Read Quechua Cuzco Bible 1988 NEHEMÍAS 13 Bible Online

NEHEMÍAS 13 - Quechua Cuzco Bible 1988 bible

NEHEMÍAS 13

¹Chay tiempopin llapa runakuna uyarishaqtin Moisespa qelqanta leespa tarirqanku: Manan hayk'aqpas Amón runakunapas Moab runakunapas Diospa llaqtanman yupasqachu kanqa,

²paykunaqa manan Israel runakunaman mikhunatapas unutapas qorqankuchu, aswanmi Balaamman qolqeta qoykuspa ñakachirqanku. Diosninchismi ichaqa chay ñakayta samiman tukuchirqan, nispa niq qelqasqata.

³Hinan kay kamachikuyta uyarispanku, llapan paykunawan huñukushaq mana Judío runakunata Israel llaqtamanta t'aqaspa wikch'upurqanku.

⁴Ñawpaqña sacerdote Eliasibqa Diospa wasinpi taqekuna waqaychananpaq churasqa kasqa. Eliasibqa Tobiaspa layasin kaspan

⁵payman hatun wasita qoykusqa. Ñawpaqtaqa chay wasipin waqaychasqaku ofrendakunata, inciensota, serviciokunata, Leví runakunaman takiqkunaman punku qhawaqkunaman qona trigo diezmokunata, vino diezmokunata, aceite diezmokunata, hinallataq sacerdotekunaman qona ofrendakunatapas.

⁶Tukuy chaykuna ruwakushaqtinqa, ñoqaqa manan Jerusalenpichu kasharqani, aswanpas Babilonia rey Artajerjes kinsa chunka hukniyoq wata kurakña kamachikushaqtin Babiloniata reyman rirqani. Chaypi kasqay qhepatataq reymanta mañakurqani Jerusalenman kutinaypaq.

⁷Kutimuspaytaq Eliasibpa mana chanin ruwasqanta yacharqani, Tobiasta sonqochaspa Diospa wasinpi huk hatun wasita qoykusqantapas yacharqani.

⁸Chay ruwasqanmi sinchita phiñachiwarqan, hinan Tobiaspa kaqninkunata wasinmanta lliwta hawaman wikch'umurqani.

⁹Hinaspa chay wasita ch'uyanchachirqani, wakmantataq chayman churachirqani Diospa wasin serviciokunata, inciensota, ofrendakunatawan.

¹⁰Yachallarqanitaq Leví runakunaman mikhunata mana qosqankuta, chay hawataq Leví runakuna yupaychaypaq churasqa takiqkunapas hallp'ankumankama ripusqankutawan.

¹¹Chaymi oficialkunata anyarqani: ¡Imanaqtinmi Diospa wasin wikch'usqa! nispa. Wakmanta Leví runakunata takiqkunata huñuspataq, kaq llank'ananman sapankata churarqani.

¹²Chaymi llapan Judá runakunaqa trigo diezmonkuta, vino diezmonkuta, aceite diezmonkutawan Diospa wasinpi taqekunaman apamurqanku.

¹³Chaymantataq chay taqekuna waqaychaqta churarqani sacerdote Selemiasta, kamachikuy simi yachachiq Sadokta, Leví runa Pedaiastawan, yanapaqninkutataq Mataniaspa churin Zakurpa churin Hananta. Paykunan llank'aq-masinkunaman mikhuyta rakiq karqanku. Paykunataqa akllarqani hunt'aq chanin runakuna kasqankuraykun.

¹⁴Mañakurqanitaq: Diosnilláy, yuyarikuway. Ama qonqaychu wasiykipaqpas chaypi qanta yupaychanapaqpas tukuy allin ruwasqaykunata, nispa.

¹⁵Chay p'unchaykunapin rikurqani Judá runakuna vinota ruwanankupaq samana p'unchaypi uvas sarushaqta. Wakinmi trigo marq'aykunata asnokunaman cargasharqanku, wakintaq vinota, uvasta, higosta, imaymana cargakunatawan cargasharqanku samana p'unchaypi Jerusalenman apanankupaq. Chaymi paykunata anyarqani samana p'unchaypi vendesqankumanta.

