Read Quechua Cuzco Bible 1988 ESDRAS 7 Bible Online

ESDRAS 7 - Quechua Cuzco Bible 1988 bible

ESDRAS 7

¹Chay qhepataña Persia suyu rey Artajerjes kamachikushaqtinmi, huk qhari Esdras sutiyoq karqan. Paypa taytanmi karqan Seraías, machulankunataq Azarías, Hilkías,

²Salum, Sadok, Ahitob,

³Amarías, Azarías, Maraiot,

⁴Zeraías, Uzi, Buki,

⁵Abisúa, Finees, Eleazar, ñawpaq sacerdote Aaronpiwan.

⁶Esdrasqa hamawt'an karqan, Moisesman Israelpa Diosnin Señorpa qosqan kamachikuy simitan allinta yacharqan. Señor Diosmi Esdrasta yanaparqan, chaymi rey Artajerjesqa tukuy mañakusqanta qorqan. Rey Artajerjes qanchis wataña kamachikushaqtinmi, Babiloniamanta Jerusalenman Esdrasqa rirqan Israel wakin runakunapiwan, sacerdotekunapiwan, Leví runakunapiwan, takiqkunapiwan, punku qhawaqkunapiwan, Diospa wasinpi llank'aqkunapiwan.

⁸Chay kikin wataq phisqakaq killanpin Esdrasqa Jerusalenman chayarqan.

⁹Babiloniamantan lloqsimurqanku wata qallariy killaq ñawpaq p'unchayninta, Diostaq puriyninpi sumaqta payta yanapamurqan, chaymi chayamurqanku Jerusalenman phisqakaq killaq ñawpaq p'unchayninta.

¹⁰Esdrasqa tukuy sonqowan Señor Diospa kamachikuy siminta allin yachaqmi hunt'aqmi karqan, chay simikunata llapallanta Israel runakunaman yachachiqmi karqan.

¹¹Señor Diospa kamachikuy siminta unanchayninta yachaq sacerdote Esdrasmanmi rey Artajerjesqa cartata qorqan, chaypin kay hinata nirqan:

¹²Reykunaq reynin Artajerjesmi Hanaq Pacha Diospa kamachikuy siminta yachaq sacerdote Esdrasta napaykuni.

¹³Israel runapas, sacerdotepas, Leví runapas Jerusalenman qanwan kuska riyta munaqkuna suyupi kanman chayqa, kamachinin rinankupaq.

¹⁴Qantaqa ñoqan qanchis yuyaychaqniykunapiwan kachashaykiku Diospa kamachikuy simin hap'isqaykita Jerusalenpi Judeapi chanintachus icha manachus hunt'ashanku chayta tapumunaykipaq.

¹⁵Ñoqaqpas yuyaychaqniykunaqpas tukuy sonqowan qosqayku qorita qolqeta Jerusalenpi kashaq Israelpa Diosninman apanki,

¹⁶hinallataq Babilonia suyuntinpi may chhikatachus qorita qolqeta huñusqaykitapas, runakunaq sacerdotekunaq tukuy sonqowan Jerusalenpi Diospa wasinpaq qosqankutapas.

¹⁷Chay qolqewanqa makillan rantinki torillokunata, ovejakunata, borregokunatawan, hinallataq ruru ofrendakunata vino hich'ay ofrendakunatapas, chaykunata Jerusalenpi Diosniykichispa wasin altarpi haywanki.

¹⁸Wakin qolqewan qoriwantaq mayqenchus allin rikch'akusunkichis qanmanpas llaqta-masiykikunamanpas chayta ruwankichis, Diosniykichispa munayninman hina.

¹⁹Ichaqa chaskisqayki serviciokunata qan kikiyki Jerusalenpa Diosninman qonki, chaykunan Diospa wasinpi yupaychanapaq kanqa.

²⁰Diosniykiq wasinpaq tukuy imapas wak necesitakuqtinqa reypa qolqe waqaychananmanta horqospa rantinki.

²¹Ñoqa rey Artajerjesmi kamachini Eufrates mayu inti haykuy lado hap'iypi llapan qolqe waqaychaqkunata Hanaq Pacha Diospa kamachikuy siminta yachaq sacerdote Esdrasman tukuy mañakusqanta usqhaylla mana alqaspa qonankupaq.

²²Kay chhikakama qonkichis: Kinsa waranqa kinsa pachak kilo qolqeta, iskay pachak phisqa chunkayoq costal trigota, iskay waranqa iskay pachakniyoq litro vinota, iskay waranqa iskay pachakniyoq litro aceiteta, kachitataq hayk'an munasqankuta.

²³Hanaq Pacha Diospa tukuy ima kamachikusqanta wasinpaq usqhayllata ruwankichis, kamachikusqay suyupaqpas churiykunapaqpas Dios ama phiñakunanpaq.

²⁴Yachallaychistaq llapan sacerdotekunaq, Leví runakunaq, takiqkunaq, punku qhawaqkunaq, Diospa wasinpi llank'aqkunaq, Diospa wasinpi wak kamachikunaqpas mana ima rikch'aq impuestotapas paganankuta.

²⁵Qantaq Esdras, Diosniykimanta yachayta chaskisqaykiman hina, llapan Eufrates mayu inti haykuy lado hap'iypi tiyaq runakunapaq juezkunata kamachikuqkunata churay chaninta kamachinankupaq. Llapankun yachananku Diospa kamachikuy simintaqa, chayraykun mana yachaqkunamanpas yachachinki.

²⁶Pipas Diosniykiq kamachikuy siminta ñoqaq kamachikusqaytapas mana kasukuqqa, usqhaylla muchuchisqa kachun, wañuchisqapas, wikch'usqapas kaqninkuna qechusqapas, carcelman wisq'asqapas, nispa.

²⁷Chaymi Esdrasqa Diosta yupaycharqan: ¡Saminchasqa kachun taytaykuq Diosnin Señorqa! Paymi reypa sonqonta kuyurichirqan Jerusalenpi wasinta hatunchananpaq.

²⁸Paymi munakuwaspanku reywan yuyaychaqninkunawan umallikunawan ima allinta qhawarichiwarqanku, chaymi Apu Señor Diosniypa yanapasqan kaspa kallpachakurqani, hinaspa Israel uma runakunata huñurqani ñoqawan kuska kutinankupaq, nispa.