Read Quechua Cuzco Bible 1988 ESTER 5 Bible Online

ESTER 5 - Quechua Cuzco Bible 1988 bible

ESTER 5

¹Kinsa p'unchaymantataq Esterqa reina p'achanwan churaykukuspa reypa ukhu pationman haykurqan. Chaypitaq sayaykurqan reypa tiyasqan wasi ukhu qhawantin, patio qhawarisqa tiyananpin reyqa tiyasharqan.

²Chaymi reina Esterta rikurqospa sumaqta qhawarirqan, hinaspan hap'isqan qori varanta haywarirqan, Estertaq asuykuspa varaq puntanta llamiykurqan.

³Reytaq nirqan: —Reina Ester, ¿iman karqon? Willaway, ¿imatan mañakuyta munanki? Suyuq kuskannintaña mañakuwanki chaypas, qosqaykin, nispa.

⁴Paytaq kutichirqan: —Allin rikch'akusunki chayqa, valekuykin kunan p'unchay wasiyman Hamanpiwan hamunaykita, hatun mikhuytan qanpaq wakichini, nispa.

⁵Hinan reyqa nirqan: —Kunanpacha Hamanta waqyachimuychis reina Esterpa munasqanta ruwanaykupaq, nispa. Chaymi reyqa Hamanpiwan reina Esterpa wakichisqan hatun mikhuyman rirqanku.

⁶Vinota ukyashaspankutaq reyqa Esterta nirqan: —Ima munasqaykita mañakuway, suyuq kuskannintaña mañakuwanki chaypas, qosqaykin, nispa.

⁷Hinan Esterqa kutichirqan: —Kayllatan mañakuyta munani:

⁸Qanpa sumaq qhawarisqayki kani, mañakusqaytapas qowayta munanki chayqa, valekuykin paqarin hatun mikhuyman Hamanpiwan kutimunaykita. Chaypiña nisqayki imatachus munasqayta, nispa.

⁹Hamanqa chay p'unchay sonqopas-sonqo lloqsipurqan, ichaqa reypa wasin punkupi Mardokeota tiyashaqta rikuspanmi sinchita phiñakurqan, payta rikushaspa Mardokeoq mana sayarisqanmanta mana kuyurisqanmantawan,

¹⁰chaywanpas sonqon ukhullapi phiñakuspa upallakurqan. Wasinman haykupuspataq amigonkunata warmin Zerestawan waqyachispa

¹¹paykunaman willarqan tukuy qhapaq-kayninmanta, askha churiyoq kasqanmanta, payta hatunchaspa reypa tukuy ruwasqantapas, llapa oficialninkunamanta yuyaychaqninkunamantapas qollana qhawarisqa kasqantawan.

¹²Nillarqantaq: —Qhawariychis, reina Esterpas kunan p'unchay ñoqallatan waqyachiwan reypaq wakichisqan hatun mikhuyman. Kaqllataq paqarinpas reytawan ñoqallatawan hatun mikhuyman waqyashawanku.

¹³Ichaqa chay Judío runa Mardokeota reypa wasin punkupi tiyashaqta rikushallasaq chayqa, yanqapaqmi tukuy kaykunaqa kanqa, nispa.

¹⁴Hinan warmin Zeresqa llapan amigonkunapas nirqanku: —Seq'onata ruwachimuy iskay chunka iskayniyoq metro sayayniyoqta, hinaspa paqarin tutallamanta reyta valekamunki Mardokeota seq'ochinanpaq. Ahinapi hatun mikhuyman reypiwan kusisqa haykunki, nispa. Hinan chay yuyaychasqan simikuna Hamanman allin rikch'akurqan, chaymi seq'onata ruwachimurqan.