Read Quechua Cuzco Bible 1988 NEHEMÍAS 6 Bible Online

NEHEMÍAS 6 - Quechua Cuzco Bible 1988 bible

NEHEMÍAS 6

¹Awqayku Sanbalat, Tobías, Arabia runa Gesem, hukkunapiwan Jerusalén perqa sayarichisqayta llapan q'asankunatapas wisq'asqayta yacharqanku. Manaraq punkukunata churashaqtiymi,

²Sanbalatqa Gesempiwan kachamuwarqanku kay hina willaqta: Hamuy Ono pampa nisqapi hukkaq llaqtachapi huñukusun, nispa. Paykunaqa mana allin ruwanawankupaqmi waqyachiwarqanku.

³Chaymi paykunaman willaqkunata kacharqani: Ancha hatun llank'aypin kashani, manan tiempoy kanchu qankunawan huñukunaypaq. Kay llank'anaypas saqeykuqtiyqa qollunmanchá, nispa.

⁴Chay hinatan tawa kutita kachamuwarqanku, ichaqa kaqllatapunin kutichirqani.

⁵Hinan Sanbalatqa huktawanpuni kamachinta kachamuwarqan mana wisq'asqa cartatawan apachimuwaspa.

⁶Chay cartan kay hina qelqasqa kasqa: Qorpanchis suyu runakunan rimashanku qansi Judío runakunapiwan rey contra sayarinaykichispaq wakichikushankichis, chaypaqsi llaqta perqatapas sayarichishankichis. Ahinatan Gesempas willawan. Hinallataqsi reyninku kanaykipaq yuyaykushanki,

⁷chaypaqsi profetakunatapas churarqanki qanmanta Jerusalenpi willanankupaq: Judá suyupiqa kanmi rey, nispa. Chhaynaqa, paqtan chay rimaykunata rey Artajerjes uyarinman. Chayrayku hamuy iskayninchis rimanakunanchispaq, nispa, niq.

⁸Hinan kutichirqani: —Rimasqaykiqa manan cheqaqchu, qanmi chaytaqa sonqoykimanta horqospa rimashanki, nispay.

⁹Paykunaqa llapankun yuyaykurqanku: Mancharichispa pisi kallpayachisunchis llank'asqankuta ama tukunankupaq, nispanku. Chaymi mañakurqani: Diosnilláy, kallpachaway llank'anaypaq, nispa.

¹⁰Chaymantataq Mehetabelpa churin Delaiaq churin Semaiaspa wasinta rirqani, paymi wasinpi wisq'aykukuspa kasharqan. Niwarqantaq: Diospa wasinpi huñukusun, ch'uya cheqasman haykuspa punkuta allinta wisq'akamusun, kunan tutan wañuchiq hamusunki, nispa.

¹¹Hinan kutichirqani: —Ñoqan hina qhariqa manan hayk'aqpas ayqenmanchu, manallataqmi Diospa wasinmanpas haykunmanchu kawsayninta qespichinanpaq. Manan haykuymanchu, nispa.

¹²Repararqanin profeta Semaiasqa Diospa mana kamachisqanchu rimashasqanta, aswanpas Tobiaspa Sanbalatpa lluk'iykusqan kaspa rimashasqanta.

¹³Paykunaqa lluk'iykurqanku ñoqata manchachiwaspa huchallichiwanankupaq. Chay hinapiqa ñoqa contran rimankuman karqan, pisichawaspankutaq asikunkuman karqan.

¹⁴Chaymi mañakurqani: Diosnilláy, ruwasqankumanta Tobiasta Sanbalat-tawan wanachiy, hinallataq profetiza Noadiastapas, ñoqata manchachiyta munaq huk profetakunatapas, nispa.

¹⁵Elul killaq iskay chunka phisqayoq p'unchayninpin muyuriq perqa sayarichisqa tukukurqan, phisqa chunka iskayniyoq p'unchaypi.

¹⁶Hinan qorpayku suyu runakunapas awqaykupas chayta yacharqanku, chay llank'aypi Diospa yanapawasqankuta reparaspataq qharichakushaspa k'umuykakapurqanku.

¹⁷Chay tiempopin Judá apukuna Tobiasman askha cartata qelqarqanku, paykunapas Tobiaspa cartanta sapa kutilla chaskirqanku.

¹⁸Askha Judá runakunan Tobiaswan hunt'anankupaq rimanakurqanku, Araq churin Sekaniaspa qataynin kasqanrayku, Tobiaspa churin Johananpas Berekiaspa churin Mesulampa ususinwan casarakusqanrayku.

¹⁹Chaymi qayllaypi Tobiaspa allin ruwasqankunata rimarqanku, ñoqaq rimasqaytapas Tobiasman kaq rato willallarqankutaq. Chay Tobiasmi manchachiwananpaq cartata apachimuwaq.