Read Quechua Cuzco Bible 1988 ESDRAS 9 Bible Online

ESDRAS 9 - Quechua Cuzco Bible 1988 bible

ESDRAS 9

¹Chaykuna qhepatataq uma runakuna asuykamuwaspa niwarqanku: Israel runakuna, sacerdotekuna, Leví runakunapas manan kay suyu runakunaq map'a ruwayninkunamanta t'aqakunkuchu. Canaán runakuna, Het runakuna, Fares runakuna, Jebus runakuna, Amón runakuna, Moab runakuna, Egipto runakuna, Amor runakuna hinallataqmi ruwashanku.

²Chay runakunaq ususinwanmi paykunapas churinkupas casarakurqanku, ñawpaqtaqa uma runakunan kamachiqkunan chay hinata huchallikurqanku. Chay hinapi Diospa ch'uya llaqtan chay runakunawan qhellichakapurqan, nispa.

³Chayta uyarispaymi p'achayta llaqollayta llik'ikurqani, chukchaytapas sunkhaytapas t'irakurqani, sinchi llakisqataq tiyaykurqani.

⁴Hinan Israel runakunaq Diosninpa nisqanta llapa manchakuqkuna ñoqaman huñukamuwarqanku, kamachi-kaymanta kutimuqkunaq huchallikusqan hawa. Ñoqataq sinchi llakisqa phutisqa tiyasharqani ch'isi sacrificio horaskama.

⁵Sacrificio horasña kaqtintaq, llakikusqaymanta sayarispay llik'isqa p'achantin qonqoriykukuspa, Apu Señor Diosniyman makiyta haywarispa

⁶mañakurqani: ¡Diosníy! P'enqasqan musphasqan kashani, manan imaynata rimariyta atinichu, huchaykun sinchita miraykun uma wasapayta, huchaykun hanaq pachakamaraq chayan.

⁷Ñawpa taytaykuq p'unchayninmantapacha kunankaman sinchi huchallapi kawsayku. Chay huchayku hawan ñoqaykutapas, reyniykutapas, sacerdoteykutapas wak llaqta reykunaman hap'ichiwarqankiku, chaymi k'irisqa, wikch'usqa, llat'anasqa, pisichasqa ima karqayku. Chay hinallataq kunanpas kashayku.

⁸Chaywanpas, Apu Señor Diosniyku, qanqa khuyapayariwarqankikun, chaymi kaypi kashayku pisilla puchuqkuna kay ch'uya hallp'api samilla tiyanaykupaq. Kamachi-kayniykumanta samarichiwaspaykiku, sonqoykutapas kawsarichiwarqankiku.

⁹Kamachiña karqayku chaypas, qanqa manan saqerpariwarqankikuchu. Qanmi khuyapayaspa Persia suyu reykunawan allinta qhawarichiwarqankiku. Chayrayku kawsayniyoqta kutichimuwarqankiku, wasiykita thunisqamanta wakmanta sayarichinaykupaq, Judapi Jerusalenpi samillata waqaychawanaykikupaq.

¹⁰Kunanqa Diosniyku, ¿ima nisaqkutaq, chhaynataña ruwashaqtiykipas? Kamachikusqaykitan p'akirqayku.

¹¹Qanmi kamachiyki profetakunawan kamachisqanki: Hap'ikapuq haykunaykichis hallp'aqa qhellichasqan kapun chaypi tiyaq runakunaq map'a-kayninwan, suyuntintataq qhelli-kayninkuwan hunt'aykurqanku.

¹²Chayrayku ususiykichista churinkuwanqa ama casarachinkichischu, amataq ususinkuwanpas churiykichista casarachinkichischu, amallataq paykunaq allin kanantapas qhapaqyanantapas munankichischu. Chay hinapin kallpayoq kankichis, hallp'aq allin poqochisqanta mikhunkichis, hinallataq churiykichispaq chay hallp'ata wiñaypaq saqenkichis, nispa.

¹³Tukuy imaymana sasakunataña muchurqayku mana allin ruwasqaykumanta huchaykumantawan chaypas, manan muchuchiwarqankiku huchaykumanta chaskinaykuta hinapunichu, aswanpas kay pisilla puchuq runakunatan qespichiwarqankiku.

¹⁴¿Imaynataq kamachikuyniykikunata wakmanta p'akiykuman, kay map'a runakunawan casarakuspayku? Chay hinata ruwaqtiykuqa, phiñakuspaykin mana ch'ullayoqta ch'usaqyachiwankiku.

¹⁵¡Ay! Israelpa Diosnin Señorniyku, chaninmi kanki. Qanmi kay pisilla puchuq runakunata kawsachiwankiku. Qanmanmi huchaykuta willakuykiku, ñawpaqeykipiqa manan huchantin kaykumanchu, nispa.