Read Quechua Cuzco Bible 1988 NEHEMÍAS 4 Bible Online

NEHEMÍAS 4 - Quechua Cuzco Bible 1988 bible

NEHEMÍAS 4

¹Perqa sayarichisqaykuta yachaspanmi Sanbalatqa sinchita phiñakurqan, sonqonpas rawrarirqanraq, Judío runakuna contrataq asikurqan.

²Hinan paywan kashaq kamachikuq-masinkunaman Samaria soldadokunaman rimarqan: ¿Imatataq kay pisi kallpa Judío runakunari ruwashanku? ¿Sayarichiyta yuyankuchu? ¿Sacrificiotapas haywanqakuchu? ¿Huk p'unchayllapi tukurqonqakuchu? ¿Chay k'urpa montonmanta ruphasqa rumikunatapas horqonkumanchu? nispa.

³Qayllanpi kashaq Amón suyu runa Tobiastaq nirqan: —Hinalla sayarichishachunku, mayqen atoqllapas seqarqospaqa thunirparinqan, nispa.

⁴Hinan mañakurqani: ¡Ay! ¡Diosniyku, uyariy khaynata pisichawasqankuta! Paykunaman kutichiy k'amiwasqankuta, wak suyuman kamachi kanankupaq preso apasqa kachunku.

⁵Llank'asqaykumantan k'amiwanku, chayrayku ama hinallata qhawaychu kay mana chanin rimasqanta, huchantapas ama pampachaychu, nispa.

⁶Chaywanpas tukuy sonqon llank'asharqayku, chaymi kuskan perqakama sayarichirqayku.

⁷Jerusalén perqata usqhaylla sayarichishasqaykuta q'asankunatapas wisq'ashasqaykuta rikuspataq, Sanbalat, Tobías, Arabia runakuna, Amón suyu runakuna, Asdod llaqtayoqkunapiwan sinchita phiñakurqanku.

⁸Hinaspan llapanku rimanakurqanku huk nisqalla Jerusalenta phawaykamunankupaq, chaypi kaqkunata musphachiwanankupaq.

⁹Chaymi Diosniykumanta mañakurqayku, hinaspa tuta p'unchay awqaykumanta waqaychaqkunata churakurqayku.

¹⁰Judá runakunataq nirqanku: —K'urpa q'epiq runakunan sayk'urqapunku, askharaqtaq k'urpakunapas kashan, manan muyuriq perqata sayarichiyta atisunmanchu, nispa.

¹¹Awqanchiskunaqa nirqanmi: Paykunaq mana yachasqallan mana rikusqallan haykurqospa wañuchisunchis, chay llank'ananku qollupunanpaq, nispa.

¹²Paykuna qayllapi tiyaq Judío runakunan ichaqa askha kuti hamuspanku willawarqanku: Muyuntinmantan phawaykusunkichis, nispa.

¹³Chaymi kamachirqani runakunata aylluntintakama perqa q'asa qhepakunapi espadayoq, lanzayoq, p'eqtayoq makilla qhawanankupaq.

¹⁴Manchasqa kasqankuta reparaspaytaq uma runakunata, apukunata, wakin runakunata ima nirqani: —Ama manchakuychischu, yuyariychis Diosninchisqa hatunmi, manchanataq. Chhaynaqa, maqanakuychis warmiykichisrayku, wawaykichisrayku, wawqeykichisrayku, wasiykichisrayku, nispa.

¹⁵Awqaykun wakichisqa kashasqaykuta yacharqanku, contraykupi yuyaykusqankutapas Diospa qolluchisqanta repararqanku, chaymi llapayku perqaman kutipurqayku sapanka maychus llank'asqaykuman.

¹⁶Chay p'unchaymantaqa kuskan t'aqallan runaykuna ruwanapi llank'arqanku, huk kuskan t'aqataq lanzayoq, escudoyoq, p'eqtayoq, qara unkuyoq ima karqanku. Uma runakunataq perqa sayarichishaq Judá runakunata tukuypi kallpacharqanku. Q'epiqkunaqa q'epishallarqankupuni, ichaqa huk makiwan llank'arqanku, hukkaq makiwantaq armata hap'irqanku.

¹⁸Sapanka perqapi llank'aqkunataq chumpinkupi espadayoqkama llank'arqanku, pututu tocaqpas qayllaypin kasharqan.

¹⁹Hinan uma runakunata, apukunata, wakin runakunatawan nirqani: —Llank'asqanchisqa sinchi hatunmi, llapan perqa muyuriqpitaq t'aqa-t'aqa sapanka karupikama kashankichis.

²⁰Chhaynaqa, pututu waqayta uyarispaykichis, ñoqaq kasqay cheqasman huñukamunkichis, Diosninchismi ñoqanchisrayku maqanakunqa, nispa.

²¹Ahinatan llank'arqayku, kuskan t'aqa runakunataq pacha paqariymanta tutayanankama arma hap'intinkama karqanku.

²²Chaypachan nirqani: —Sapanka qhari yanapaqnintinkama Jerusalén llaqta ukhupi tuta qhepakuychis, chay hinapi llaqtata tuta makilla qhawasunchis p'unchayta llank'asunchis, nispa.

²³Chaywanpas ñoqaqa wawqeykunapiwan, runaykunapiwan, qhawaqkunapiwan ima puñunaykupaq mana p'achaykuta ch'utikurqaykuchu, armaykutapas manan kacharirqaykuchu.