Read Quechua Cuzco Bible 1988 ESTER 4 Bible Online

ESTER 4 - Quechua Cuzco Bible 1988 bible

ESTER 4

¹Tukuy chaykunata yacharqospataq Mardokeoqa llakikuymanta p'achanta llik'ikurqan. Yana p'achawan churakuspataq usphawan umanta hach'ikurqan, hinaspa llaqtantinta purirqan sinchi llakisqa sonqo nanayta qaparispa.

²Reypa wasin punkuman chayaspataq chaypi sayarqan, yana p'achayoqqa manan pipas ukhuman haykuqchu.

³Kaqllataq sapanka hatun hap'iykunapi reypa unanchay kamachikusqanta yacharqospanku Judío runakunaqa waqarqanku, llakikurqanku, anchirqanku, ayunarqanku ima, askhataq yana p'achawan churaykusqa usphapi tiyarqanku.

⁴Reina Esterta serviq eunuco qharikunataq warmi kamachinkunapiwan Mardokeoq ruwasqanta payman willarqanku, chaymi Esterqa sinchita llakikurqan. Hinaspa Mardokeoman p'achata apachirqan yana p'achanta ch'utikuspa churakunanpaq. Paytaq ichaqa mana munarqanchu.

⁵Hinan Esterqa reypa eunucon Hatakta waqyachirqan, paymi reina Esterta servirqan. Paytan Mardokeoman kacharqan: ¿Iman karqon? ¿Imanaqtinmi kayta ruwashanki? nispa, tapuqta.

⁶Chaymi Hatakqa Mardokeo tapuq rirqan, payqa reypa wasin punku plazapin kasharqan.

⁷Hinan Mardokeoqa willakurqan imaymana llakiq payta qatisqanta, willallarqantaq Judío runakunata wañuchiqtinqa reypa qolqe waqaychananman hayk'a qolqetachus Hamanpa qonanpaq prometekusqantapas.

⁸Hinallataq Susa llaqtapi willakusqan reypa unanchasqan qelqata Esterman apachirqan, Judío runakuna wañuchisqa kananta yachananpaq. Valekurqantaq Esterta reyman rimapayaq rispa llaqtanrayku valekunanpaq.

⁹Kutimuspataq Hatakqa Mardokeoq nisqan simikunata Esterman willarqan.

¹⁰Chaymi Esterqa Hatakta nirqan: —Mardokeoman kay hinata niy:

¹¹Reypa llapa oficialninkuna hap'iykunapi llapan tiyaqkunapas wasinpi kashaqtin reyman qayllaykuy kamachikuytaqa yachankun. Mayqen qharipas warmipas mana waqyasqa kashaspa reyman asuykun chayqa, wañuchisqan kanan, imaynapipas rey khuyapayaspa qori varanta haywarin payta pampachaspa, chayllan kawsan. Ñoqataqa kinsa chunka p'unchayñan reyqa mana waqyawanchu, nispa, nispayki.

¹²Mardokeotaq chayta uyarispa kutichillarqantaq:

¹³—¿Reypa wasinpi kaspachu, Judío runakunata wañuchishaqtin qespisqa kayta yuyanki? Manan hinachu kanqa.

¹⁴Manachus kay hinapi kashaqtinchis rimarinki chayqa, Judío runakunataqa hukmi yanapaspa qespichinqa, qantaq ichaqa llapa aylluykipiwan ch'usaqyachisqa kankichis. Ichapaschá kay hina sasachakuypi yanapawanaykikupaq reina kashanki, nispa.

¹⁵Hinan Esterqa huktawan Mardokeoman kutichispa nichirqan:

¹⁶Susa llaqtapi kashaq llapa Judío runakunata huñuy, hinaspa ñoqapaq ayunaychis, kinsa p'unchay kinsa tuta ama mikhuychischu, amataq ukyaychispaschu. Ñoqapas sipas kamachiykunapiwanmi ayunallasaqtaq. Chaymantataq reyman qayllaykuq risaq, manaña kamachikuyman hina atikuqtinpas risaqpunin, wañuchiwaqtinkuqa hina wañusaqpas, nispa.

¹⁷Hinan Mardokeoqa ripuspa Esterpa tukuy kamachikusqanta ruwarqan.