Read Quechua Cuzco Bible 1988 ESDRAS 8 Bible Online

ESDRAS 8 - Quechua Cuzco Bible 1988 bible

ESDRAS 8

¹Rey Artajerjes kamachikushaqtinmi, wakin ayllu uma runakuna Babiloniamanta ñoqawan kutimurqanku. Kaykunan karqan:

²Fineespa mirayninmanta Gersón, Itamarpa mirayninmanta Daniel, Davidpa mirayninmanta Sekaniaspa churin Hatus, Parospa mirayninmanta Zakarías pachak phisqa chunkayoq qharikunapiwan, paykunaq sutinmi miray qelqapi qelqasqa karqan,

⁴Pahat-moabpa mirayninmanta Zeraiaspa churin Elioenai iskay pachak qharikunapiwan,

⁵Zatuq mirayninmanta Jahazielpa churin Sekanías kinsa pachak qharikunapiwan,

⁶Adinpa mirayninmanta Jonatanpa churin Ebed phisqa chunka qharikunapiwan,

⁷Elampa mirayninmanta Ataliaspa churin Jesaías qanchis chunka qharikunapiwan,

⁸Sefatiaspa mirayninmanta Mikaelpa churin Zebadías pusaq chunka qharikunapiwan,

⁹Joabpa mirayninmanta Jehielpa churin Obadías iskay pachak chunka pusaqniyoq qharikunapiwan,

¹⁰Baniq mirayninmanta Josifiaspa churin Selomit pachak soqta chunkayoq qharikunapiwan,

¹¹Bebaipa mirayninmanta Bebaipa churin Zakarías iskay chunka pusaqniyoq qharikunapiwan.

¹²Asgadpa mirayninmanta Hakatampa churin Johanán pachak chunkayoq qharikunapiwan,

¹³Adonikampa mirayninmanta Elifelet, Jeiel, Semaiaspiwan, paykunawantaq soqta chunka qharikuna, chay qharikunaqa qhepatañan kutimurqanku,

¹⁴Bigvaipa mirayninmantataq Utai, Zabud, paykunawantaq qanchis chunka qharikuna.

¹⁵Ahavaman rishaq mayu qayllapin paykunata huñuykurqani, chaypin kinsa p'unchay qaynarqayku. Chaymantataq runakunata sacerdotekunata watukurqani, manataq Leví runaqa hukpas kasqachu.

¹⁶Mana tarispataq waqyarirqani uma qharikuna Eliezerta, Arielta, Semaiasta, Elnatanta, Jaribta, Elnatanta, Natanta, Zakariasta, Mesulamtawan, hinallataq yachaysapa qharikuna Joiaribta Elnatantapas.

¹⁷Hinaspan Kasifia llaqtapi uma runa Iddoman paykunata kacharqani, yachachirqanitaq tukuy simikunata Iddoman chay llaqtapi yupaychana wasipi llank'aq-masinkunamanwan ninankupaq, Diosniykuq wasinpi llank'ay yanapaqta kachamunanpaq.

¹⁸Diosmi sumaqta yanapawarqanku, chaymi paykuna kachamuwaranku Israelpa churin Levipa churin Mahliq mirayninmanta huk allin yachaysapa Serebías sutiyoq qharita, churinkunatawan, wawqenkukunatawan, llapankuta chunka pusaqniyoqta.

¹⁹Kachamullawarqankutaq Merariq mirayninmanta Hasabiasta Jesaiastawan, churinkunata wawqenkunatawan, llapankuta iskay chunkata.

²⁰Davidpa oficialninkunapiwan Diospa wasinpi llank'aqkunata churasqaku Leví runakunata yanapananpaq, chay t'aqamanta karqanku iskay pachak iskay chunkayoq, llapanku sutinkumantakama kachasqa karqanku.

²¹Hinan Ahava mayu qayllapi kamachirqani ayunanaykupaq, ahinapi Diosniykuq qayllanpi huch'uyyaykukurqayku, purisqayku ñanpi aylluykuwan tukuy kaqniykuwan samilla kanaykuta mañakurqayku.

