Read Quechua Cuzco Bible 1988 2 Crónicas 36 Bible Online

2 Crónicas 36 - Quechua Cuzco Bible 1988 bible

2 Crónicas 36

¹Israel suyu runakunan Josiaspa churin Joakazta taytanpa rantinpi Jerusalenpi reyta churarqanku.

²Joakazqa iskay chunka kinsayoq watayoqmi karqan kamachikuyta qallarishaspa, kamachikurqantaq Jerusalenmanta kinsa killata.

³Egipto rey Nekaotaq Jerusalenpi kashaq Joakaztaqa kamachikuyninmanta horqorqan, hinaspa Judá suyu runakunata kamachirqan kinsa waranqa kinsa pachakniyoq kilo qolqeta, kinsa chunka kinsayoq kilo qoritawan contribucionta paganankupaq.

⁴Rey Nekaoqa Joakaztan presota hap'ispa Egiptoman aparqan, Judá suyuta Jerusalentawan kamachiqtataq Joakazpa wawqen Eliakimta churarqan, suticharqantaq Joakim sutiwan.

⁵Joakimqa iskay chunka phisqayoq watayoqmi karqan kamachikuyta qallarishaspa, kamachikurqantaq Jerusalenmanta chunka hukniyoq watata. Payqa manapunin Señor Diospa munayninman hinachu ruwarqan.

⁶Chaymi Babilonia rey Nabukodonosorqa suyuta munaychakuq phawaykuspa, Joakimta cadenawan watasqata Babiloniaman presota aparqan.

⁷Nabukodonosorqa apallarqantaq Señor Dios yupaychana wasipi serviciokunata, hinaspa Babiloniapi yupaychana wasiman chay serviciokunata churarqan.

⁸Joakimmanta wakin willakuykuna, millay mana chanin ruwasqankuna, tukuy huchallikusqankunapas Israel Reykunaq Judá Reykunaq Willakuynin Qelqapi qelqasqan kashan. Rantinpitaq churin Joakín kamachikurqan.

⁹Joakinqa chunka pusaqniyoq watayoqmi karqan kamachikuyta qallarishaspa, kamachikurqantaq Jerusalenmanta kinsa killa chunka p'unchayta, Payqa manapunin Señor Diospa munayninman hinachu ruwarqan.

¹⁰Chiri tiempo qhepatataq rey Nabukodonosorqa kacharqan Babiloniaman presota Joakinta apanankupaq, Señor Dios yupaychana wasipi sumaq illakunatawan apanankupaq. Judá suyuta Jerusalentawan kamachiqtataq Joakinpa tion Sedekiasta churarqan.

¹¹Sedekiasqa iskay chunka hukniyoq watayoqmi karqan kamachikuyta qallarishaspa, kamachikurqantaq Jerusalenmanta chunka hukniyoq watata.

¹²Payqa manapunin Apu Señor Diosninpa munayninman hinachu ruwarqan, profeta Jeremiasña Señor Diospa siminta rimaykushaqtinpas payqa manapunin huch'uyyaykukurqanchu.

¹³Nabukodonosorqa Diospa sutinpin Sedekiasta jurachisqa payman hunt'aqllapuni kananpaq, chaywanpas Sedekiasqa Nabukodonosor contran sayarirqan. Payqa sinchi k'ullu mana kasukuqmi karqan, manataq Israelpa Diosnin Señorman kutirikuytapas munarqanchu.

¹⁴Hinallataq llapan sacerdote umallikunapas, llapan llaqta runakunapas aswantaraq huchallikuypi t'iqmurqanku, wak suyu runakunaq millay mana chanin ruwasqantan paykunapas ruwallarqantaq. Ahinapin Jerusalenpi Señor Diospa ch'uyanchasqan yupaychana wasita qhellicharqanku.

¹⁵Machulankuq Diosnin Señortaq mana thanispa kamachinkunata kachaspa rimaykachirqan, llaqtanta yupaychana wasitawan khuyapayasqanrayku.

¹⁶Paykunataq ichaqa Diospa kachasqankunata asipayarqanku, hinaspa rimaykusqanku simitapas pisichaspa profetakunata sinsipayarqanku. Chayraykun Señor Diospa phiñakuyninqa paykuna contra q'oñirirqan, manataq imaynamantapas qespikuyta atirqankuñachu.

¹⁷Chaymi Señor Diosqa paykuna contra Babilonia reyta kachamurqan, hinan chay reyqa yupaychana wasipi kashaq waynakunata wañuchirqan, chaymantataq mana alqaspa waynatapas sipastapas kurak runatapas thultu yuyaqtapas wañuchirqan. Diosmi paykunataqa llapallankuta Babilonia reyman hap'ichirqan.

¹⁸Babiloniamanmi aparqan Dios yupaychana wasipi hayk'an kaqta hatuntapas huch'uytapas, qhapaq-kaykunatapas, hinallataq reypa wasinpi qhapaq-kaykunatapas, umallikunaq wasinkupi qhapaq-kaykunatapas.

¹⁹Dios yupaychana wasitataq ninawan kanaykurqanku, Jerusalén llaqta muyuriq perqatapas lliwta thunirqanku, tukuy qhapaq wasikunatapas ninawan kanaykurqanku, tukuy chaypi allinkaqkunatapas chhalluykurqanku.

²⁰Mana wañuchisqa runakunatataq Babiloniaman presota aparqan, hinan chay runakunaqa Nabukodonosorpa kamachin churinkunaq kamachin ima kapurqanku, Persia rey Babilonia suyuta munaychakunankama.

²¹Ahinapin Señor Diospa simin hunt'akurqan, payqa Jeremiaswanmi willachisqa: Kay suyu hallp'aqa purunyachisqa kaspanmi samanqa qanchis chunka watata, Israel runakunaq mana samachisqan watakuna hunt'akunankama, nispa.

²²Persia rey Ciro kamachikuyta qallarisqan watapin Señor Diosqa siminta hunt'achirqan Jeremiaswan ñawpaqta willachisqanman hina. Señor Diosmi Ciroq sonqonta kuyurichirqan, chaymi payqa kamachikurqan simipi qelqapi ima suyuntinpi khaynata willanankupaq:

²³Persia rey Ciron nin: Hanaq pacha Señor Diosmi llapan kay pachapi suyukunata qowan, kamachiwantaq Judá suyupi kashaq Jerusalén llaqtapi yupaychana wasita paypaq sayarichipunaypaq. Hayk'an Diospa llaqtanmanta kaypi kashaqkuna Jerusalén llaqtata puririchunku, Apu Señor Diosninkutaq paykunawan kachun, nispa.