Read Quechua Cuzco Bible 1988 NEHEMÍAS 8 Bible Online

NEHEMÍAS 8 - Quechua Cuzco Bible 1988 bible

NEHEMÍAS 8

¹Qanchis killa chayamuqtintaq, llapa Israel runa llaqtankupikamaña tiyapurqanku. Chaymantataq paykunaqa huk nisqalla Unu Punku chimpa plazapi huñukurqanku. Hamawt'a Esdrastan nirqanku: —Israelpaq Diospa qosqan Moisespa kamachikuynin qelqata apamuy, nispa.

²Chaymi qanchiskaq killa qallariy p'unchaypi sacerdote Esdrasqa kamachikuy simi qelqata chay huñukuyman aparqan, chaypin kasharqanku llapan warmikuna qharikuna yuyayniyoqña erqekunapas.

³Hinan Unu Punku chimpa plazaq ñawpaqenpi Esdrasqa tutallamanta chawpi p'unchaykama kamachikuy simi qelqata leerqan. Llapankutaq leesqanta makilla uyarirqanku.

⁴Chay huñukuypaq tablakunata chakaspa sayarichisqanku patapin hamawt'a Esdrasqa sayaykurqan. Paywan kuskataq sayasharqanku paña ladonpi: Matatías, Sema, Anías, Urías, Hilkías, Maasiaspiwan, lloq'e ladonpitaq: Pedaías, Misael, Malkías, Hasum, Hasbadana, Zakarías, Mesulampiwan.

⁵Esdrasqa llapankumanta alto patapin kasharqan chaymi llapa runaq rikushasqan qelqata k'uyurarqan. K'uyuraqtintaq llapallanku sayarirqanku,

⁶Esdrastaq nirqan: —¡Yupaychasun Diosninchista, payqa hatun Diosmi! nispa. Runakunataq llapallanku makinkuta hoqarispanku, kutichirqanku: —¡Ahinapuni kachun! ¡Ahinapuni kachun! nispa. Qonqoriykukuspankutaq Señor Diosta yupaycharqanku pampakama k'umuykukuspanku.

⁷Leví runakunataq Jesúa, Bani, Serebías, Jamín, Akub, Sabetai, Hodías, Maasías, Kelita, Azarías, Jozabed, Hanán, Pelaiapiwan runakunaman qelqata sut'ita entiendechirqanku. Runakuna suyashaqtinkutaq,

⁸Leví runakunaqa Diospa kamachikuynin qelqata kunkayoqta leerqanku, t'ikraspankutaq sut'ita entiendechirqanku.

⁹Chayta uyarispan llapanku waqaykurqanku, hinan sacerdote hamawt'a Esdrasqa kamachikuq Nehemiaspiwan, kamachikuy simi yachachiq Leví runakunapiwan llapan runata nirqanku: —Kunan p'unchayqa Señor Diosninchispaq t'aqasqan, chayrayku ama waqaychispaschu, ama llakikuychispaschu.

¹⁰Aswanpas ripuychis, sumaq mikhunata mikhumuychis, upi vinota ukyamuychis. Wakchakunamanpas mikhunaykichista haywariychis. Kunan p'unchayqa Señor Diosninchispaq t'aqasqan. Ama llakikuychischu, Señor Diosmi kusichisunkichis, ahinapitaq kallpachakunkichis, nispa.

¹¹Hinallataq Leví runakunapas sonqonkuta tiyaykachirqan: Upallakuychis, ama waqaychisñachu, kunan p'unchayqa Señor Diospaq t'aqasqan, nispa.

¹²Llapa runakunan uyarisqanku simikunata entiendespaña, ripurqanku mikhuq, ukyaq, mikhunankuta haywariq, ancha kusisqa fiesta ruwaq ima.

¹³Iskaykaq p'unchaytaq ayllu uma runakuna, sacerdotekuna, Leví runakuna hamawt'a Esdraswan huñuykukurqanku kamachikuy simi qelqata makilla uyarinankupaq.

¹⁴Ahinapin Señor Diospa Moisesman qosqan kamachikuy qelqapi tarirqanku Qanchiskaq Killa Fiestapi Israel runakunaq ch'ukllapi tiyanankuta.

¹⁵Chaymi llapan llaqtakunaman, Jerusalenmanpas willaqkunata kacharqanku: Orqokunata wichaspa apamuychis olivo k'allmata, pino k'allmata, palmera k'allmata, arrayán k'allmata, llapan k'allmasapa sach'akunatawan, ch'ukllakunata kamachikuy simi qelqaman hina ruwanaykichispaq, nispa.

¹⁶Llapa runataq rispanku k'allmakunata apamurqanku, hinaspan sapanka ch'ukllakurqanku wasi pationkupi, wasi patankupi, Señor Diospa wasin patiopi, Unu Punku plazapi, Efraín Punku plazapiwan.

¹⁷Ahinatan kamachi-kaymanta llapan kutimpuqkunaqa ch'ukllata ruwakuspanku chaypi tiyarqanku. Chay ruwaytaqa Nunpa churin Josuepa tiemponmantapachan Israel runakunaqa saqepusqaku. Hatun q'ochukuytaq karqan.

¹⁸Sapa p'unchaymi Esdrasqa leerqan Diospa kamachikuy simin qelqata fiesta qallariy p'unchaymanta tukukuy p'unchaykama. Qanchis p'unchaymi chay fiestata ruwarqanku, pusaqkaq p'unchaypitaq huñukuypi karqanku Señor Diospa unanchasqanman hina.