Read Quechua Cuzco Bible 1988 2 Crónicas 5 Bible Online

2 Crónicas 5 - Quechua Cuzco Bible 1988 bible

2 Crónicas 5

¹Señor Diospa wasinpaq tukuy serviciokunata ruwachiyta tukuspataq, Salomonqa taytan Davidpa t'aqasqan qorita, qolqeta, llapan serviciokunatawan Diospa wasinpi qhapaq-kay churana wasiman churachirqan.

²Chaymantataq rey Salomonqa Jerusalén llaqtapi huñurqan Israelpi llapan kurak runakunata, llapan ayllu umallikunata, familia umallikunatawan, Señor Diospa rimanakuynin cajata Davidpa Llaqtan nisqa Sionmanta apanankupaq.

³Hinan llapan Israel qharikuna rey Salomonwan huñukurqanku qanchiskaq killapi Ch'uklla Ruwana Fiestapi.

⁴Israelpi kaq llapan kurak runakuna huñukuqtintaq, Leví runa sacerdotekunaqa rimanakuy cajata, Dioswan Tupana Karpata, karpapi kaq llapan ch'uya serviciokunatawan aparqanku Dios yupaychana wasiman.

⁶Hinan rey Salomonqa paywan huñukuq llapan qharikunapiwan rimanakuy cajaq ñawpaqenpi askha ovejakunata torokunatawan sacrificiota haywarqanku, chaykunan mana yupay atiy karqan.

⁷Chaymantataq sacerdotekunaqa Señor Diospa rimanakuynin cajata yupaychana wasi ukhuman apaykurqanku Ch'uyay-ch'uya Cheqaskama, hinaspa churaykurqanku raphrayoqkunaq raphran uraman.

⁸Chay raphrayoqkunaqa mast'arisqa raphrayoqmi karqan, raphrankunan rimanakuy cajata wantuna k'aspitapas pakarqan.

⁹Wantuna k'aspikunaqa sinchi hatunmi karqan, chaymi k'aspikunaq puntan Ch'uya Cheqasmanta rikukurqan, yupaychana wasi punkumantan ichaqa mana rikukurqanchu, ahinapin chay k'aspikunaqa qhepakapurqan.

¹⁰Rimanakuy cajapiqa iskay p'alta rumillan karqan. Israel runakuna Egipto suyumanta lloqsimuqtinmi, Señor Diosqa paykunawan rimanakusqa, chay p'alta rumikunatan Moisesqa cajaman Horebpi churaykusqa.

¹¹Chaypi kashaq sacerdotekunaqa llapallanmi ch'uyanchakurqanku, t'aqa-t'aqa llank'ayninkuta saqerispa. Leví ayllumanta llapan takiqkunan chaypi karqan: Asaf, Hemán, Jedutún, churinkuna, wawqenkunapiwan. Sumaq lino p'achawan p'achasqa, paykunan altarpa inti lloqsimuy ladonpi sayasharqanku, platillota, arpata, tawtinkutawan tocaspanku. Paykunawanmi kashallarqantaq pachak iskay chunkayoq sacerdotekuna cornetata tocaspanku. Cornetata, platillota, wak tocanakunatapas tocaqtinkutaq, tocaqkunapas, takiqkunapas huk kunkalla takiykurqanku, Señor Diosta yupaychaspanku, payman graciasta qospanku ima: —¡Señor Diosqa allinmi, munakuyninqa mana p'itiymi! nispa. Sacerdotekuna Ch'uya Cheqasmanta lloqsiqtinkutaq, yupaychana wasita phuyu hunt'aykurqan.

¹⁴Chaymi wasiqa Señor Diospa lliphlli-kayninwan hunt'a karqan, chay hawataq sacerdotekunaqa mana wasipi serviyta atirqankuchu.