Read Quechua Cuzco Bible 1988 NEHEMÍAS 5 Bible Online

NEHEMÍAS 5 - Quechua Cuzco Bible 1988 bible

NEHEMÍAS 5

¹Chaymantataq wakin qharikuna warminkupiwan wawqenku Judío runakuna contra sinchita quejakurqanku.

²Wakinmi nirqanku: —Ñoqaykuqa askha wawakunayoqmi kayku, chayrayku trigota necesitayku mikhunaykupaq, mana chayqa yarqaymantan wañupusaqku, nispa.

³Wakintaq nirqanku: —Ñoqaykuqa hallp'aykuta uvas chakraykuta, wasiykutawanmi prendakuyku manaña yarqayta muchuyta atispayku trigota rantikunaykupaq, nispa.

⁴Hukkunataq nirqanku: —Qolqetan manukuyku hallp'aykumanta uvas chakraykumanta reyman impuestota paganaykupaq.

⁵Ñoqaykupas llaqtamasiykupas ch'ulla mirayllan kayku, wawaykupas kaqkamallan manan huk hinachu paykunaq wawankumantaqa. Chaywanpas ñoqaykuqa kamachipaqñan wawaykuta qonayku kashan, kayqa wakin ususiykupas ñan kamachiña. Paykunataqa manan horqokapuyta atiykumanñachu, hallp'aykupas uvas chakraykupas hukkunaq makinpi kasqanrayku, nispa.

⁶Tukuy chay quejakuna rimasqankuta uyarispaymi sinchita phiñakurqani.

⁷Allinta yuyaykuspaytaq apukunata uma runakunata anyarqani: —¿Imanaqtinmi llaqta-masiykichiskunaman manuspa uñanta sik'ishankichis? nispa. Chay hawan huk hatun huñukuyman waqyarqani.

⁸Hinaspan paykunata nirqani: —Ñoqaykun atisqaykuman hina Judío wawqenchikunata horqomurqayku wak suyupi kamachi kasqankumanta. Qankunataq ichaqa wawqeykichista wak suyu runakunaman vendenkichis, ñoqaykutaq paykunata wakmanta rantimuqkuna kayku, nispa. Hinan paykunaqa mana ima nispapas kutichiwarqankuchu, aswanpas ch'inllan karqanku.

⁹Nillarqanitaq: —Ruwasqaykichisqa manan allinchu. Qankunaqa Diosta manchakuspan kawsanaykichis mana Judío runa awqanchiskunaq ama asikunankupaq.

¹⁰Ñoqapas, wawqeykunapas, runaykunapas trigota, qolqeta iman mañarqayku, ichaqa llapan chay manusqaykutan pampachapusaqku.

¹¹Chaymi valekuykichis, kunanpacha kutichipuychis hallp'ankuta, uvas chakrankuta, olivos chakrankuta, wasinkutapas, hinallataq qolqeta, trigota, aceiteta, vinotawan manusqaykichistapas pampachapuychis, nispa.

¹²Hinan kutichiwarqanku: —Arí, nisqaykita hinan ruwasaqku, kutichipusaqkun manataq imamantapas cobrasaqkuñachu, nispa. Chaymi sacerdotekunata waqyachispay paykunaq ñawpaqenpi rimarisqankuman hina hunt'anankupaq jurachirqani.

¹³Hinallataq p'achayta chhaphchispa nirqani: —Llapan kay simita mana hunt'aq runakunata, ahinata Dios chhaphchichun wasinmanta hallp'anmantapas mana imayoq qhepanankama, nispa. Hinan llapan huñuykusqa runakunaqa nirqanku: —¡Ahinapuni kachun! nispa, Señor Diostataq yupaycharqanku. Llapan uma runakunataq rimarisqankuta hunt'arqan.

¹⁴Rey Artajerjesmi chunka isqonniyoq wata kurakña kamachikushaspa, Judá hap'iypi kamachikuqta churawarqan. Hinan kamachirqani reypa kamachikuynin kinsa chunka iskayniyoqkaq watakama. Chay chunka iskayniyoq watapiqa manan hayk'aqpas ñoqapas wawqeykunapas kamachikuqman mikhuna qonata mañakurqaykuchu.

¹⁵Ñoqamanta ñawpaqkaq kamachikuqkunan ichaqa runakunata sinchita wakchayachisqa, mikhunankupaq ukyanankupaq cobrakusqaku, tawa chunka qolqetaqa sapaqtan sik'isqaku. Hinallataq kamachinkunapas runakunata muchuchirqan. Ñoqaqa Diosta manchakuspan mana chay hinatachu ruwarqani,

¹⁶aswanmi perqa sayarichiypi llank'arqani, hinallataq llapan runaykunapas chay llank'aypi yanapakurqan. Manataq hallp'atapas rantikurqanichu.

¹⁷Chaywanpas wasiypi mikhuq runakunaqa pachak phisqa chunkayoqmi karqanku, Judío runakuna oficialkunapiwan, kallarqantaq qaylla suyukunamanta watukamuwaqniykunapas.

¹⁸Sapa p'unchaymi huk torillota, allinnin soqta ovejata, wallpakunata nak'achirqani wayk'unankupaq, sapa chunka p'unchaymantataq askha vinota apachimurqani. Chaywanpas manapunin kamachikuqman llaqtaq mikhuna qonanta mañakurqanichu, runakunapaq sinchi imaymana ruwana kasqanrayku.

¹⁹Mañakurqanitaq: Diosnilláy, yuyarikuy, kay llaqtapaq tukuy allin ruwasqaykunata, allinniypaqtaq kachun, nispa.