Read Quechua Cuzco Bible 1988 ESTER 6 Bible Online

ESTER 6 - Quechua Cuzco Bible 1988 bible

ESTER 6

¹Reyqa chay kikin tutan mana puñuy aysaqtin, suyuq willakuy qelqanta mañakurqan apamuspa qayllanpi leenankupaq.

²Hinan tarirqanku reypa punku qhawaq eunucon Bigtanwan Terespiwan reyta wañuchinankupaq yuyaykusqankuta Mardokeoq willasqanta.

³Chaymi reyqa nirqan: —Mardokeomanri, ¿chay ruwasqanmanta imata qospataq payta hatuncharqanchis? nispa. Oficialninkunataq kutichirqanku: —Manan imatapas qonchischu, nispa.

⁴Hamantaq chay rato reypa wasin patioman haykusharqan ruwachisqan seq'onapi Mardokeota seq'ochinanpaq reyta valekuq. Reytaq nirqan: —¿Pin patiopi kashan? nispa.

⁵Oficialninkunataq: —Hamanmi, nirqanku. Hinan reyqa: —Haykumuchun, nirqan.

⁶Hamán haykuqtintaq reyqa nirqan: —Ñoqan huk qharita hatunchayta munani, ¿imanasunmantaq? nispa. Hamantaq sonqonpi yuyaykurqan: ¿Pitaq kanmanri? Ñoqatachá hatunchayta munawan, nispa.

⁷Hinan kutichirqan: —Mayqen qharitapas hatunchayta munanki chayqa,

⁸qanpa p'achaykiwan p'achakuchun, sillakunayki caballopi sillakuchun, caballoq mat'inman coronayki hina seq'esqawan churakuchun.

⁹Chay p'achata caballotawantaq suyupi qollana oficial hap'ichun, hinaspa hatunchay munasqayki qharita p'achachichun, caballomanpas sillachichun. Caballo aysantintaq llaqta plazapi muyurichun: ¡Ahinatan reyqa hatunchay munasqan qharita ruwan! nispa, waqyakuspan.

¹⁰Chaymi reyqa Hamanta nirqan: —Allinmi, usqhaylla rispa p'achata horqomuy, caballotapas aysamuy, hinaspa imaynan nisqaykiman hina wasiy punkupi tiyaq Judío runa Mardokeota ruwamuy. Paqtataq wakillanta ruwawaq, nispa.

¹¹Hinan Hamanqa rispa Mardokeota p'achachimurqan, caballoman sillachispataq llaqta plazapi caballo aysantin muyurirqan: ¡Ahinatan reyqa hatunchay munasqan runata ruwan! nispa, waqyakuspa.

¹²Chaymantataq Mardokeoqa reypa wasin punkuman kutimpurqan. Hamantaq ichaqa usqhaylla wasinta kutiripurqan p'enqasqa uyanta pakaykukuspa.

¹³Wasinman haykuspataq warmin Zeresman yuyaychaqninkunamanwan willarqan tukuy llakiq payta qatisqanta. Hinan paykunaqa nirqanku: —Chay Mardokeo Judío runa kashaqtin, ñawpaqenpi atiyniyki pisichasqa chayqa, manan atipawaqñachu, aswanpas hukpaqkaman urmanki, nispa.

¹⁴Chayta rimashallaqtinkuraqmi, reypa eunucon qharikunaqa usqhaylla hamurqanku Hamanta waqyaq, Esterpa wakichisqan hatun mikhuyman rinanpaq.