¹⁶Hinallataq Jerusalenpi tiyaq Tiro llaqtayoq wakin runakuna aparqanku challwata tukuy imaymana vendenata samana p'unchaypi chaypi tiyaq Judá runakunaman vendenankupaq.

¹⁷Chaymi Judá apu runakunata anyarqani: ¡Sinchi mana chanintan ruwankichis samana p'unchayta sarunchaspa!

¹⁸Chay hinatapunin machulaykichispas ruwarqanku, chayraykun Diosninchis sinchi mana allinkunawan ñoqanchistapas Jerusalén llaqtatapas muchuchirqan. Chayri, ¿astawanchu Israelpa Diosninta phiñachiyta munankichis samana p'unchayta sarunchaspa? nispa.

¹⁹Chaymi kamachirqani samana p'unchay qallariqtin Jerusalén punkukunata wisq'anankupaq, samana p'unchay tukukuykama ama kicharinankupaq. Hinallataq wakin kamachiykunata punku qhawaqta churarqani, ama pipas samana p'unchaypi cargakunata apaykunankupaq.

²⁰Huk iskay kutitan qhatuqkuna tukuy imaymana vendeqkunapas perqa qhepapi puñurqanku.

²¹Ñoqataq paykunata anyarqani: —¿Imanaqtinmi perqa qhepapi tuta puñunkichis? Wakmanta chaypi puñuqtiykichisqa, wikch'usqaykichismi, nispa. Chay p'unchaymantan manaña samana p'unchaypi hamurqankuchu.

²²Leví runakunatataq kamachirqani ch'uyanchakuspa punkukunata qhawanankupaq, samana p'unchay ama sarunchasqa kananpaq. Mañakurqanitaq: Diosnilláy, chaykuna hawa yuyarikuway, mana p'itiy munakuyniykiman hina khuyapayaykuway, nispa.

²³Hinallataq chay p'unchaykuna rikurqani wakin Judío runakuna Asdod llaqta, Moab suyu, Amón suyu warmikunawan casarakusqankuta.

²⁴Churinkupas kuskanmi rimarqan Asdod llaqtaq rimaynintapas wak suyukunaq rimaynintapas, ichaqa manan Hebreo rimaytaqa atirqankuchu.

²⁵Chaymi paykunata sinchita k'amispa ñakarqani, wakinninkuta hasut'irqani, chukchankutapas t'irarqani. Hinaspa Diospa sutinpi jurachirqani: Manan ususiykuta churinkuwan casarachisaqkuchu, manallataq churiykutapas ususinkuwan casarachisaqkuchu, nichispa.

²⁶Nillarqanitaq: —¡Chay hinan Israel rey Salomonpa huchan kasqa! Askha suyukuna ukhupi manan pay hina reyqa kasqachu, Diospa ancha munakusqan Israel suyuman reypaq churasqan, ichaqa mana Judío warmikunan huchallichisqa.

²⁷Chayraykun mana hinallata qhawaymanchu mana Judío warmikunawan casarakuspaykichis Dios contra sinchita huchallikusqaykichista, nispa.

²⁸Uma sacerdote Eliasibpa churin Joiadaq hukkaq churinmi Beth-horonmanta Sanbalatpa qataynin karqan, paytan qayllaymanta qarqorqani.

²⁹Mañakurqanitaq: Diosnilláy, paykunamanta yuyariy qan contra sacerdote-kayta sacerdotewan Leví runawan rimanakuyniykita qhellichasqankuta, nispa.

³⁰Chay hinatan sacerdotekunata Leví runakunata ch'uyancharqani wak suyukunaq imaymana ruwayninmanta, hinaspan paykunata tupaqninku t'aqapi llank'anankupaq churarqani, ruwanankuta sapanka hunt'anankupaq.

³¹Hinallataq runakunata kamachirqani llant'a ofrendata, rurukunamanta ñawinninta tupaqninkuman hina qonankupaq. Mañakurqanitaq: Diosnilláy, allinniypaq yuyarikuway, nispa.