Read Quechua Cuzco Bible 1988 ESTER 7 Bible Online

ESTER 7 - Quechua Cuzco Bible 1988 bible

ESTER 7

¹Reymi Hamanpiwan reina Esterpa wakichisqan hatun mikhuyman wakmanta rirqanku.

²Hinan chay iskaykaq p'unchaypi vinota ukyashaspanku reyqa Esterta tapuykullarqantaq: —Reina Ester, ima munasqaykita mañakuway, suyuq kuskannintaña mañakuwanki chaypas, qosqaykin, nispa.

³Chaymi reina Esterqa nirqan: —Reyníy, sumaqta qhawariwanki chayqa, allintaq rikch'akusunkipas chayqa, khuyapayaykuwayku ñoqatapas llaqtaytapas ama wañuchiwanankupaq. Chayllatan valekuyki.

⁴Ñoqapas llaqtaypas llapayku ch'usaqyachisqa kanaykupaqmi vendesqa kayku. Kamachipaq vendesqalla kaykuman chayqa, ch'inllachá kakuyman, manachá umayki nanachiq hamushaymanchu, nispa.

⁵Reytaq Esterta tapuykurqan: —¿Pitaq chayri? ¿Maypitaq kashan hatunchakuspa chay mana chaninta ruway munaqri? nispa.

⁶Hinan Esterqa kutichirqan: —¡Awqaykuqa kay millay Hamanmi! nispa. Hamantaq chayta uyarispan mancharikuymanta chiriyarqanraq.

⁷Reytaq sinchi phiñasqa sayarispa hatun mikhuymanta huertaman lloqsirqan. Hamantaq reypa wañuchinanta repararqokuspa, reina Esterpa qayllanpi qhepakurqan ama wañuchinanpaq rogakuq.

⁸Huertamanta kutiykamuspataq reyqa rikurqorqan Esterqa puñunanpi k'iraykusqa kashaqtin chakinpi Hamán thallashaqta. Chaymi reyqa phiñarikuspa nirqan: —¿Wasiypi kashaspachu qayllaypiraqtaq reinata violayta munanki? nispa. Chayta rey rimarqoqtin hinan wakin eunucokunaqa Hamanpa uyanta pakarqanku.

⁹Paykunamanta hukninmi Harbona sutiyoq nirqan: —Kashanmi Hamanpa wasinpi huk seq'ona iskay chunka iskayniyoq metro sayayniyoq, chaytan pay ruwachirqan reyman willaq Mardokeota seq'ochinanpaq, nispa. Hinan reyqa kamachirqan: —¡Chay seq'onapi Hamanta seq'omuychis! nispa.

¹⁰Ahinatan Hamanta seq'opurqanku, pay kikinpa Mardokeopaq ruwachisqan seq'onapi. Chaymi reypa phiñakuynin thaniykurqan.