Diosta tapunaypaq kachamuqniykichis Judá reyta niychis: Israelpa Diosnin Señorqa uyarisqayki qelqamantan nisunki:

²⁷Kay llaqta contra chaypi tiyaqkuna tukuy nisqayta uyarispaykin qanqa kasukuq sonqoyoq karqanki, huch'uyyaykukuspaykin llakikuymanta p'achaykita llik'ikuspa ñawpaqeypi waqarqanki, chaymi ñoqaqa uyarirqayki.

²⁸Mana ima llakillayoqmi wañukapunki, machulaykikunawan kuskataq p'ampasqa kanki, kay llaqtata chaypi tiyaqkunata muchuchisaq chaytaqa manan rikunkiñachu, nispa, nispaykichis. Hinan kachasqakunaqa kutirqanku tukuy chaykunata reyman willanankupaq.

²⁹Chaymi reyqa Jerusalén llaqtapi, Judá suyupi llapan kurak runakunata paywan huñukunankupaq waqyachirqan.

³⁰Hinaspan reypas Judá suyupi llapan qharikunapas, Jerusalén llaqtapi tiyaq runakunapas, sacerdotekunapas, Leví runakunapas, hayk'an kaq llapan runakunapas Señor Dios yupaychana wasita rirqanku. Chaypin reyqa tarisqanku rimanakuy qelqa k'uyuta kunkayoqta leerqan.

³¹Hinaspan reypa tusan qayllapi sayaykuspa Señor Diospa ñawpaqenpi wakmanta rimanakurqan Señor Diosta kasukunanpaq, tukuy sonqo mana waqllispa kamachikuyninta, unanchayninta, yachachikuynintapas hunt'ananpaq, tarisqanku qelqapi rimanakuy simikunatapas lliwta kasunankupaqwan.

³²Hinan reyqa Jerusalén llaqta runakunatapas Benjamín ayllu runakunatapas rimanachillarqantaq, chaymantataq Jerusalén llaqta runakunaqa machulankuq Diosninwan rimanakusqankuman hina ruwarqanku.

³³Hinan rey Josiasqa Israel suyuntinpi tukuy millay wak'a dioskunata ch'usaqyachirqan, hinaspan Israel suyu llapallan runakunata kamachirqan Apu Señor Diosnillankuta servinankupaq. Chaymi Israel runakunaqa mana t'aqakuspa machulankuq Diosnin Señorta Josías wañukapunankama servirqanku.