Read Quechua Cuzco Bible 1988 2 Crónicas 35 Bible Online

2 Crónicas 35 - Quechua Cuzco Bible 1988 bible

2 Crónicas 35

¹Rey Josiasmi Jerusalén llaqtapi Señor Diospa sutinpi Alqaspa Pasarpariy Fiestata ruwarqan, ñawpaqkaq killapi chunka tawayoq p'unchaypitaq Alqaspa Pasarpariy Fiesta borregokunaqa nak'asqa karqan.

²Sacerdotekunatapas llank'ananku t'aqaman wakmanta churarqan, kallpacharqantaq Señor Dios yupaychana wasipi allinta llank'anankupaq.

³Israel runakunaman yachachiq Señor Diospaq t'aqasqa Leví runakunatataq nirqan: —Rimanakuy ch'uya cajata churaychis Israel rey Davidpa churin Salomonpa ruwasqan wasiman, amaña rikrapi wantuspa apanaykichispaq. Hinaspa Apu Señor Diosniykichista Israel llaqtantawan serviychis.

⁴Llank'anaykichispaq wakichikuychis aylluykichisman tupaqniykichis t'aqaman hina, Israel rey Davidpas churin Salomonpas unancharqanku chayman hina.

⁵Yupaychana wasipi kashaspaqa t'aqakuychis, llaqta-masiykichiskuna hamuqtin wakinniykichis sapanka familiapaq yanapaqnin kanaykichispaq.

⁶Alqaspa Pasarpariy Fiesta borregokunata nak'aychis, ch'uyanchakuychis, hinaspa llaqta-masiykichispaq borrego nak'asqata wakichiychis, Señor Diospa Moiseswan kamachikuynin simiman hina hunt'anankupaq, nispa.

⁷Rey Josiasmi Alqaspa Pasarpariy Fiestapi nak'anankupaq llapan chaypi kashaq runakunaman haciendanmanta qorqan borregota cabratawan llapanta kinsa chunka waranqata, kinsa waranqa torotawan.

⁸Reypa oficialninkunapas munayllankumanta ofrendakunata qollarqankutaq runakunaman sacerdotekunaman, Leví runakunamanwan. Dios yupaychana wasipi umallikuna Hilkías, Zakarías, Jehielpiwan qorqanku sacerdotekunaman Alqaspa Pasarpariy Fiestapi nak'anankupaq iskay waranqa soqta pachakniyoq borregota cabratawan, hinallataq kinsa pachak torotapas qorqanku.

⁹Leví ayllu umallikuna Konanías, Semaías, wawqen Natanael, Hasabías, Jeiel, Josabadpiwan Leví runakunaman qorqanku Alqaspa Pasarpariy Fiestapi nak'anankupaq borregota cabratawan phisqa waranqata, hinallataq phisqa pachak torotapas qorqanku.

¹⁰Fiestapaq llank'ay wakichisqa kaqtintaq sacerdotekunapas t'aqankupi kaq Leví runakunapas llank'anankupi sayaykapurqanku, reypa kamachisqanman hina.

¹¹Hinan Alqaspa Pasarpariy Fiesta borregokunata cabrakunata nak'arqanku, chay nak'asqankutaqa Leví runakunan ch'utirqanku, sacerdotekunataq paykunamanta yawarta chaskispa altarta ch'aqchurqanku.

¹²Chaymantataq Leví runakunaqa ruphachina sacrificiopaq t'aqasqankuta ayllu-ayllu familiakunaman qorqanku Señor Diosman haywanankupaq Moisespa kamachikusqan qelqaman hina. Chhaynallatataq toro aychatapas ruwarqanku.

¹³Hinaspa Alqaspa Pasarpariy sacrificiota ninapi q'asparqanku kamachikuyman hina, ancha ch'uya ofrenda aychakunatataq mankakunapi, rakikunapi, perolkunapi ima t'impuchirqanku, hinaspa usqhaylla runakunaman rakirqanku.

¹⁴Chaymantataq paykunapaqpas sacerdotekunapaqpas aycha mikhunata wakichirqanku, Aaronpa miraynin sacerdotekuna ruphachina sacrificiokunata wirakunata haywaspa tutakama llank'asqankurayku.

