Read Quechua Cuzco Bible 1988 ESDRAS 3 Bible Online

ESDRAS 3 - Quechua Cuzco Bible 1988 bible

ESDRAS 3

¹Chayamusqanku qanchiskaq killa qallariytataq Israel runakunaqa llaqtankupi allinta tiyaykuspaña, Jerusalenpi llapan runa huk-nisqalla huñukurqanku.

²Hinan Josadakpa churin Jesúa, sacerdote-masinkunapiwan, Salatielpa churin Zorobabelpas, wawqenkunapiwan llank'ayta qallarirqanku Israelpa Diosninpa altarninta sayarichinankupaq, ruphachina sacrificiota haywanankupaqwan, Dios sonqo runa Moisespa kamachikuynin qelqaman hina.

³Chay suyupi tiyaq runakunataña manchakurqanku chaypas, ñawpaq kasqan cheqaspipunin altarta sayarichirqanku, chaypitaqmi ruphachina sacrificiota Señor Diosman haywarqanku tutamantapas ch'isipas.

⁴Chaymantataq Ch'uklla Ruway Fiestata ruwarqanku qelqasqa kasqanman hina, sapa p'unchaymi ruphachina sacrificiota haywarqanku hayk'atachus chay fiesta p'unchaypi haywanankuman hina.

⁵Chay qhepatan sapa p'unchay ruphachina sacrificiokunatapas haywarqanku, Mosoq Killa Fiesta sacrificiokunatapas, Señor Diospaq unanchasqa wakin fiestakunapi sacrificiokunatapas, Señor Diosman tukuy sonqo ofrendakunatapas.

⁶Ahinapin qanchiskaq killa qallariy p'unchaymantapacha ruphachina sacrificiokunata Señor Diosman haywarqanku, hinaña paypa wasi teqsin manaraq churasqachu kaqtinpas.

⁷Chay qhepatan wasi perqaqkunaman k'ullu llaqllaqkunamanwan qolqeta qorqanku. Hinallataq Sidón llaqta Tiro llaqta runakunamanpas mikhunata, ukyanata, aceitetawan apachirqanku, cedro kurkukunata Libanomanta mama qochanta Jope llaqtakama apamunankupaq, Persia suyu rey Ciroq unanchasqanman hina.

⁸Hinan Jerusalenpi Diospa wasinman kutimpusqanku qhepakaq wata iskaykaq killapi Zorobabel, Jesúa, llaqtamasinkuna, sacerdotekuna, Leví runakuna, kamachi-kaymanta Jerusalenman llapallan kutimpuqkunapiwan llank'ayta qallarirqanku. Leví runakunatataq iskay chunka watayoqmanta wichayman Diospa wasin llank'aqkunata kamachiqpaq churarqanku.

⁹Chaymi Jesuapas churinkunantin wawqenkunantin, Hodaviaspa ayllunmanta Kadmielpas churinkunantin, Henadadpa ayllunmanta Leví runakunapas huk-nisqalla huñukurqanku Señor Diospa wasinpi llank'aqkunata kamachinankupaq.

¹⁰Wasi perqaqkuna Señor Diospa wasin teqsita churaqtinkutaq, sacerdotekunaqa sacerdote p'achawan p'achasqa trompetantin asuykurqanku, hinallataq Asafpa miraynin Leví runakunapas platillontin Señor Diosta yupaychanankupaq kasharqanku, Israelpa reynin Davidpa kamachikusqanman hina.

¹¹Hinaspan Señor Diosman graciasta qospanku takirqanku: Señor Diosqa sumaqmi, mana p'itiymi Israel runakunapaq munakuyninqa, nispa. Llapa runan ancha kusisqa qaparispa Señor Diosta hatuncharqanku, paypa wasin teqsita churasqankumanta.

¹²Yuyaqña kashaq askha sacerdotekuna, Leví runakuna, ayllu uma runakunapiwan kunkayoqta waqarqanku teqsi churaqta rikuspa, paykuna ñawpaq yupaychana wasita rikusqankurayku. Hukkunañataq kusikuymanta qaparirqanku.

¹³Runakunan sinchita qaparirqanku, chaymi mana pipas repararqanchu kusikuymanta qaparisqankutapas waqasqankutapas, qaparisqankutaq karumanraq uyarikurqan.