Read Quechua Cuzco Bible 1988 ESDRAS 5 Bible Online

ESDRAS 5 - Quechua Cuzco Bible 1988 bible

ESDRAS 5

¹Profeta Hageowan Iddoq churin profeta Zakariaspiwan Judapi tiyaq Jerusalenpi tiyaq Judío runakunaman Israelpa Diosnin Señorpa sutinpi willarqanku.

²Chaymi Salatielpa churin Zorobabelqa, Josadakpa churin Jesuapiwan wakmanta Jerusalenpi Diospa wasin llank'ayta qallarirqanku, Diospa profetankunapas llank'aysillarqantaq.

³Ichaqa Eufrates mayu inti haykuy lado hap'iypi kamachikuq Tatnai, Setar-boznai, llank'aq-masinkunapiwanmi kaq rato paykunaman rispanku nirqan: —¿Pin qankunata kamachirqasunkichis kay wasita sayarichispa tukunaykichispaq?

⁴¿Iman sutin kay sayarichiq runakunaq? nispa.

⁵Ichaqa Diosmi waqaycharqan Judío uma runakunata, chaymi kamachikuqkunaqa llank'ayta mana hark'arqankuchu, rey Darioman willaspanku paymanta cartata chaskinankukama.

⁶Chay qelqaqkunan kaykuna: Eufrates mayu inti haykuy lado hap'iypi kamachikuq Tatnai, Setar-boznai, chay hap'iypi kamachikuq-masinkunapiwan. Rey Darioman qelqasqanku cartaqa kay hinan karqan: Reyniyku, tukuypin allillan kanaykita munayku.

⁸Reyniyku, willamuykikun, Judea hap'iytan rirqayku hatun Diospa wasinta, hinaspan rikumurqayku hatun llaqllasqa rumikunawan Diospa wasinta perqashaqta. Judío runakunan perqata kurkuwan chakashankuña, usqhayllan llank'ashanku, allintataqmi usachishankupas.

⁹Uma runakunatataq tapurqayku: —¿Pin kamachirqasunkichis kay wasita sayarichispa tukunaykichispaq? nispa.

¹⁰Tapullarqaykutaq uma runakunaq sutintapas qelqanaykupaq, hinaspa qanman willamunaykupaq.

¹¹Hinan paykunaqa kutichiwarqanku: —Ñoqaykuqa Hanaq Pacha Kay Pacha Diospa kamachinkunan kayku, askha watakunaña Israelpa hatun reynin kay wasita sayarichispa tukuchisqa, chaytan wakmanta sayarichisaqku.

¹²Taytayku Hanaq Pacha Diosta phiñachiqtinmi, Babilonia suyu rey Kaldea runa Nabukodonosorman hap'iykachisqa, chaymi reyqa kay wasita thunisqa, runakunatataq Babiloniaman presota apasqa.

¹³Chaywanpas Babilonia rey Ciroqa ñawpaq wata kamachikushaspa, huk kamachikuyta unancharqan Diospa wasin wakmanta sayarichisqa kananpaq.

¹⁴Nabukodonosormi Jerusalenpi Diospa wasinmanta qorimanta qolqemanta serviciokunata horqospa, Babiloniapi yupaychana wasiman churasqa. Chaykunatan rey Ciro horqochimurqan, hinaspan Sesbasar sutiyoq runaman hap'ichirqan. Paytan kamachikuqta churaspa nirqan: Kay serviciokunata Jerusalenpi kashaq yupaychana wasiman apay, hinaspa Diospa wasin ñawpaq kasqan cheqaspi wakmanta sayarichiy, nispa.

¹⁶Chaymi Sesbasarqa Jerusalenman hamuspa Diospa wasin teqsita churaykurqan, chaymantapachan llank'ashayku ichaqa manaraqmi tukuykuraqchu, nispanku.

¹⁷Chhaynaqa, reyniyku, munawaqtaq chayqa, kamachiy reypa qelqa mayt'u waqaychanan wasita maskhanankupaq cheqaqpunichus rey Ciro Diospa wasinta Jerusalenpi sayarichinankupaq kamachisqa chayta yachanaykipaq, chaymantataq imachus yuyaykusqaykita willamuwayku, nispa.