²²P'enqatachá reyta niykuman: Caballopi soldadokunata qoway, purisqaykupi awqaykumanta waqaychawanankupaq, nispa. Paytaqa kay hinatan nirqayku: Diosqa payman hap'ipakuqkunatan waqaychan, payta qonqaqkunapaqtaq k'arakta phiñakun, nispa.

²³Hinan ayunaspayku waqaychawanankupaq Diosniykumanta mañakurqayku, paytaq uyariwarqanku.

²⁴Chaymantataq chunka iskayniyoq sacerdotekunaq uma runanta akllarqani: Serebiasta, Hasabiasta, chunka sacerdote-masinkunatawan.

²⁵Paykunamanmi pesasqata qorqani qorita, qolqeta, serviciokunatawan. Chaykunatan Diosniykuq wasinpaq qosqaku reypas, yuyaychaqninkunapas, kamachikuqninkunapas, llapan chaypi kashaq Israel runakunapas.

²⁶Hinan paykunaman hap'ichirqani iskay chunka hukniyoq waranqa tawa pachak phisqa chunkayoq kilo qolqeta, pachak qolqe serviciokunata, kinsa waranqa kinsa pachakniyoq kilo qoritawan,

²⁷hinallataq qorimanta iskay chunka p'ukukunata pusaq kilo qoriq chaninta, broncemanta iskay llusk'achasqa serviciokunata ancha sumaqpuni qori hina chaniyoqta.

²⁸Chaymantataq nirqani: —Qankunapas kay serviciokunapas Señor Diospaq t'aqasqan kankichis. Tukuy sonqowan kay qorita qolqeta ofrendasqankuqa taytanchispa Diosnin Señorpaqmi.

²⁹Chaykunata allinta qhawaspa waqaychaychis Jerusalenpi Señor Diospa wasinpi sacerdotekunaq, Leví runakunaq, Israel ayllu uma runakunaq qayllanpi pesanaykichiskama, nispa.

³⁰Chaymi sacerdotekuna Leví runakunapiwan llapan pesasqa qorita, qolqeta, serviciokunatawan chaskirqanku, Jerusalenpi Diosniykuq wasinman apanankupaq.

³¹Hinan Ahava mayu qayllamanta Jerusalenman wata qallariy killa chunka iskayniyoq p'unchaypi puririrqayku. Diosniykutaq purisqaykupi waqaychawarqanku, awqaykumanta llapa llat'anaqkunamantapas qespichiwarqanku.

³²Jerusalenman chayaspaykutaq, kinsa p'unchay chaypi samarqayku.

³³Tawakaq p'unchaypin Diosniykuq wasinpi qorita qolqeta serviciokunatawan pesarqayku, hinaspan Uriaspa churin sacerdote Meremotman hap'ichirqayku. Paywanmi karqanku Fineespa churin Eleazar, Jesuaq churin Leví runa Jozabad, Binuiq churin Leví runa Noadiaspiwan.

³⁴Chay kikin p'unchaymi llapanta pesarqanku yuparqanku, qelqarqankutaq hayk'achus kasqanta.

³⁵Chaymantañan kamachi-kaymanta kutimpuqkuna Israelpa Diosninman ruphachina sacrificiota haywarqanku isqon chunka soqtayoq ovejakunata, qanchis chunka qanchisniyoq borregokunata, llapa Israelmanta chunka iskayniyoq torillokunata, hinallataq chunka iskayniyoq orqo cabrakunatapas hucha pampachaypaq. Llapan chaykunan Señor Diospaq ruphachisqa karqan.

³⁶Reypa kamachi qelqantataq qorqanku Eufrates mayu inti haykuy lado hap'iypi kamachikuqkunaman umallikunamanwan. Chaymi paykunaqa Judío runakunata yanaparqanku, Diospa wasinpi yupaychaypaqpas qorqanku.