Read Quechua Cuzco Bible 1988 ESDRAS 1 Bible Online

ESDRAS 1 - Quechua Cuzco Bible 1988 bible

ESDRAS 1

¹Persia suyu rey Ciro kamachikuyta qallarisqan watapin Señor Diosqa siminta hunt'achirqan Jeremiaswan ñawpaqta willachisqanman hina. Señor Diosqa Ciroq sonqontan kuyurichirqan, chaymi Ciroqa kamachikurqan simipiwan qelqapiwan suyuntinpi kay hinata willanankupaq:

²Persia rey Ciron nin: Hanaq Pacha Señor Diosmi llapan kay pacha suyukunata qowan, kamachiwantaq Judá suyupi Jerusalén llaqtapi yupaychana wasita paypaq sayarichipunaypaq.

³Chhaynaqa, hayk'an suyuypi Señor Diospa llaqtanmanta kaqkunata Dios yanapasunkichis. Judá suyupi Jerusalén llaqtaman riychis Señor Diospa wasinta sayarichiq. Paymi Israelpa Diosnin, Jerusalenpitaq kashan.

⁴Mayneqpipas Señor Diospa llaqtanmanta runakuna qhepanmanraq chayqa, wasimasinkuna paykunata yanapachunku qoriwan, qolqewan, uywawan, kawsaykunapiwan, hinallataq sumaq sonqo ofrendakunatapas qochunku Jerusalenpi kashaq Diospa wasinpi haywanankupaq, nispan, nispa.

⁵Chaymi Judá aylluq Benjamín aylluq uma runankuna, sacerdotekunapiwan, Leví runakunapiwan, Diospa llapan sonqonta kuyurichisqan runakunapiwan wakichikurqanku Jerusalenman Señor Diospa wasinta sayarichiq rinankupaq.

⁶Hinan llapa wasimasinkunaqa yanaparqanku qolqewan, qoriwan, kawsaykunawan, uywakunawan, valorniyoq sumaq qokuykunawanpas, hinallataq tukuy imaymana sumaq sonqo ofrendankutapas qorqanku.

⁷Nabukodonosormi Jerusalenpi Señor Diospa wasinmanta serviciokunata apamusqa, hinaspan diosninpa wasinman churasqa. Chaykunatan rey Ciroqa horqochimuspa,

⁸tesorero Mitridatesman qorqan. Mitridatestaq chay serviciokunata yupaspa Judapi kamachikuq Sesbasarman hap'ichirqan.

⁹Kaymi chay yupasqankuna: Kinsa chunka qori puruña, waranqa qolqe puruña, iskay chunka isqonniyoq wak puruñapiwan.

¹⁰Kinsa chunka qori hanq'ara, tawa pachak chunkayoq qolqe hanq'ara, waranqa serviciokunapiwan.

¹¹Llapan chay qorimanta qolqemanta serviciokunan phisqa waranqa tawa pachakniyoq karqan. Llapan chaykunatan Sesbasarqa Babilonia suyumanta apapurqan, kamachipaq apasqa Israel runakuna Jerusalenman kutipuqtin.