Read Quechua Cuzco Bible 1988 NEHEMÍAS 2 Bible Online

NEHEMÍAS 2 - Quechua Cuzco Bible 1988 bible

NEHEMÍAS 2

¹Rey Artajerjes chunka isqonniyoq wata kurakña kamachikushaqtin, Nisán killapi rey mikhushaqtinmi vinota payman haywarqani. Paytaq mana hayk'aqpas ñawpaqenpi llakisqata rikuwaspa

²niwarqan: —¿Imanaqtintaq uyaykipas llakisqa p'aki-p'aki kashan? Manamá onqosqachu kashanki, ¿imamantataq sonqoykipi phutikushanki? nispa. Chaymi anchatapuni mancharikuspa

³reyta nirqani: —Reyníy, ¡wiñaypaq kawsay! ¿Imaynan mana llakikuymanchu tayta-mamaypa ayan p'ampasqa llaqta thunisqa punkunkunapas ninaq ruphasqan kashaqtin? nispa.

⁴Hinan reyqa niwarqan: Chhaynaqa, ¿imatataq ruwapusqayki? nispa. Hanaq Pacha Diosmanta mañaykukuspataq

⁵reyta nirqan: —Allintachus qhawariwanki, chanintaq rikch'akusunkipas chayqa, kachaway Judá suyuta, tayta-mamaypa ayan p'ampasqa llaqtata wakmanta sayarichimunaypaq, nispa.

⁶Chaymi reinawan kuska tiyashaq reyqa tapuykuwarqan: ¿Hayk'a unaytaq puriwaqri? ¿Hayk'aqtaq kutimpuwaqri? nispa. Kachawananpaq yuyaykukuqtinñataq, hayk'a tiempochus kananta willarqani.

⁷Nillarqanitaq: —Reyníy, allinchus kanman chayqa, Eufrates mayu inti haykuy lado hap'iypi kamachikuqkunapaq cartakunata qoway, Judaman rina ñanpi ama pipas hark'awanankupaq.

⁸Hinallataq sach'a-sach'aykita qhawaq Asafpaqpas cartata qoway kurkukunata qowananpaq, Diospa wasin muyuriq perqa punkukunapaq llaqta muyuriq perqapaqwan, tiyanay wasipaqwan ima, nispa. Chaymi reyqa tukuy chaykunata qowarqan, khuyapayakuq Diosniy yanapawasqanrayku.

⁹Reytaq ejército oficialkunata, caballopi soldadokunatawan ñoqata puriysiwananpaq kamachirqan. Eufrates mayu inti haykuy lado hap'iypi kamachikuqkunaman chayaspataq, reypa cartankunata paykunaman qorqani.

¹⁰Ichaqa Beth-horón llaqtayoq Sanbalat Amón suyu runa oficial Tobiaspiwanmi Israel runakunaq allinninpaq Jerusalenman chayasqayta yachaspanku sinchita phiñakurqanku.

¹¹Jerusalenpi ruwanaypaq Diosniy sonqoyman rimaykuwasqantaqa manan mayqen runamanpas willarqanichu. Chayasqaymanta kinsa p'unchayña chaypi kashaspaymi, wakin qharikunapiwan tuta puririrqani, ñoqataq asnopi sillaykusqa rirqani.

¹³Chay kikin tutan Wayq'o Punkuta lloqsispa Amaru Punkuman rirqani, chaymantataq Q'opa Hich'ana Punkuman. Ahinapin Jerusalén muyuriq perqata, thunisqata punkunkunatapas lliw ruphasqata qhawarirqani.

¹⁴Chaymantataq rirqani Unu Pukyu Punkuman, hinallataq Reypa Qochananman, asnoymi ichaqa mana chayneqta pasayta atirqanchu.

¹⁵Chaymi Kidrón wayq'onta wicharqani muyuriq perqata allinta qhawarispa, chaymantataq kutipuspa Wayq'o Punkunta haykupurqani.

¹⁶Oficialkunaqa manan yacharqankuchu may risqaytapas ima ruwasqaytapas. Manallataq Judío runakunamanpas, sacerdotekunamanpas, apukunamanpas, oficialkunamanpas, llank'ay munaq wakin runakunamanpas willarqanichu.

¹⁷Chaymantataq paykunata nirqani: —Rikushankichismi mana allinpi kasqanchista, Jerusalenmi lliw thunisqa, punkunkunapas ninaq ruphasqan. Chhaynaqa, wakmantayá Jerusalenpa muyuriq perqanta sayarichisun, amaña huch'uyyakuyllapi kasunchischu, nispa.

¹⁸Hinallataq willarqani imaynatachus khuyapayakuq Diosniy yanapawasqanta, kaqllataq reypa nimuwasqantapas. Hinan llapanku nirqanku: —Sayarichisunchis, llank'asunchis, nispa. Paykunataq kallpachanakurqanku allin yuyaykusqankuman hina llank'anankupaq.

¹⁹Beth-horón llaqtayoq Sanbalat, Amón suyu runa oficial Tobías, Arabia runa Gesempiwan yacharqospankutaq ñoqaykumanta asikurqanku. Pisichawaspankutaq niwarqanku: ¿Imatataq qankunari ruwashankichis? ¿Rey contrachu sayarishankichis? nispa.

²⁰Hinan kutichirqani: —Hanaq Pacha Diosmi tukunaykukama yanapawanqaku, ñoqaykutaq llank'ayta qallarisaqku. Qankunaqqa manan Jerusalenpi hallp'aykichispas kanchu, manallataq rimarinaykichispas kanchu, manan Diospa llaqtanwan hukllachasqapaschu kankichis, nispa.