Read Quechua Cuzco Bible 1988 ESTER 3 Bible Online

ESTER 3 - Quechua Cuzco Bible 1988 bible

ESTER 3

¹Chaymantataq rey Asueroqa Agag runa Hamedataq churin Hamanta anchata hatuncharqan, hinaspan yuyaychaqninkunaq qollananta churarqan.

²Reypa llapa punku qhawaqninkunan Hamanta rikuspa qonqorikurqanku k'umuykukurqanku, ahinata reypa kamachikusqanrayku. Mardokeotaq ichaqa chay kamachikuyta mana kasurqanchu.

³Hinan reypa punku qhawaqninkuna Mardokeota tapurqanku: —¿Imanaqtinmi reypa kamachikusqanta mana kasunkichu? nispanku.

⁴Sapa p'unchaymi ahinata tapupayarqanku, paytaq ichaqa mana uyariqpas tukurqanchu. Chaymi Mardokeoq chay hina ruwasqanta Hamanman willarqanku imaninmansi chayta yachanankupaq, Mardokeoqa Judío runa kasqanta willakurqanmi.

⁵Hinan cheqaqtapuni Mardokeoq mana k'umuykukusqantapas qonqorikusqantapas rikuspa, Hamanqa sinchita phiñakurqan.

⁶Mardokeoq Judío runa kasqanta yachaspataq manaña payllatachu wañuchiyta yuyaykurqan, aswanpas Asueroq suyunpi tiyaq llapan Judío runakunatawan wañuchiyta yuyaykurqan.

⁷Chunka iskayniyoqkaq watapi rey Asuero kamachikushaqtintaq, ñawpaqkaq Nisán killapi Hamanpa qayllanpi suerteta qhawarqanku, ima killapichus ima p'unchaypichus yuyaykusqanman hina ruwananta yachananpaq. Hinan suerteqa lloqsirqan chunka iskayniyoqkaq Adar killaq chunka kinsayoq p'unchayninpaq.

⁸Rey Asueroman rispataq Hamanqa nirqan: —Suyuq llapan hap'iyninkunapi ch'eqeykusqa wak llaqta runakuna kashan, paykunaq kamachikuyninqa sapaqmi, manan wak llaqtakunamanpas tupanchu, manataqmi kamachikusqaykitapas kasukunkuchu. Manan allinchu hinallata kawsachinayki.

⁹Munanki chayqa, huk kamachikuyta unanchay llapan chay runakuna wañuchisqa kanankupaq. Chhayna kaqtinqa, ñoqa qosaq kinsa pachak kinsa chunka waranqa kilo qolqeta qolqe waqaychanaykiman oficialniykikunapaq, nispa.

¹⁰Hinan reyqa selloyoq sortijanta dedonmanta horqokuspa Judío runakunaq awqan Hamanman qoykuspa

¹¹nirqan: —Qolqeykitaqa waqaychakullay, chay runakunatapas ima munasqaykita ruway, nispa.

¹²Wata qallariy killaq chunka kinsayoq p'unchayninpin reypa qelqaqninkunaqa waqyasqa karqanku, hinan Hamanpa tukuy kamachikuyninta qelqarqanku apukunaman, hatun hap'iypi kamachikuqkunaman, llaqta kamachikuqkunamanwan. Chay kamachikuytaqa reypa sutinpin qelqarqanku, sapanka llaqtakunamanpas hap'iykunamanpas rimayninku rimaypi qelqayninku qelqapi, reypa selloyoq sortijanwanpas ñit'iykurqanku.

¹³Chaskikunataq chay kamachikuyta suyupi sapanka hap'iykunaman aparqanku. Chay kamachikuyqa willarqanmi llapan Judío runakunata, waynakunatapas, yuyaqkunatapas, wawakunatapas, warmikunatapas huk p'unchayllapi hukpaqkama wañuchinankuta, hinaspa llapa kaqninkutapas hap'ikapunankuta. Chaytaqa ruwananku karqan chunka iskayniyoqkaq Adar killaq chunka kinsayoq p'unchayninpi.

¹⁴Ahinatan chay kamachikuy qelqaqa sapanka hap'iy llaqtakunapi llapa runaman willasqa kanan karqan, chay p'unchaypi wakichisqa kanankupaq.

¹⁵Hinan chay kamachikuyqa suyuq hatun Susa llaqtanpi willasqa karqan, chaskikunapas kaq raton lloqsirqanku reypa kamachisqan kaspanku. Hinan Susapi tiyaq runakuna llakikuymanta muspharqanku. Reytaq ichaqa Hamanpiwan mikhuq ukyaq tiyaykurqanku.