Read Quechua Cuzco Bible 1988 ESTER 2 Bible Online

ESTER 2 - Quechua Cuzco Bible 1988 bible

ESTER 2

¹Phiñakuynin thaniykuqtintaq rey Asueroqa yuyarirqan reina Vastita, mana kasukusqanta, reina contra kamachisqantapas.

²Hinan reypa oficialninkuna payta nirqanku: —Allinmi kanman, reyníy, sumaq rikch'ayniyoq doncella sipaskunata qanpaq maskhamunkuman chayqa.

³Chaypaqtaq sapanka suyu hap'iypi huk oficialta churawaq, chay sipaskunatataq Susa llaqtapi reypa warminkunaq wasinman apamunkuman. Chaypitaq warmikuna qhawaq reypa eunucon Hegai paykunata qhawanman, sapankamantaq q'apaq hawinata sumaqchakunankupaq qonman.

⁴Mayqenninkutachá aswanta munawaq, chay sipas reina Vastiq rantinpi kapunman, nispa. Hinan reyman chay yuyaychasqankuqa allin rikch'akurqan, chaymi ruwarqan nisqankuman hina.

⁵Susa llaqtapin huk Judío runa tiyarqan Mardokeo sutiyoq, payqa Benjamín ayllumantan karqan, taytanmi Jair karqan, machulankunataq Simeipiwan Kispiwan.

⁶Babilonia rey Nabukodonosormi askha Judío runakunata Judá rey Jekoniasta ima Jerusalenmanta apasqa, Mardokeopas chaywan kuska apasqallataq kasqa.

⁷Mardokeoqmi huk priman karqan mana tayta-mamayoq, paypa sutinmi Hadasa karqan, huk sutintaq Ester karqan. Paytan wawachakapurqan tayta-maman wañukapuqtin. Esterqa munay siklla sumaq rikch'ayniyoqmi karqan.

⁸Reypa unanchasqan kamachikuy willakuqtintaq askha sipaskuna huñusqa karqan, hinan Susa llaqtapi reypa wasinman aparqanku. Paykunatan Hegaiman hap'ichirqanku qhawananpaq, Esterpas paykunawan apasqallataq karqan.

⁹Hegaiqa Esterta allinta qhawarirqan, yupatataq munarqan, chaymi payqa tukuy q'apaq hawinakunata qorqan sumaqchakunanpaq, hinallataq mikhunatapas aswan allinninta. Reypa wasinmantataq aswan allinnin qanchis sipaskunata Esterpa kamachinpaq qorqan, hinaspan chaykunatawan kuska reypa warminkunaq wasinpi huk sumaq wasipi tiyachirqan.

¹⁰Esterqa manan willakurqanchu mirayninmantapas ayllunmantapas, Mardokeoq ama rimarinanpaq kamachisqanrayku.

¹¹Mardokeotaq sapa p'unchay reypa warminkunaq wasin patio qayllapi puriykachasharqan, Esterpa imayna kashasqanta imaynatachus payta ruwashasqankutawan yachananpaq.

¹²Warmikunapaq kamachikuyman hinan llapan chay doncellakuna watantin sumaqchakurqanku, soqta killa cuerponkuta hawikurqanku mirra aceitewan, huk soqta killataq warmikunaq q'apaq hawinanwan llusinanpiwan hawikurqanku. Chaymantataq sapanka doncellakuna sutinkuq tupamusqanman hina reypa ñawpaqenman rirqanku.

¹³Tukuy ima munasqanta mañakusqanmi qosqa karqan, chaykunawan churaykukuspataq warmikunaq wasinmanta reypa wasinman rirqanku.

¹⁴Reypa wasinmanqa ch'isinmi rirqan, qhepantin paqartaq warmikunaq hukkaq wasinman rirqan, chaytan qhawarqan reypa eunucon Saasgaz, paymi karqan reypa tiyaqmasin warmikuna qhawaq. Chay qhepataqa manan hayk'aqpas reypa qayllanman kutirqanñachu, aswanpas rey wayllukunman hinaspa waqyachinman chayllan.

¹⁵Mardokeoq tion Abihailpa ususin Esterman tuparqan reyman qayllaykunan, hinan imatachus reypa eunucon warmikuna qhawaq Hegai qorqan chayllawan churakurqan. Esterwan llapan tupaqkunaqa ancha allintan payta qhawarirqanku.

¹⁶Rey Asuero qanchiskaq wata kamachikushaqtin, chunkakaq Tebet killapi, reypa wasinman Esterta pusarqanku, hinan reyman qayllaykurqan.

¹⁷Reytaq Esterta rikurqospa anchatapuni wayllukurqan, payta hinaqa manan hayk'aqpas huk warmita wayllukurqanchu. Chay hinapin Esterqa rey Asueroq sonqonta suwarqan. Chaymi reyqa huk sipaskunamantapas aswan allinta qhawarirqan, hinaspan huk pilluta umanman churarqan Vastiq rantinpi reina kananpaq.

¹⁸Chaymantataq reyqa hatun mikhuyta wakichirqan Esterpa sutinpi, hinaspan waqyachirqan llapan oficialninkunata suyupi yuyaychaqninkunatawan. Suyu hap'iykunapi contribucionta mana pagachirqanchu, hinallataq reykunaq qoykukuq kayninman hina askha qokuykunata rakirqan.

¹⁹Doncella sipaskuna iskaykaq kutipi huñuykusqa kasqanku p'unchaymi Mardokeoqa reypa wasin punkupi tiyasharqan.

²⁰Esterqa Mardokeoq yuyaychasqanman hinan mana willakurqanchu mirayninmantapas ayllunmantapas, aswanpas Mardokeoq yachachisqantan kasukurqan imaynan wasinpi kashaspa kasukullaqpuni hinata.

²¹Reypa wasin punkupi Mardokeo tiyashaqtinmi, reypa punku qhawaqnin eunucokunaqa Bigtanpiwan Terespiwan phiñasqa rimanakurqanku rey Asuerota wañuchinankupaq.

²²Chayta uyarispataq Mardokeoqa reina Esterman willarqan, Estertaq reyman willarqan: Mardokeon ahinata nin, nispa.

²³Hinan chayta allinta tapupakuspa hinapuni kasqanta yacharqan, iskaynin eunucokunatataq seq'osqa wañunanpaq kamachirqan. Chay ruwasqaqa suyuq willakuy qelqanpin qelqasqa karqan.