Read Quechua Cuzco Bible 1988 ESDRAS 4 Bible Online

ESDRAS 4 - Quechua Cuzco Bible 1988 bible

ESDRAS 4

¹Kamachi kasqankumanta kutimpuqkuna Israelpa Diosnin Señorpa wasinta sayarichishaqtinkun, Judá aylluq Benjamín aylluq awqankuna uyarirqanku.

²Chaymi Zorobabelman ayllu uma runakunamanwan rispanku nirqanku: —Asiria suyu rey Esar-hadonpa kayman apamuwasqanku p'unchaymantapachan ñoqaykuqa Diosninchista yupaychashayku, paymanmi sacrificiotapas haywashayku, chayrayku wasi sayarichiypi yanapayta munaykiku, nispa.

³Hinan Zorobabel, Jesúa, Israel ayllu uma runakunapiwan kutichirqanku: —Qankunaqa manan Diosniykuq wasinta sayarichiypi yanapawankikumanchu, aswanpas ñoqaykukamallan Israelpa Diosnin Señorpaq wasitaqa sayarichisaqku, Persia suyu rey Ciroq niwasqankuman hina, nispa.

⁴Chaymi muyuriqninkupi tiyaq runakunaqa Judá runakunata manchachispa iskayyachirqan mana llank'anankupaq.

⁵Reypa wakin yuyaychaqninkunamantaq qolqeta lluk'iykurqanku sayarichiy yuyaykusqankuta qolluchinanpaq. Ahinapin chay llank'anata qolluchirqanku rey Ciroq kamachikusqan tiempopi rey Darioq kamachikunan tiempokama.

⁶Rey Asuero[1] kamachikuyta qallarishaqtintaq chay awqa runakunaqa Judapi tiyaq Jerusalenpi tiyaq runakunata huchachaspa qelqarqanku.

⁷Hinallataq rey Artajerjespas Persiapi kamachikushaqtinña, Bislam, Mitridates, Tabeel, wakin llank'aq-masinkunapiwan Artajerjesman Arameo rimaypi qelqamurqanku.

⁸Kamachikuq Rehummi qelqaq Simsaipiwan huk cartata Jerusalén contra Artajerjesman qelqallarqankutaq. Chay qelqaqkunataq kaykuna:

⁹Kamachikuq Rehum, qelqaq Simsai, llank'aqmasin juezkuna, Erek llaqtayoq, Babilonia llaqtayoq, Elampi Susa llaqtayoq llapan oficialkuna,

¹⁰Eufrates mayu inti haykuy lado hap'iypi wakin tiyaqkunapiwan. Paykunatan ancha hatun yupa mentasqa rey Asnapar llaqtankumanta apamuspa, Samaria llaqtakunapi Eufrates mayu inti haykuy lado hap'iy wakin llaqtakunapi tiyachisqa.

¹¹Kay hinan karqan apachisqanku qelqa: Rey Artajerjes, Eufrates mayu inti haykuy lado hap'iypi kamachiykikuna napaykuykiku.

¹²Reyniyku, kaytan willamuykiku: Babilonia suyumanta hamuq Judío runakunan Jerusalenman chayamuspanku, chay mana allin mana kasukuq llaqtata wakmanta sayarichishanku. Teqsitan allichankuña, perqaytapas qallarillankutaqmi.

¹³Reyniyku, yachanaykin, kay llaqta wakmanta hatarinqa muyuriq perqanpas sayarillanqataq chayqa, manan impuestota imamantapas paganqakuchu, chaskinayki qolqepas pisiyapunqan.

¹⁴Kamachiykipi kashaspaykuqa manan pisichasqa kanaykita munaykuchu, chaymi willamuykiku machulaykikunaq willakuynin qelqakunata t'aqwichinaykipaq. Chaypin tarinki kay llaqtaqa sinchi mana kasukuq kasqanta, reykunapaqpas huk hap'iykunapaqpas mana chanin kasqanta, ñawpaqmantapacha rey contra hatariq kasqantawan, chayraykun thunisqapas karqan.

¹⁶Reyniyku, chay llaqtachus wakmanta sayarinqa, muyuriq perqapas perqasqa kanqa chayqa, Eufrates mayu inti haykuy lado hap'iyqa manan kamachisqaykiñachu kanqa, nispa.

¹⁷Rey Artajerjestaq kutichirqan: —Kamachikuq Rehumta, qelqaq Simsaita, Samaria llaqtapi tiyaq Eufrates mayu inti haykuy lado wakin llaqtakunapi tiyaq llank'aq-masiykichiskunatawanmi napaykamuykichis.

¹⁸Apachimuwasqaykichis cartataqa sut'ita t'ikrachispan leechirqani.

¹⁹Chaymi kamachirqani willakuy qelqata t'aqwinankupaq. Hinan tarinku chay llaqtaqa ñawpaqmantapacha mana chanin, mana kasukuq llaqta kasqanta, reykuna contra sayariq kasqantawan.

²⁰Jerusalenpipas atiyniyoq reykunan kasqa, llapan chay Eufrates mayu inti haykuy lado hap'iyta kamachisqaku, chay reykunamanmi tukuy imamanta impuestota pagasqaku.

²¹Chay hinaqa, chay runakunata kamachiy ama llank'anankupaq, chay llaqtatapas ama wakmanta sayarichinankupaq ñoqaq ninaykama.

²²Allintapuni chay runakunataqa qhawaychis, paqtan ñoqapaq mana allinkuna astawan yapakunman, nispa.

²³Chay cartata Rehumpa, qelqaq Simsaipa, llank'aq-masinkunaq ñawpaqenpi leekuqtinmi, kaq rato Jerusalenpi Judío runakunaman phawaspanku llank'asqankuta ancha kallpawan qolluchirqanku.

²⁴Chaymi Jerusalenpi Diospa wasin llank'ayqa qollupurqan, qhepapurqantaq Persia suyu rey Darioq kamachikusqan iskaykaq watakama.