¹⁵Asafpa miraynin takiqkunapas llank'ananku cheqaspin kasharqanku Davidpa, Asafpa, Hemanpa, reypa profetan Jedutunpa kamachikusqanman hina. Punku qhawaqkunapas sapanka punkupi kasharqanku, manataq punku qhawasqankuta saqespa imamanpas purinanku karqanchu, wawqenku Leví runakuna paykunapaq lliwta wakichipusqanrayku.

¹⁶Rey Josiaspa kamachikusqanman hina haqay p'unchayqa Señor Diospa sutinpi lliwta wakichirqanku Alqaspa Pasarpariy Fiestata ruwanankupaq, Señor Diospa altarninpi ruphachina sacrificiokunata haywanankupaq ima.

¹⁷Chaymi Jerusalenpi kashaq Israel runakunaqa Alqaspa Pasarpariy Fiestata haqay p'unchay ruwarqanku, hinallataq Mana Qonchuyoq T'anta Fiestatapas qanchis p'unchay ruwarqanku.

¹⁸Israel suyupiqa manan hayk'aqpas profeta Samuelpa tiemponmantapacha chay kuti hina Alqaspa Pasarpariy Fiestata ruwarqankuchu. Manallataq mayqen Israel reypas chhayna fiestataqa ruwarqanchu rey Josiaswan, sacerdotekunapiwan, Leví runakunapiwan, llapan chaypi kashaq Judá suyu runakunapiwan, Israel suyu runakunapiwan, llapan Jerusalén llaqtapi tiyaq runakunapiwan ruwarqanku chay hinataqa.

¹⁹Chay Alqaspa Pasarpariy Fiestataqa ruwarqanku chunka qanchisniyoq wata kurakña rey Josías kamachikushaqtinmi.

²⁰Señor Dios yupaychana wasi allichayta rey Josiaspa tukusqan qhepatan Egipto rey Nekao rirqan Eufrates mayu patapi kashaq Karkemes llaqtapi awqa-tinkuq, rey Josiastaq paywan maqanakuq rirqan.

²¹Hinan rey Nekaoqa Josiasman willaqta kacharqan: Judá rey, ¿iman ñoqawan ruwanayki? Manan ñoqaqa qanwan maqanakuqchu hamuni, aswanpas awqaykunawan sapaqta maqanakuqmi hamuni. Diospunin kamachiwarqan usqhaylla hamunaypaq, chhaynaqa, ama Dios contra sayariychu, payqa ñoqawanmi kashan, paqtan wañuchisunkiman, nispa.

²²Rey Josiastaq ichaqa mana kutipurqanchu, aswanpas huk hina p'achayoqmi maqanakuq rirqan, Diospa kamachisqan rey Nekaoq nisqanta mana kasukuspa. Hinaspan Josiasqa Meguido qaylla pampapi rey Nekaowan maqanakurqan.

²³Hinan wach'iqkunaqa Josiasta wach'irqorqanku, chaymi payqa oficialninkunata nirqan: —Horqopuwaychis maqanakuymanta, sinchi k'irisqan kashani, nispa.

²⁴Oficialninkunataq carretanmanta hukkaq carretaman churaykuspa Jerusalén llaqtaman apapurqanku, hinan chaypi wañupurqan, p'ampapurqankutaq machulankunata p'ampanapi. Chaymi llapan Judá runakuna, Jerusalén llaqta runakunapas Josiasmanta waqarqanku.

²⁵Jeremiastaq Josiaspa wañupusqanmanta huk harawita kamarirqan, chaytan Israel suyupi warmi takiqkunapas qhari takiqkunapas kunankama Josiasmanta yuyarispa takinku. Chay hina harawitaqa wañuqkuna kaqtinmi takillaqkupuni, Harawi Qelqapi qelqasqataq kashanpas.

²⁶Josiasmanta wakin willakuykuna, Señor Diospa kamachikuynin siminman hina chanin ruwasqankuna,

²⁷qallariymanta tukukuykama ruwasqankunapas Israel Reykunaq Judá Reykunaq Willakuynin Qelqapi qelqasqan kashan.